Mga Patuotuo—Nganong Peligroso Kaayo?

MAKADAOT ba kanimo ang mga patuotuo? Ang uban tingali dili motuo niining hunahunaa o dili magtagad sa kapeligrohan. Bisan pa, diha sa iyang librong Believing in Magic—The Psychology of Superstition, si Propesor Stuart A. Vyse nagpasidaan: “Ang patuotuo makakunhod sa kalidad sa kinabuhi kon ang usa mogugol ug dagkong kantidad nga salapi diha sa mga espiritista, mananag-an, tighubad sa kahulogan sa numero, o sa mga tigbasag Tarot kard, o kon ang mga rituwal sa patuotuo sa usa nakadugang sa problema sa pagsugal.” Ang pagtugot sa patuotuo nga momando sa atong mga kinabuhi mahimong moresulta ug mas grabeng mga sangpotanan.

Sama sa ato nang nakita, daghang patuotuo nagsilbing panghupay sa mga kahadlok bahin sa umaabot. Apan, hinungdanong makaila sa kalainan tali sa patuotuo ug sa kasaligang kahibalo bahin sa kon unsay anaa sa atong unahan. Tagda ang usa ka pananglitan.

Usa ka Sugilanon nga Makahatag ug Kalamdagan

Sa 1503, human sa daghang bulan sa pagsuhid sa kadaplinan sa baybay sa Sentral Amerika, napadunggo ni Christopher Columbus ang iyang kataposang duha ka barko nianang gitawag karon nga isla sa Jamaica. Sa sinugdan, ang mga islahanon kinabubut-ong nagpaambit sa pagkaon sa mga tigsuhid nga midunggo. Apan, sa kadugayan, tungod sa dili maayong binuhatan sa mga sakayanon, ang mga islahanon mihunong sa paghatag kanila ug pagkaon. Ang kahimtang malisod, sanglit dugaydugay pa nga may moabot nga laing barko sa pagluwas kanila.

Sumala sa estorya, si Columbus nagsusi sa iyang almanaki ug nakahibalo nga may mahitabong bug-os nga eklipse sa bulan sa Pebrero 29, 1504. Gipahimudsan ang pagkamatuotuohon sa mga islahanon, iyang gipasidan-an sila nga ang kangitngit motabon sa bulan gawas kon ilang hatagan ang iyang tripulante ug pagkaon. Wala balebaleha sa mga islahanon ang pasidaan—hangtod nga misugod ang eklipse! Dayon, “uban ang kusog nga paghagulhol ug pagdanguyngoy,” sila “nagdagan gikan sa tanang direksiyon ngadto sa mga barko nga gipuno sa pagkaon.” Ang mga tigsuhid natagan-an ug pagkaon sa tanang panahon sa ilang pag-estar.

Alang sa mga islahanon, si Columbus naghimo ug gamhanang madyik. Apan ang ilang pangagpas nagsumikad sa yanong patuotuo. Sa pagkatinuod, ang “tagna” gipasukad sa walay-kausaban nga paglihok sa yuta, sa bulan, ug sa adlaw. Ang mga astronomo kasaligang makatag-an sa ingon niini nga mga hitabo sama sa mga eklipse nga una pa kaayo, ug kining mga impormasyona makita diha sa mga almanaki. Dugang pa, ang eksaktong mga paglihok sa mga butang sa langit naghatag sa mga astronomo ug kahibalo sa eksaktong posisyon niini sa bisan unsang panahon. Busa, sa dihang ipahibalo sa imong mantalaan ang panahon sa pagsubang o pagsalop sa adlaw, imong dawaton kana ingong tinuod.

Ang Dakong Maglalalang sa langitnong mga butang, sa ingon, mao ang tuboran sa impormasyon nga napatik may kalabotan sa panahon sa pagtungha sa mga eklipse, mga pagsubang, ug pagsalop sa adlaw. Apan ang pagpanag-an sa mga mananag-an, mga espiritista, mga tigtan-aw sa bolang kristal, ug mga magbabasa sa tarot kard maoy gikan sa laing tuboran, usa nga kabatok sa Labing Gamhanang Diyos. Tagda kon unsay among ipasabot.

Usa ka Peligrosong Tuboran

Diha sa Buhat 16:16-19, ang balaang rekord nagtaho nga “usa ka sulugoong babaye” sa karaang siyudad sa Filipos nakahatag ug dakong kita sa iyang mga agalon tungod sa iyang “pamaagi sa pagpanag-an.” Apan, ang asoy yanong nag-ingon nga ang tuboran sa iyang pagpanag-an, dili gikan sa labing gamhanang Maglalalang, kondili sa “usa ka demonyo sa pagpanag-an.” Busa, sa dihang gipagawas ni apostol Pablo ang demonyo, ang sulugoong batang babaye nawad-an sa iyang mga gahom sa pagpanag-an.

Sa dihang atong masabtan nga ang maong mga pagpanag-an nagagikan sa demonyo, atong makita kon nganong ang Kasugoan sa Diyos sa Israel nag-ingon: “Kinahanglang walay makita diha kaninyo . . . nga bisan kinsa nga diwatahan, salamangkero o bisan kinsa nga nagapangitag mga tilimad-on o usa ka barangan, o usa nga tigpangdaot o bisan kinsa nga nagakonsulta ug espiritista o propesyonal nga mga mananag-an sa mga hitabo . . . Kay ang bisan kinsa nga nagahimo niining mga butanga dulumtanan alang kang Jehova.” (Deuteronomio 18:10-12) Sa pagkatinuod, ang Kasugoan naghimo sa maong mga batasan nga usa ka dakong sala.—Levitico 19:31; 20:6.

Tingali makurat kang mahibalo nga daotang mga espiritu ang anaa sa likod sa daghang daw dili-makadaot nga mga batasan sa patuotuo. Bisan pa, ang Bibliya nag-ingon nga si Satanas ‘naghimo sa iyang kaugalingon nga usa ka manulonda sa kahayag.’ (2 Corinto 11:14) Si Satanas ug ang mga demonyo nga ilalom sa iyang gahom makahimo sa peligrosong mga batasan nga daw dili-makadaot, gani mapuslanon pa. Usahay, sila magmugna ug mga tilimad-on ug ipahinabo kini, nga naglimbong sa mga tumatan-aw sa paghunahuna nga ang maong mga tilimad-on maoy gikan sa Diyos. (Itandi ang Mateo 7:21-23; 2 Tesalonica 2:9-12.) Kini nagpakita kon nganong ang ubang mga panagna nga ipanagna niadtong nangangkong may linaing mga gahom usahay matinuod.

Sa pagkatinuod, daghan, kondili man kadaghanan, nga nangangkong may linaing mga gahom maoy mga impostor, yanong mga mangingilad, nga naningkamot nga makapangilad sa daling matonto. Apan mga impostor man o dili, silang tanan epektibong gigamit ni Satanas aron mobatok ang mga tawo kang Jehova, nga nagabuta kanila sa “mahimayaong maayong balita.”—2 Corinto 4:3, 4.

“Suwerte” nga mga Anting-anting ug Idolatriya

Ug komosta ang “suwerte” nga mga anting-anting ug mga patuotuong mga batasan nga gigamit sa mga tawo aron makabaton ug pagbating dunay kasegurohan ug gahom batok sa sulagmang mga hitabo sa kinabuhi? Kini mohatag ug ubay-ubayng malalangong mga kapeligrohan. Una, ang tawong matuotuohon sa ingon nagtugyan sa paggahom sa iyang kinabuhi ngadto sa dili-makitang mga puwersa. Iyang biyaan ang maayong kabuot ug katarongan, nga magpadala hinuon sa walay pasikaranang mga kahadlok.

Usa ka magsusulat naghisgot ug laing kinaiyanhong kapeligrohan. Siya nag-ingon: “Kon ang tawo magsalig sa suwerte nga anting-ating alang sa proteksiyon ug ang anting-anting dili moepekto, kanang tawhana tingali mokiling sa pagbasol sa [iyang] dimalas ngadto sa mga lihok sa uban, imbes modawat sa tulubagon mismo.” (Itandi ang Galacia 6:7.) Makaiikag, ang magsusulat nga si Ralph Waldo Emerson miingon sa miagi: “Ang mga tawong mubog paminsar motuo ug maayong suwerte . . . Ang mga tawong hait ug kaisipan motuo sa hinungdan ug epekto.”

Ang “hinungdan ug epekto” nga naglihok diha sa atong kinabuhi sagad kaamgid ra sa sulagmang mga hitabo—ang “panahon ug dili-makitang mga hitabo” nga mahinabo kanatong tanan. (Ecclesiastes 9:11) Ang sulagmang mga hitabo dili maoy mga resulta sumala sa kagustohan sa “dimalas.” Ang mga Kristohanon nahibalo nga ang mga patuotuo nga mga batasan ug mga anting-anting walay epekto sa resulta sa sulagmang mga hitabo. Kon kini mahitabo, kita mapahinumdoman sa Biblikanhong kamatuoran: “Wala kamo mahibalo kon maunsa ang inyong kinabuhi ugma. Kay kamo usa ka gabon nga nagapakita sa makadiyot ug unya mawagtang ra.”—Santiago 4:14.

Dugang pa, ang tinuod nga mga Kristohanon nahibalo nga kasagarang hatagan ug mahimayaong pagtagad ang mga bantigi maingon man ang patuotuong mga rituwal o mga batasan. Busa, ang mga Kristohanon maglantaw niining tanan ingong mga matang sa idolatriya, nga klarong gisaway sa Pulong sa Diyos.—Exodo 20:4, 5; 1 Juan 5:21.

Kon sa Unsang Paagi Atong Mahibaloan ang Umaabot

Kini wala magpasabot nga ang mga Kristohanon dili magtagad bahin sa umaabot. Sa kasukwahi, ang maayong pangatarongan tin-awng nag-ingon nga adunay tinuod nga bili ang pagkahibalo kon unsa ang anaa sa unahan. Kon kita mahibalong daan kon unsay mahitabo, kita makahimog hustong lihok, nga makahatag ug kaayohan sa atong kaugalingon ug sa atong mga minahal.

Apan, adunay tinuod nga panginahanglan sa pagpangita niining impormasyona gikan sa hustong tuboran. Si manalagnang Isaias nagpasidaan: “Ang mga tawo mohangyo kaninyo sa pagpakisayod sa mga mananag-an ug mga espiritista . . . Tubaga ninyo sila, ‘Pamati kon unsay gitudlo kaninyo sa Ginoo! Ayaw pamati sa mga espiritista—ang ilang isulti kaninyo dili makahatag kaninyo ug kaayohan.’”—Isaias 8:19, 20, Today’s English Version.

Ang hustong tuboran sa kasaligang impormasyon bahin sa umaabot mao ang Awtor sa Bibliya. (2 Pedro 1:19-21) Kining dinasig nga basahon nasudlan ug daghang pamatuod nga ang mga tagna sa labing makagagahom nga Diyos, si Jehova, kasaligan—sama ka kasaligan, sa pagkatinuod, sa mga paglihok sa langitnong mga butang nga “gitagna” diha sa daghang almanaki. Sa pag-ilustrar sa detalyadong pagkatukma sa tagna sa Bibliya, tagda kini nga pananglitan. Ingnon ta nga usa ka tawong prominente karon nagpadayag ug nagtagnag mga hitabo nga 200 ka tuig nga abante, alang sa tuig 2199. Ang iyang panagna aduna niining mga detalyeha:

◻ Usa ka dakong gubat militar mobuto taliwala sa mga nasod nga dili pa magkaatbang nga mga gahom sa kalibotan, ug ang resulta magbag-o sa kasaysayan.

◻ Ang estratehiya nga gamiton naglangkit ug dako kaayong kahanas sa inhenyeriya nga mag-usab sa agianan sa usa ka dakong suba.

◻ Ang ngalan sa magdadaog ginganlan—daghan nang tuig una pa gani siya matawo.

◻ Ang kataposang dulnganan sa mapildi gihubit, nga nagpaabot sa tagna sa daghan pang kasiglohan ngadto sa umaabot.

Kon kining tanang tagnaa matuman, dili ba magtukmod kini sa mga tawo sa pagpalandong sa ubang mga butang nga gisulti niining tawhana bahin sa umaabot?

Ang among gihisgotan aktuwal nga nahitabo. Sa mga 200 ka tuig sa wala pa mapukan ang Babilonya sa mga Medianhon ug mga Persianhon, si Jehova, pinaagi kang manalagnang Isaias, nagtagna sa mosunod:

◻ Usa ka dakong gubat militar mobuto taliwala sa Medo-Persia ug Babilonya.—Isaias 13:17, 19.

◻ Ang estratehiya nga gamiton naglangkit sa pagpahubas sa kanalkanal nga depensang suba. Dugang pa, ang ganghaan sa kinutaang siyudad pasagdang bukas.—Isaias 44:27–45:2.

◻ Ang magdadaog paganganlag Ciro—gitagna duolan sa 150 ka tuig sa wala pa siya matawo.—Isaias 45:1.

◻ Sa ulahi, ang Babilonya mahimong bug-os nga kalumpagan.—Isaias 13:17-22.

Kining tanang tagnaa nangatuman. Dili ba mapuslanon nga imong palandongon ang ubang mga tagna nga gitagna ni Jehova diha sa iyang sinulat nga Pulong?

Ang Mahimayaong Umaabot nga Gisaad sa Diyos

Unsay gitagna sa Bibliya? Ang Bibliya nagsaad nga diha sa bag-ong kalibotan nga ipatungha sa Diyos, walay usa ang mag-antos tungod sa pagkawalay kapihoan labot sa umaabot. Matikdi ang pasalig sa Diyos niadtong buhi nianang panahona: “Wala na unyay usa nga magpakurog [sa akong katawhan].”—Miqueas 4:4.

Ang Bibliya dugang nagsaad nga ang Diyos ‘magbukhad sa iyang kamot ug magtagbaw sa tinguha sa matag buhing butang.’ (Salmo 145:16) Ang katumanan ba nianang saara layo pa? Dili! Ang Bibliya dugay nang nagtagna nga ang mismong mga kahimtang nga atong makita sa yuta karon naglangkob sa pamatuod nga kita nagkinabuhi na “sa kataposang mga adlaw” sa presenteng daotang sistema sa mga butang.—2 Timoteo 3:1-5.

Sa dili madugay taposon sa mahigugmaong Maglalalang kining daotang mga kahimtang. Iya unyang pahunongon ang tanang gubat, mga tuboran sa tibuok-kalibotan nga pagkawalay kasegurohan ug pag-antos. Dugang pa, ang pagdumot, kahakog, krimen, ug kapintasan mahimo na unyang mga butang sa nangagi sa walay kataposan. Ang Bibliya nagsaad: “Ang mga maaghop magapanunod mismo sa yuta, ug sila makakaplag sa ilang tugob nga kalipay diha sa kadagaya sa pakigdait.”—Salmo 37:10, 11.

Apil sa daghang panalangin nga tagamtamon sa mga tawo niining bag-ong kalibotan mao ang maayong panglawas. Bisan ang kamatayon ug ang mga kauban niini nga kaguol mawala na. Ang Diyos mismo nag-ingon: “Tan-awa! Ginabag-o ko ang tanang butang.”—Pinadayag 21:4, 5.

Nianang panahona wala na unyay tawo nga mailalom sa sulagmang mga hitabo nga magbag-o ug maglaglag sa mga kinabuhi karon. Mawala, usab, ang daotang mga demonyo ug si Satanas, ang tuboran sa matuotuohong mga kahadlok ug daotang kabakakan. Kining kulbahinam nga mga kamatuoran makita diha sa Bibliya.

[Mga hulagway sa panid 8, 9]

Ang mga patuotuo ug espiritistikanhong mga batasan nalambigit pag-ayo

[Credit Line]

Gawas sa babaye sulod sa bolang kristal: Les Wies/Tony Stone Images

[Hulagway sa panid 10]

Ang bag-ong kalibotan sa Diyos wala unyay mga patuotuo