Ang Hunahuna sa Bibliya

Ang Kristohanong Panaghiusa ba Nagtugot sa Panagkadaiya?

HINUNGDANON ang panaghiusa diha sa Kristohanong kongregasyon. Ang kawalay-panaghiusa sa pagtuo sa doktrina magpahinabog grabeng panaglalis, panagsumpaki, ug bisan pagdumtanay. (Buhat 23:​6-​10) Ang Bibliya nag-ingon nga “ang Diyos usa ka Diyos, dili sa kasamok, kondili sa kalinaw.” (1 Corinto 14:33) Busa, gitambagan ang mga Kristohanon nga magapamulong nga may panag-uyon ug magkahiusa diha sa samang kaisipan ug diha sa samang dalan sa panghunahuna.​—1 Corinto 1:10.

Kini bang mga pulonga ug ang susamang mga teksto sa Bibliya nagdasig sa hugot nga pagkapareho taliwala sa mga Kristohanon sa tanang bahin? (Juan 17:​20-​23; Galacia 3:28) Ang matuod nga Kristiyanidad ba ingon sa paghubit sa Bibliya nagpahuyang sa panagkadaiya maylabot sa indibiduwal nga mga personalidad? Ang tanang Kristohanon ginalaoman bang mopahiuyon sa usa ka matang sa pig-ot nga kinaiya?

Ang Diyos Nagadani Kanato sa Tinagsatagsa

Ang pipila ka tawo hugot nga nagtuo nga ang Bibliya maoy laing galamiton lamang alang sa binuotbuot nga pagkontrolar sa katawhan. Tugotan ta, kini sagad giabusohan nianang paagiha sa pipila ka sekta. Apan, gihuptan ni Jesus ang lahi kaayong hunahuna bahin sa Kasulatan ug sa pagka-Awtor sa Diyos niini. Gibatbat niya ang Diyos ingong usa nga may dakong interes sa matag usa sa iyang mga linalang.

Sa Juan 6:​44, si Jesus miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” Ang berbo nga gigamit dinhi wala magsugyot nga ang Diyos nagpugos sa mga tawo. Hinunoa, ang Diyos malumong nagkabig, nagdani sa kasingkasing. Ingon sa pagbatbat niini sa usa ka eskolar sa Bibliya, adunay ‘impluwensiya gikan sa Diyos sa pagdani sa hunahuna aron sa pagtuo.’ Wala lantawa sa Maglalalang ang tawhanong pamilya ingong usa ka katawhan nga walay pagkinaugalingon. Siya nagtimbangtimbang sa mga indibiduwal ug malumong nagdani niadtong may kasingkasing nga mahiligon sa pagkamatarong ngadto kaniya.​—Salmo 11:​5; Proverbio 21:​2; Buhat 13:48.

Matikdi ang pagkamapasiboon ni apostol Pablo. Siya miila sa linaing mga panginahanglan sa mga indibiduwal ug gidawat niya nga ang tinong mga panglantaw maoy kasagaran sa mga nasyonalidad o mga kagikan. Dayon sa ingon gipasibo niya ang iyang paagi. Siya misulat: “Ngadto sa mga Judio ako nahimong ingon sa usa ka Judio, aron makabig ko ang mga Judio . . . Ngadto sa mga maluya ako nahimong maluya, aron makabig ko ang mga maluya. Ako nahimong tanang butang ngadto sa tanang matang sa katawhan, aron maluwas ko sa bisan unsa mang paagi ang pipila.”​—1 Corinto 9:​20-22.

Tin-aw, wala maghatag ug mapihigong larawan si Pablo sa mga tawo o nagtagad nilang tanan sa samang paagi. Siya naghatag kanila niini nga pagdasig: “Himoa ang inyong pamulong nga kanunay may pagkamadanihon, tinimplahan ug asin, aron mahibaloan kon sa unsang paagi angay kamo magahatag ug tubag ngadto sa matag usa.” (Colosas 4:6) Oo, si Pablo ug ang ubang mga Kristohanon kinahanglang moila ug motahod sa pagkatalagsaon sa matag tawo aron tabangan siya.

Ang Orihinal nga Laraw sa Diyos

Kining pagtahod sa usa ka tawo isip usa ka indibiduwal magpadayon human siya mahimong bahin sa Kristohanong kongregasyon. Dili wad-on sa katawhan sa Diyos ang ilang kailhanan pinaagi sa bug-os nga pagkapareho ug sa bug-os nga pagpahiuyon sa kagustohan niadtong may awtoridad. Hinunoa, sila nagapahimulos sa nagkadaiya kaayong mga personalidad ug may nagkalainlaing mga katakos, pamatasan, ug mga opinyon. Ang pagkinaugalingon sa matag usa wala lantawa ingong usa ka kahasol o kasamok. Kini maoy bahin sa orihinal nga laraw sa Diyos.

Busa, sa bag-ong kalibotan nga gisaad sa Bibliya alang sa mga matarong, ang kahingpitan taliwala sa mga tawo magtugot alang sa dakong panagkadaiya. (2 Pedro 3:13) Ubos sa ulohang “Kahingpitan,” ang ensiklopedia sa Bibliya nga Insight on the Scripturesa haom nga mikomento sa mosunod: “Apan, ang kahingpitan wala magpasabot sa kataposan sa panagkadaiya nga sagad hunahunaon sa mga tawo. Ang kalibotan sa kahayopan, nga maoy produkto sa ‘hingpit nga kalihokan’ ni Jehova (Ge[nesis] 1:​20-​24; De[uteronomio] 32:4), may hilabihang panagkadaiya.”

Ang Insight midugang: “Ang kahingpitan sa planetang Yuta sa ingon usab angayan sa panagkadaiya, kausaban, o panagkalainlain; magtugot kini alang sa yano ug sa komplikado, sa natural ug sa dili natural, sa aslom ug sa tam-is, sa gansalon ug sa hapsay, sa kabalilihan ug sa kakahoyan, sa kabukiran ug sa kawalogan. Kini magsakop sa makapadasig nga kapresko sa sayong tingpamulak, sa kainit sa ting-init uban sa hayag-asul nga kalangitan niini, sa kamadanihon sa mga bulok sa tinghunlak, sa lunsay nga katahom sa mao pay pagkahulog nga niyebe. (Ge[nesis] 8:22) Ang hingpit nga mga tawo sa ingon dili mahatagan ug mapihigong mga larawan sa pagkaparehog personalidad, panabot, ug mga katakos.”

Kabalaka Alang sa Uban

Bisan pa niana, ang matuod nga Kristiyanidad wala magdasig sa mahakogong dili pagtagad niadtong anaa sa palibot nato. Si apostol Pablo nag-amping pag-ayo sa matag bahin sa iyang kinabuhi ug panggawi aron dili makapandol sa uban. Siya miingon diha sa iyang sulat ngadto sa kongregasyon sa Corinto: “Wala gayod kami magahatag ug unsa mang hinungdan sa pagkapandol, aron nga ang among ministeryo dili kakit-an ug sayop.” (2 Corinto 6:3) Usahay, kinahanglan natong kontrolahon ang atong personal nga mga tinguha ug unahon ang mga panginahanglan sa uban kay sa atong kaugalingong mga kagustohan. Pananglitan, si Pablo misulat ngadto sa mga Kristohanon sa Roma: “Maayo nga dili mokaon ug unod o moinom ug bino o mobuhat ug bisan unsang butang nga ikapandol sa imong igsoon.”​—Roma 14:21.

Sa susama karong adlawa, mahimong pilion sa usa ka tawo nga molikay sa pag-inom ug alkoholikong ilimnon diha sa presensiya sa usa nga may problema sa pagkontrolar sa iyang pag-inom. (1 Corinto 10:​23, 24) Gihimo kini, dili tungod kay napugos sa pagpahiuyon, apan ingong dungganong buhat sa kalulot ug gugma. “Bisan gani si Kristo wala magpahimuot sa iyang kaugalingon.” Si Jesus usa ka indibiduwal, apan wala niya ipugos ang iyang kagustohan sa ikasubo sa mga pagbati sa uban.​—Roma 15:3.

Sa gihapon, usa sa labing makapadasig nga mga bahin sa matuod nga Kristiyanidad mao ang pagtahod niini alang sa mga kagawasan ug mga kagustohan sa indibiduwal sulod sa mga utlanan sa mga lagda sa Bibliya. Nagtudlo kini nga ang Diyos nagbuhat nato nga mahimong linain ug talagsaon. Sa 1 Corinto 2:​11, atong mabasa: “Kinsa taliwala sa mga tawo ang nahibalo sa mga butang sa usa ka tawo gawas sa espiritu sa tawo nga anaa kaniya?” Maningkamot kita sa pagsabot sa uban kutob sa maarangan. Apan kining bersikuloha nagpasabot nga ang matag usa kanato adunay pagkatalagsaon nga masabtan lamang nato ug sa atong Maglalalang. Kita adunay “natagong pagkatawo sa kasingkasing” nga ikabutyag nato kon buot nato.​—1 Pedro 3:4.

Panaghiusa ug Panagkadaiya —Usa ka Talandogong Pagkatimbang

Si apostol Pablo nagpakitag maayong panig-ingnan sa Kristohanong pagkatimbang. Bisag may awtoridad ingong apostol ni Kristo, siya mainampingon nga dili ipugos ang iyang opinyon sa uban.

Pananglitan, si Pablo may kusganon kaayong hunahuna bahin sa mga bentaha sa pagkadili-minyo niining dili-hingpit nga kalibotan. Siya mismo maoy dili-minyo sa panahong siya misulat: “Sila nga [magminyo] maadunay kasakitan sa ilang unod,” ug, “[ang balo] mas malipayon kon siya magpabiling ingon sa kon unsa siya, sumala sa akong opinyon.” Ang kamatuoran nga ang iyang mga pulong nahimong bahin sa dinasig nga Pulong sa Diyos nagpailang dili sayop ang iyang opinyon. Bisan pa niana, siya usab nagpatin-aw: “Bisan pa kon ikaw magminyo, dili ka makasala.”​—1 Corinto 7:​28, 40.

Dayag, ang kadaghanan sa mga apostol maoy minyong mga lalaki, ingon sa giadmitir ni Pablo pinaagi sa mga pulong: “Kami may awtoridad sa pagpakuyog ug igsoong babaye ingon nga asawa, maingon gayod sa uban pang mga apostol ug sa mga igsoon sa Ginoo ug kang Cefas, dili ba?” (1 Corinto 9:5) Ang mga Kristohanon nahibalo nga niining bahina sila makahimog kapilian nga lahi nianang kang Pablo ug siya sa gihapon nagtahod kanila.

Ang mga magsisimba sa Diyos kanunayng gitugotan sa pagpahayag sa ilang pagtuo nga uyon sa ilang talagsaong personalidad. Sa pagkatinuod, ang Diyos nagtugot gani sa mga magsusulat sa Bibliya sa paggamit sa ilang kaugalingong estilo sa dihang nagsulat. Pananglitan, sa tanang pagkamapainubsanon si Nehemias misulat sa iyang asoy diha sa unang persona. (Nehemias 5:​6, 19) Sa laing bahin, tungod sa pagkamakasaranganon wala gayod gamita kas-a ni apostol Juan ang iyang kaugalingong ngalan diha sa iyang asoy sa Ebanghelyo ug talagsa rang naghisgot sa iyang kaugalingon. Giuyonan sa Diyos kanang duha ka estilo ug gitipigan kini diha sa Bibliya.

Ang susamang mga panig-ingnan sa pagkatimbang ug pagkamakataronganon makaplagan sa tibuok Kasulatan. Tin-aw, ang Kristohanong panaghiusa nagtugot sa panagkadaiya. Siyempre, ang pagkalainlain ug mga kagikan ug mga opinyon motultol sa kawalay-panaghiusa kon walay espirituwal nga mga hiyas. (Roma 16:​17, 18) Apan sa dihang atong ‘sul-oban ang atong kaugalingon sa gugma, ang hingpit nga bugkos sa panaghiusa,’ makat-onan nato ang pagdawat ug pagpahimulos sa talagsaong mga personalidad sa uban.​—Colosas 3:14.

“Busa mahinangpong dawata ang usag usa,” nag-ingon ang Bibliya, “maingon nga ang Kristo usab mahinangpong midawat kanato, alang sa himaya sa Diyos.” (Roma 15:7) Pinaagi sa tabang sa espiritu sa Diyos, ang mga Kristohanon makakab-ot sa talandogong pagkatimbang sa paghupot ug panaghiusa samtang nagapahimulos sa panagkadaiya sa talagsaong mga personalidad sa kongregasyon.

[Footnote]

[Blurb sa panid 14]

Wala lantawa sa Maglalalang ang tawhanong pamilya ingong usa ka katawhan nga walay pagkinaugalingon

[Blurb sa panid 15]

Ang matag usa kanato adunay pagkatalagsaon nga masabtan lamang nato ug sa atong Maglalalang