“Kining Maong Pagmata! Gisulat Ilabina Alang Kanamo”!
ANG Septiyembre 22, 1998, nga isyu sa Pagmata! nagpresentar sa seryeng panghapin nga “Sakit nga Alzheimer—Pagpaalibyo sa Sakit.” Daghang magbabasa nagpahayag sa ilang lalom nga pagpabili sa makatabang nga mga sugyot nga anaa niini nga serye. Ang mosunod maoy pipila sa ilang mga komento.
“Sukad nga ang kahimtang sa akong bana gidayagnos ingong sakit nga Alzheimer kapin sa duha ka tuig kanhi, daghan ako ug nabasa bahin sa maong ulohan. Ang Pagmata! ang adunay kinamaayohang materyal. Kini sa mubo nagsumaryo sa tanan nga akong nabasa. Among gipaambit ang mga kopya sa mga doktor ug sa uban diha sa ospital diin ang akong bana maoy usa ka pasyente.”—M. L., Tinipong Bansa.
“Si Mama namatay duha ka tuig ang milabay, sa edad nga 83. Siya maoy matinumanong Saksi sukad sa 1937. Ang makita nga ang iyang panumdoman ug lawas nagakadaot maoy masakit nga kasinatian. Salamat sa maong mapuslanon ug makapahupay nga impormasyon. Kining mga artikuloha hinungdanon kaayo sa pagtabang sa mga naapektohan ug sa ilang mga tig-atiman sa pagsagubang sa makapaguol ug makalilisang nga situwasyon.”—D. C., Tinipong Bansa.
“Ang ilang doktor ug ubang mga propesyonal morag mibati nga ang akong inahan ug ang iyang igsoong babaye adunay sakit nga Alzheimer, busa akong gipadala ang magasin sa akong uyoan. Siya mibalos: ‘Ginamit ang kompiyuter, akong nakaplagan ang daghan kaayong impormasyon bahin sa AD [Alzheimer’s disease]—hilabihan ka daghan nga wala akoy panahon sa pagsusi nianang tanan. Akong gibasa ang mga artikulo sa Pagmata! bahin sa AD nga imong gipadala, ug ako sa pagkamatinud-anon makaingon nga kini nasudlan sa hustong gidaghanon lamang sa impormasyon, nga gisulat usab sa paaging masabtan! Mahimo bang akong ipaambit kini sa uban diha sa pamilya human nga akong mabasa kini pag-usab?’”—B. E., Canada.
“Ako maoy estudyante sa pagkanars nga anaa sa ikaupat na nga tuig, ug buot ko kamong dayegon sa inyong serye bahin sa AD. Kini nagtanyag ug daghang nunot-sa-panahong mga sugyot nga mihaom sa among Gerontology-Alzheimer nga mga pakigpulong. Ako nagplano nga gamiton kining mga artikuloha sa dihang mag-atiman sa akong mga pasyente ug sa dihang magtabang sa ilang mga tig-atiman.”—G. L., Tinipong Bansa.
“Ang akong mama namatay niadtong Agosto 18, 1998. Nianang mao gihapong semanaha akong nadawat kini nga magasin. Ang AD maoy usa ka masakit kaayo nga balatian, ilabina sa kataposan—dili lamang sa mga biktima kondili alang usab sa ilang mga minahal. Ang mga artikulo tinong nagpamatuod nga nakita ni Jehova kon unsay among naagoman. Among gipabilhan pag-ayo ang iyang mahigugmaong pag-atiman!”—M. S., Tinipong Bansa.
“Buot kong pasalamatan kamo sa kinasingkasing tungod niini nga mga artikulo. Ako nagtuon sa pagtabang sa mga tawo nga naapektahan niini nga sakit. Ang impormasyon mapuslanon gayod alang kanako.”—T. N., Italya.
“Ang akong apohang babaye, nga nag-antos sa dementia, mipuyo uban kanako sulod sa miaging tuig. Migrabe ang iyang sakit ug nahimong masuk-anon ug hilabihan ka mayugtanon kanako. Gibati ko nga morag napakyas ako sa pagtuman sa gidahom sa akong pamilya ug ni Jehova. Human sa pagbasa sa inyong mga artikulo, akong naila ang akong mga sayop ug nasabtan kon unsaon nako pag-usab ang akong pagdumala sa iyang kahimtang. Akong nasabtan karon kon unsa ka hinungdanon nga ipakita ang padayong konsiderasyon sa iyang mga limitasyon.”—S. S., Tinipong Bansa.
“Ang akong bana ug ako maoy mga payunir, bug-os-panahong mga ebanghelisador, sulod sa daghang tuig. Masakit alang kanamo nga mohunong sa pagpayunir, apan kinahanglan kaming motabang sa pag-atiman sa akong inahan. Akong nabasa ang ubang mga libro ug mga artikulo bahin sa ulohang sakit nga Alzheimer, apan ang akong kasingkasing dulot nga natandog sa dihang ang makatabang nga impormasyon midangat gikan sa organisasyon ni Jehova. Kanunay kong ibutang kining mga artikuloha sa duol aron akong mabasa kini sa makadaghan.”—P. M., Tinipong Bansa.
“Ako 12 anyos. Ang mga artikulo bahin sa sakit nga Alzheimer nagpainteres kanako tungod kay ang akong apohan nga lalaki sa tuhod nag-antos niining sakita ug mao man usab ang usa ka minahal nga Kristohanong tigulang nga babaye nga akong kaila. Kining mga artikuloha mitabang kanako sa pagkasabot kon unsay akong mahimo, ug kini naghatag kanakog mas maayong pagsabot niini nga sakit. Pagkamalipayon nako unya kon ang adlaw moabot sa dihang ‘walay molupyo nga moingon: “Ako masakiton”’!” (Isaias 33:24)—P. W., Tinipong Bansa.
“Ang akong 15-anyos nga anak nga babaye ug ako dihadiha naghisgot sa pangunang mga puntos niini nga isyu. Ang mga rekomendasyon sa pagbaton ug mainitong hitsura, pagsulti diha sa makahupay nga tingog, sa pagpanalipod sa dignidad sa nag-antos pinaagi sa dili pagtul-id sa mga sayop, ug uban pa, ilabinang mapuslanon. Ako nalipay nga iapod-apod kini nga magasin ngadto sa mga nagtrabaho sa day-care.”—Y. K., Hapon.
“Dili ikapahayag sa mga pulong kon unsa ka mapasalamaton ang among pamilya tungod sa inyong talagsaong mga artikulo. Sa dihang ang akong ugangang-babaye dili na makaatiman sa iyang kaugalingon, among gidala siya sa Tinipong Bansa aron mopuyo uban kanamo. Siya maoy 80 anyos, ug ang kausaban nakapaguol kaniya. Dili kami makasabot kon nganong ang iyang kahimtang migrabe hangtod nga among nabasa ang mga artikulo sa Pagmata! Ang detalyadong pagpatin-aw niini nga sakit ug kon unsaon pagdumala sa pasyente nagtubag sa daghang pangutana nga bisan ang iyang mga doktor wala makatubag. Palihog dawata ang among mga pasalamat, ug hinaot nga si Jehova magpadayon sa pagpanalangin sa inyong mga paningkamot nga tabangan kaming tanan.”—O. S., Tinipong Bansa.
“Buot kong pahalipayan kamo bahin niining detalyadong mga artikulo. Kini midangat sa panahon nga gikinahanglan namong atimanon ang among apohang babaye. Ang among pamilya mibati nga kining maong Pagmata! gisulat ilabina alang kanamo tungod kay kini naghatag kanamog kahupayan ug tabang sa dihang among gikinahanglan kini. Salamat sa mga artikulo nga sama niini. Kini kanunayng modangat sa hustong panahon.”—R. N., Zambia.