Gikan sa Among mga Magbabasa

Pag-atiman—Pag-atubang sa Hagit Kining ekselenteng serye sa mga artikulo (Pebrero 8, 1997) nakadasig kanako pag-ayo. Desisiyete anyos ako, ug ako ang nag-atiman sa akong apohang lalaki nga naestrok ug sa akong inahan nga nawad-an ug maayong pangisip. Nakapahupay kanako ang pagkahibalo nga normal lang nga mapikal usahay sa mga pasyente ug mangutanang, ‘Ngano mang nahitabo kini kanako?’ Ako usab nga gipabilhan ang artikulo maylabot sa praktikal nga pag-abag nga mahimong ikahatag ngadto sa tig-atiman.

P. T., Italya

Tukma ug tugob sa pagsabot ang inyong paghubit sa mga pagbati sa mga tawo nga nag-atiman sa masakitong mga hinigugma. Nagpasalamat ako kang Jehova nga gitukmod niya kamo sa pagsulat niining nindot nga mga artikulo. Nagtuo ako nga makatabang kini kanamong tanan nga ania niining kahimtanga nga dawaton kini ug magpadayon sa pag-alagad kang Jehova uban ang pagmaya ug kasibot.

B. V., Republika sa Czech

Nga bag-o pa lang nakigdiborsiyo, usa ako ka inahan sa duha ka tin-edyer, ug ang akong anak lalaki nag-antos pag-ayo gumikan sa ADHD (Attention Deficit Hyperactivity Disorder). Dako kaayo ang kapit-os nga nalangkit niini nga luwan. Tungod sa bag-ong mga artikulo bahin sa pag-atiman, akong nasabtan ang akong mga pagbati sa kaulaw, kasuko, depresyon, ug pagkawalay-mahimo. Sa positibong bahin, ang mas gulang nga mga brader sa kongregasyon nagtabang sa pag-akatar sa akong anak lalaki. Usa gayod ka kalipay nga makita ang gugmang ipadayag pinaagi sa buhat!

C. C., Tinipong Bansa

Ang akong bana nag-antos gumikan sa sakit sa utok ug nagsalig sa akong pag-atiman. Nahadlok ako nga basin ug dili ako makasagubang. Si Jeanny, nga gihisgotan sa mga artikulo, naghatag kanakog kaisog sa dihang siya mitambag: “Ang kahadlok kon unsa tingali ang mahitabo sagad mas grabe kay sa tinuod nga kahimtang.”

A. P., Slovakia

Dihay panahon nga usa ako ka tig-atiman ug mibati sa daghang pagbati nga gihubit sa mga artikulo. Daghang higayon nga dili ako makasulti sa uban bahin sa akong kahigawad ug pagkasad-an. Kining mga artikuloha nakapaarang kanako nga hisgotan ang akong mga pagbati.

F. F., Nigeria

Wala gayod ako maghunahuna nga ipatik ang maong linaing mga artikulo. Ang akong inahan naglubog sa banig sukad niadtong 1989. Ingong bugtong nga anak lalaki, ug walay bisan mga igsoon o amahan, kinahanglan nakong pas-anon ang kaakohan sa pag-atiman kaniya. Mouyon ako sa kataposang parapo sa serye​—nga si Jehova ug ang iyang Anak, si Jesu-Kristo, mao ang labing mabination sa tanan nga mga tig-atiman. Sa daghang okasyon sa dihang ang kahimtang nahimong lisod kaayo ug naghunahuna ko nga dili na ako makasagubang, modangop ako kang Jehova sa pag-ampo ug magpakiluoy kaniya nga tabangan ako. Pinaagi lamang sa yanong paghibalo nga siya naminaw, akong nabati ang kusog nga mibalik kanako.

M. A. M., Peru

Masakiton ang akong bana, ug nakasinati ako sa halos tanan nga gihisgotan sa magasin. Mahinumdom ko sa daghang okasyon sa dihang ang mga brader ug mga sister nangutana bahin sa akong bana. Usahay maglagot ko, nga naghunahuna, ‘Nganong kanunay silang mangutana bahin niya? Nganong dili sila mangutana kon komosta na ko?’ Karon akong nasabtan nga kinaiyanhon lamang ang maong mga pagbati.

M. A. I. I., Espanya

Mga Depekto sa Pagkat-on Ginikanan ako sa usa ka diyes-anyos nga batang lalaki nga dunay grabeng ADHD. Nalipay ako pag-ayo sa pagsulti kaninyo nga sukad mapatik ang seryeng “Tabang Alang sa Kabataan nga May Depekto sa Pagkakat-on” (Pebrero 22, 1997), daghang higala ang nagsulti kanako nga bisan pag ilang gisulayan nga masabtan ang sakit ug motabang kanako, wala gayod nila bug-os masabti kon unsay gibati nako ug sa akong anak. Ang kadaghanan mikomento nga mas andam sila karong moabag. Usa ka sister sa kongregasyon ang migahin ug panahon nga tun-an pag-usab ang artikulo uban sa akong anak lalaki ug dasigon siya. Sa ulahi miduol kanako ang akong anak ug mihangyo nga basahon ang magasin pag-usab.

L. A. D., Tinipong Bansa