Ang Hunahuna sa Bibliya

Kinahanglan ba nga Managsama ang Tanang Kristohanon Alang sa Kristohanong Panaghiusa?

ANG relihiyon karong adlawa morag gitiman-an sa pagkabahinbahin. Bisan ang mga tawo nga nanagsimba diha sa usa ra ka simbahan hayan may magkasumpaking mga pagtuo maylabot sa mga doktrina ug panggawi. Ingon niini ang pahayag sa usa ka magsusulat: “Mas lisod pa ganing makakita ug duha ka tawo nga nagtuo sa pareho gayod nga Diyos. Karong mga adlawa, morag ang matag tawo adunay kaugalingong opinyon maylabot sa Diyos.”

Kasukwahi gayod niini, si apostol Pablo nag-awhag sa unang-siglong mga Kristohanon sa Corinto nga “magasulti nga may panagkauyon” ug “bug-os nga magkahiusa sa samang kaisipan ug sa samang panghunahuna.” (1 Corinto 1:10) Ang pipila ka tawo karon nagsaway sa tambag ni Pablo. ‘Lainlain ang mga tawo,’ sila mangatarongan, ‘ug sayop ang pag-insistir nga ang tanang Kristohanon maghunahuna ug molihok sa samang paagi.’ Apan nagrekomendar ba si Pablo ug pagkamasinugtanon nga sama sa robot? Naghatag ba ug luna ang Bibliya alang sa personal nga kagawasan?

Panaghiusa, Dili Panagsama

Diha sa lain pa niyang mga sulat, giawhag ni Pablo ang mga Kristohanon sa pag-alagad sa Diyos uban sa ilang “gahom sa pagpangatarongan.” (Roma 12:1) Busa, dayag nga wala siya maningkamot sa paghimo sa mga membro sa kongregasyon sa Corinto nga morag mga robot nga walay panghunahuna. Apan nganong gisultihan man niya sila nga “magkahiusa sa samang kaisipan ug sa samang panghunahuna”? Gitambagan sila niini ni Pablo tungod kay ang kongregasyon sa Corinto adunay seryosong problema. Adunay pagkabahinbahin, mao nga ang uban naghunahuna nga si Apolos maoy ilang lider samtang ang uban mipabor kang Pablo o Pedro o nagdawat lamang kang Kristo. Ang maong pagkabahinbahin dili usa ka gamayng butang, tungod kay nagpameligro kini sa kalinaw sa kongregasyon.

Buot ni Pablo nga ang mga taga-Corinto “mosunod sa pagkausa sa espiritu sa nagahiusang bugkos sa pakigdait,” sama sa iyang giawhag sa ulahi sa mga Kristohanon sa Efeso. (Efeso 4:3) Gidasig niya ang mga igsoon sa pagsunod kang Jesu-Kristo nga nahiusa, nga dili magkabahinbahin ngadto sa wala-mahiusa nga mga grupo, o mga sekta. Niining paagiha ilang matagamtam ang malinawong kaharmonya sa katuyoan. (Juan 17:22) Busa, ang tambag ni Pablo ngadto sa mga taga-Corinto nagpasibo sa ilang panghunahuna ug nagpalambo sa panaghiusa, dili sa panagsama.​—2 Corinto 13:​9, 11.

Ang panaghiusa hinungdanon usab maylabot sa doktrina. Naamgohan sa mga sumusunod ni Jesus nga dunay “usa [lamang] ka pagtuo,” maingon nga dunay “usa [lamang] ka Diyos ug Amahan.” (Efeso 4:1-6) Busa, paneguroon sa mga Kristohanon nga ang ilang gituohan maoy kaharmonya sa kamatuoran nga gipadayag sa Diyos diha sa iyang Pulong bahin sa iyang kaugalingon ug sa iyang mga katuyoan. Nahiusa sila sa ilang pagtuo bahin sa kon kinsa ang Diyos ug kon unsay iyang gikinahanglan. Sila nagtuman usab sa tin-awng moral nga mga sukdanan nga gilatid diha sa Pulong sa Diyos. (1 Corinto 6:9-11) Niining paagiha ang mga Kristohanon nagpabiling nahiusa, sa doktrina man o sa moral nga paagi.

Paghusay sa mga Kasungian

Apan, wala kini magkahulogan nga ang matag Kristohanon baoran kon unsaon paghunahuna ug kon unsay buhaton diha sa tanang kahimtang sa kinabuhi. Ang kadaghanan sa mga butang nalangkit sa personal nga kagustohan. Tagda ang usa ka pananglitan. Nagduhaduha ang daghang unang-siglo nga mga Kristohanon sa Corinto bahin sa pagkaon ug karne nga lagmit naggikan sa templo sa idolo. Hugot nga gituohan sa uban nga ang pagkaon sa maong karne katumbas ra sa usa ka buhat sa bakak nga pagsimba, samtang gibati sa uban nga dili hinungdanon kon diin gikan ang maong karne. Sa paghusay sa maong talandogong isyu, si Pablo wala maghimog lagda nga magbaod sa mga Kristohanon kon unsay himoon. Hinunoa, giila niya nga ang mga tawo hayan mohimog lainlaing mga desisyon bahin sa maong butang.a​—1 Corinto 8:4-13.

Karong adlawa ang mga Kristohanon mahimong mohimog mga desisyon nga lahi nianang sa ubang mga Kristohanon maylabot sa matang sa trabaho, pag-atiman sa panglawas, kalingawan, o uban pang mga bahin nga nalangkit sa personal nga kagustohan. Ang maong mga kagustohan mahimong makatugaw sa uban. Maghunahuna tingali sila nga ang magkalahing panglantaw mahimong motultol sa panagbangi o pagkabahinbahin diha sa kongregasyon. Apan, ang maong mga resulta malikayan. Sa pag-ilustrar: Ang mga magsusulat sa musika may limitado lamang nga gidaghanon sa mga nota nga ilang magamit, bisan pa niana walay kinutoban ang mga posibilidad sa paghimog nindot nga musika. Sa samang paagi, ang mga Kristohanon mohimog mga pagpili nga nahiuyon sa diyosnong mga prinsipyo. Apan, sila adunay kagawasan sa pagpili sa dihang mohimog pipila ka personal nga mga desisyon.

Sa unsang paagi posibleng mapreserbar ang Kristohanong panaghiusa ug sa samang higayon mahuptan ang pagtahod alang sa indibiduwal nga kagustohan? Ang yawi mao ang gugma. Ang gugma alang sa Diyos motukmod kanato sa pagtuman nga kinabubut-on sa iyang mga sugo. (1 Juan 5:3) Ang gugma alang sa isigkatawo motukmod kanato sa pagtahod sa mga katungod sa ubang mga tawo sa paghimog matanlagong mga desisyon maylabot sa personal nga mga butang. (Roma 14:​3, 4; Galacia 5:13) Si Pablo naghatag ug maayong panig-ingnan niining bahina sa dihang nagpasakop siya sa awtoridad sa unang-siglong nagamandong lawas maylabot sa doktrinal nga butang. (Mateo 24:45-47; Buhat 15:​1, 2) Sa samang higayon, gidasig niya ang tanan sa pagtahod sa tanlag sa mga isigka-Kristohanon maylabot sa mga butang nga nagdepende sa ilang personal nga desisyon.​—1 Corinto 10:25-33.

Dayag nga walay usa nga angayng hukman tungod sa paghimog matanlagong desisyon nga dili supak sa mga prinsipyo sa Bibliya. (Santiago 4:12) Sa laing bahin, ang maunongong mga Kristohanon dili magpugos sa ilang kaugalingong mga katungod nga madaot na hinuon ang tanlag sa uban o mabahinbahin ang kongregasyon. Ni ipamugos nila nga sila may kagawasan sa pagbuhat ug usa ka butang nga tin-awng gidili sa Pulong sa Diyos. (Roma 15:1; 2 Pedro 2:​1, 19) Ang gugma alang sa Diyos angayng magtukmod kanato sa pagpahiuyon sa atong tanlag ngadto sa panghunahuna sa Diyos. Pinaagi niini padayon kitang mahiusa sa atong mga isigkamagtutuo.​—Hebreohanon 5:14.

[Footnote]