Akong mga Putyukan Nagpusa ug mga Piso!

NAGPUYO ako sa gamayng umahan sa amihanang Sweden. Niining bag-o pa, sa dihang duha sa akong mga himungaan nagsugod sa paglumlom sa mga itlog, namatikdan ko ang ilang mga lihok. Duha ka adlaw human pus-a ang unang mga piso, ang pipila kanila migawas aron sa paglakaw ug nakaagi sa laing himungaan. Nagtuo nga iyaha ang mga piso, siya dihadiha mibiya sa iyang mga itlog, ug nagsugod sa pagtigom kanila ilalom kaniya. Ang mga piso daw wala magpakabana kon haing himungaan ang moatiman kanila.

Naningkamot ako sa pagkuha sa himungaan aron ibalik ang “kinawat” nga mga piso ug mobalik sa paglumlom sa iyang kaugalingong mga itlog, apan napakyas ako sa akong mga paningkamot. Hapit na nakong ilabay ang gibiyaang mga itlog sa basurahan sa dihang mihunong ako ug naghunahuna, ‘Basin aduna pay kinabuhi sa sulod niini!’ Unya nakakuha akog ideya.

Usa ka dakong kolonya sa mga putyukan naghupot kanunay sa temperatura nga duolag 34 grado Celsius sa ilang mga udlan. Busa gidala ko ang mga itlog ug gibutang kini diha sa lut-od sa mga gapas ibabaw sa pus-anang lawak sa sulod sa usa sa akong mga udlan. Dayon nagbutang ako ug duha ka tasang tubig duol niini aron motabang sa paghupot sa kaumog diha sa “pugaran.” Giukay ko ang mga itlog kada adlaw, sa ingon gisundog ang naglumlom nga himungaan.

Pila ka adlaw sa ulahi, nadungog ko ang linaing piyakpiyak gikan sa ubay-ubayng mga itlog. Sa hamubong panahon sa ulahi, ang basa gamayng piso migula gikan sa bagaw niini! Gipunit ko kini dihadiha ug gibutang kini ilalom sa himungaan nga nagbiya sa iyang mga itlog. Sa kalipay, gidawat niya kini. Wala magdugay siya may nalumlomang 12 ka balhiboong mga piso nga atimanon, tungod sa puliking mga putyukan.​—Tinampo.

[Picture Credit Line sa panid 31]

Tanang hulagway: Foto, Roland Berggren, Västerbottens-Kuriren, Sverige