Gikan sa Among mga Magbabasa

Mga Estrok Ang mga seryeng “Pagsagubang sa Estrok” (Pebrero 8, 1998) maoy tubag sa akong pag-ampo. Ang akong bana ug ako mitambong sa usa ka Kristohanong kombensiyon pipila ka tuig kanhi sa dihang siya naestrok. Samtang misulay siya pagsulat kanakog nota, ang iyang kamot midailos sa papel; ang tibuok nga katunga sa iyang lawas sa tuo naapektohan. Dakog nahimo ang artikulo kanako kay sa akong ikapahayag. Kahibudnganan ang pagkahibalo nga kami wala kalimti ni Jehova.

F. S. H., Tinipong Bansa

Pipila lamang ka oras una pa madawat kining magasina, wala ako molampos sa pagsulay pagsaysay sa akong asawa kon unsay akong gibati, apan wala ako makahimo sa pagpahayag sa akong kaugalingon sumala gayod sa akong gusto tungod sa akong estrok. Katulo ko na mabasa kining magasina. Gibasa usab kini sa akong asawa.

R. Z., Italya

Ang akong amahan, nga matinumanong alagad ni Jehova sa daghang tuig, namatay sa estrok sa miaging tuig. Ang artikulo nagtabang nako sa pagsabot sa tinamdan nga iyang gipakita una pa sa iyang kamatayon. Ang mga saysay labot sa mga kausaban sa emosyon, maingon man kon nganong ang biktima sa estrok tingali malisdan sa pagpakigsulti, nagtabang nako sa pagsabot ug maayo kon unsay naagoman sa akong amahan.

V. C., Tinipong Bansa

Naestrok ako usa ka tuig kanhi ug nakigbisog gihapon ko sa kaluya sa akong wala nga bahin sa lawas. Kining artikuloha makapahanaw sa pipila ka misteryo ug kahadlok nga nalangkit sa estrok. Sayop ang pag-ingon nga mga tigulang lamang ang maestrok. Ako 47 anyos pa lamang sa dihang nahitabo kini kanako.

A. A., Inglaterra

Ang artikulo nagtabang nako pag-ayo sa pagsabot sa akong anak nga babayeng si Lucia, nga nag-antos sa grabeng pagkadaot sa ulo sa usa ka aksidente sa kotse sa dihang siya duha ka bulan pa ang edad. Dili niya ikapahayag ang iyang mga pagbati. Ugaling, ang artikulo nagtabang nako sa pagsabot kon ngano.

N. K., Slovakia

Usa ako ka lisensiyadong nars sa rehabilitasyon ug adunay daghang kasinatian sa pag-atiman sa mga biktima sa estrok. Ang gidayeg nako pag-ayo bahin ning artikuloha mao ang mabination kaayong paagi sa paghubit niini kon unsay giantos sa mga pamilya sa mga biktima sa estrok.

L. C., Tinipong Bansa

Ang akong inahan nag-antos sa kalit lumalabayng atake sa estrok. Gikan sa pisikal nga punto de vista, halos bug-os na siyang naulian. Apan duna siyay dulot nga mga kasakit sa hunahuna. Kusgan siya kaniadto ug masaligon sa kaugalingon, apan karon siya huyang na kaayo. Salamat sa pagpasiugda sa epekto sa hunahuna nga gidala niining sakita.

R. C., Italya

Duha ka tuig kanhi kaduha maestrok ang akong inahan. Ang una nakapawala sa iyang panumdoman, ug ang ikaduha nakaparalisar sa iyang tuo nga bahin sa lawas. Usahay mawad-an akog pailob niya ug makasultig mga butang nga makapaguol niya. Ang inyong artikulo nagdasig nako nga magmasinaboton pa.

R. T. S., Brazil

Kristohanong Panagkadaiya Ang akong tiunay nga pasalamat sa artikulong “Ang Hunahuna sa Bibliya: Ang Kristohanong Panaghiusa ba Nagtugot sa Panagkadaiya?” (Pebrero 8, 1998) Samtang nagdugang ang akong kahibalo kang Jehova, mas nagmalipayon ako nga nasakop sa iyang organisasyon, diin kita makapahimulos sa nagkadaiyang mga personalidad.

I. P., Slovenia

Ako 15 anyos ug regular nga nagabasag Pagmata! Gipabilhan ko pag-ayo kining artikuloha. Ang usa ka seksiyon naghisgot bahin sa Paraiso ug kon mahisama kini sa unsa. Dugay na akong nahibulong kon mahisama sa unsa ang hingpit nga mga tawo ug kon kitang tanan magkaparehas ug panagway ug mga hunahuna. Karon akong nasabtan nga aduna unyay dakong panagkadaiya sa mga tawo ug mga mananap.

J. C., Tinipong Bansa