Ang Ebolusyon Dili Kamatuoran
Ang mga surbi nagpakita nga daghang Amerikano nagtuo nga ang unang mga tawo gilalang sa Diyos nga direkta ug dili pinaagi sa proseso sa ebolusyon gikan sa orihinal nga mga matang sa kinabuhi. Apan nganong daghan man kaayong mga magtutudlo sa Amerika ang nagtuboy sa walay-hunahuna, sulagmang ebolusyon ingong kamatuoran? Ang usa ka katarongan mao nga “ang mga pundamentalistang Darwinista . . . nagkontrolar sa mga departamento sa siyensiya sa daghang unibersidad,” nag-ingon si Phillip E. Johnson, propesor sa abogasiya sa University of California sa Berkeley.
Si Johnson nag-ingon: “Sa ubang mga kaso ang mga propesor sa biolohiya gidid-an sa pagsulti sa mga estudyante nga adunay balidong katarongan sa pagduda sa pangangkon nga ang walay-hunahuna nga mga proseso sa materya makamugna ug nakamugna gayod sa mga kahibulongan sa biolohiya.”
Ang siyentipiko ug inhenyero nga si Murphy O’Dean nag-ingon: “Inay kay isalikway ang usa ka teoriya nga dili tinuod, ang kiling sa ‘siyensiya sa ebolusyon’ nahimong usa ka pagpahayag ug hugot nga pagtuo nga ang ‘ebolusyon tinuod gayod.’” Ang nagkasumpaking ebidensiya ug ang kakulang sa ebidensiya wala panumbalinga o kaha gipakamenos.
Ngano? Si Michael Behe, biologo sa molekula, nag-ingon diha sa Darwin’s Black Box: “Daghang tawo, apil ang daghang inila ug tinahod-pag-ayong mga siyentipiko, dili lamang buot motuo nga adunay usa nga naglungtad nga labaw sa kinaiyahan. Dili nila buot nga ang usa ka labaw-sa-kinaiyahan nga persona mag-apektar sa kinaiyahan.” Apan ang tinuod nga siyensiya wala magsalikway sa nagkasumpaking ebidensiya aron iduso ang gipiling mga ideya. Ni ang tanang siyentipiko nagtuo sa ebolusyon.
Ang magasing Veja sa Brazil misukna kang Carlo Rubbia, ang mananaog sa Premyong Nobel sa Pisika, “Nagtuo ka ba sa Diyos?” Bisan pag wala mag-ila sa Diyos ingong persona, siya miangkon: “Kon labi pa nimong mapanid-an ang kinaiyahan, mas masabtan nimo nga adunay katingalahang pag-organisar sa tanang butang. Dako gayod kini nga intelihensiya nga pinaagi sa pagpaniid lamang sa kinaiyanhong mga hitabo ako nakapanghinapos nga ang usa ka Maglalalang naglungtad.”
Ang iyang gisulti nagpahinumdom kanato sa mga pulong ni apostol Pablo bahin sa Diyos: “Ang iyang dili-makita nga mga hiyas tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo, bisan gani ang iyang dayong gahom ug pagka-Diyos.”—Roma 1:20.