Gikan sa Among mga Magbabasa

Kosmikong Katalagman? Ako diyes anyos, ug ako nalingaw sa artikulong “Ang Hunahuna sa Bibliya: Ang Usa ba ka Kosmikong Katalagman Molaglag sa Atong Yuta?” (Disyembre 8, 1998) Mitabang kini kanako sa pagkasabot nga walay kosmikong katalagman nga molaglag sa atong planeta tungod kay buot ni Jehova nga kita magkinabuhi sa usa ka paraisong yuta.

J. P., Tinipong Bansa

Walay-Dugo nga Pagdisdis Buot kong pasalamatan kamo sa inyong artikulong “Gikonsiderar Pag-usab sa mga Doktor ang Walay-Dugo nga Pagdisdis.” (Disyembre 8, 1998) Mahinamon kaayo ako sa pagbasa niana, sanglit malamposon kaayo ang ingon niadtong pagtambal kanako sa dihang gipulihan ang tibuok kong bat-ang. Kauban nako sa lawak sa ospital ang usa nga gitambalan sa sama gayod nga pamaagi apan ginamit ang dugo. Ako nakagawas sa ospital nga wala pay usa ka semana. Apan siya kinahanglang magpabilin, sanglit dihay mitunghang mga komplikasyon gumikan sa virus.

N. H., Tinipong Bansa

Hunong sa Pagpanabako! Ang artikulong “Makahimo Ka sa Paghunong—Among Nahimo!” maoy linain alang kanako. (Disyembre 8, 1998) Mao pa lamay akong pagkatapos sa pagtuon sa Bibliya uban sa usa ka tigtabako. Nagtambongan siya sa tanan natong tigom, apan siya adunay usa ka espirituwal nga babag tungod sa iyang pagkagiyan. Ako siyang gihatagan ug ubang mga artikulo bahin sa paghunong sa pagpanabako, apan ako nag-ampo nga kining artikuloha sa kataposan magtabang kaniya sa pagbuntog sa iyang babag.

E. C., Tinipong Bansa

Mga Kemikal ug Panglawas Ako di pa dugayng nagsugod sa kursong kemistriya, ug sa dihang akong nakita ang Disyembre 22, 1998, nga isyu, dihadiha kining nakadani sa akong pagtagad. Sama sa naandan, kamo nahibalo kon unsaon sa pagpresentar sa usa ka komplikadong topiko sa paagi nga ang tanan makasabot niana. Sanglit ang mga hugaw ug kemikal nga mga produkto nag-apektar sa mga tawo latas sa nasodnong mga utlanan, kinahanglang adunay internasyonal nga kasabotan aron masulbad nga permanente ang suliran sa polusyon. Apan ang kahakog ug kadalo sa tawo nagpugong niini nga mahitabo. Maayo na lang, si Jehova nahibalo kon unsaon pagsulbad nga permanente kining problemaha.

C. V., Canada

Pagkawala sa mga Ginikanan Salamat sa pagsulat sa usa ka talagsaong artikulo, nga mao, “Mga Batan-on Nangutana . . . Sa Unsang Paagi Ako Mabuhi nga Wala ang Akong mga Ginikanan?” (Disyembre 22, 1998) Mitabang kini sa pagpasalig kanako sa katakos ni Jehova sa pagpanalipod kanamong mga batan-on kon kami mawad-an sa among mga ginikanan. Buhi pa ang akong mga ginikanan, apan sagad akong maghanduraw kon unsay mahitabo kanako kon sila mamatay. Ang maayong panig-ingnan ni Horacio nakadasig kaayo kanako.

M. J., Trinidad

“Repetitive Strain” Lisod ipahayag kon unsay imong pagbati sa dihang imong makaplagan ang usa ka artikulo nga naghisgot sa usa ka problema nga imong nabatonan. Mao kadto ang kahimtang maylabot sa artikulong “Repetitive Strain Injuries—Kon Unsay Angay Nimong Mahibaloan.” (Disyembre 22, 1998) Aduna ako niining matanga sa sakit dinhi sa akong pulso, ug karon lamang nako maamgohi kon unsay hinungdan niini. Ang tambag kon unsaon pagdumala kining sakita nakatabang ug dako kanako.

S. T., Yugoslavia

Ako nagtrabaho sa usa ka kompaniya nga naggamag himan sa pagpanalipod sa mga trabahante batok sa repetitive strain injury (RSI). Ang RSI nakapukaw sa kamausisahon ug kontrobersiya, apan ang inyong artikulo maayo kaayong pagkasulat. Naghisgot kini sa topiko diha sa dili-mapihigon ug independenteng paagi. Ang among hunta sa mga direktor nakadayeg kaayo nga nag-order kinig mga kopya aron ipadala ngadto sa among mga hawas sa tibuok Brazil.

J. P. M., Brazil

Ako usa ka asawa nga may trabaho sa gawas sa balay nga naglangkit sa pagkarga ug bug-at nga kahoyng mga kahon. Sa sinugdan pa lang, nadaot ang akong likod, mga bukton, ug mga pulso. Mga duha na ka tuig ang milabay, akong gisugdan ang pagtuyhad sa akong kaunoran sulod sa napulo ka minuto sa dili pa mobangon. Abi nakog kadto nga mga ehersisyo makatabang, apan kining artikuloha naghatag kanakog labaw pang makatabang nga mga paagi sa pagsagubang. Sa umaabot, akong hatagan ang akong mga kaubanan sa trabaho ug kopya niining magasina.

K. Y., Hapon