Pagkaikag May Kalabotan sa mga Anghel

“Kitang ‘tanan’ dunay mga anghel nga nagaagak, nagabantay kanato . . . Kon dili nato sila samokon ug ipakita nato ang atong kaugalingon, nga samag mga bata, nga may bug-os nga pagsalig ug gugma ug mapainubsanong pagkamapasalamaton, nan sila magbubo sa ilang mga panalangin kanato nga madagayaon. Sila makigdula uban kanato. Sila magbantay kanato. Sila moayo kanato, mohikap kanato, molipay kanato pinaagi sa dili-makitang mainit nga mga kamot, ug sa kanunay sila maningkamot sa paghatag kanato sa atong gusto.”—Gikan sa librong “Angel Letters.”

IKAW modawat gayod nga kining popular nga kaisipan bahin sa mga anghel madanihon. Sumala sa kaisipan nianang giterminohan sa uban nga “bag-ong espirituwalidad,” ang matag usa kanato giasaynan ug labing menos usa ka anghel, usa ka anghel kansang katungdanan mao ang paglipay ug pagpanalipod kanato gikan sa kadaot. Ang imong anghel ginaingon nga gamhanan ug mahigugmaon. Siya wala magpangayog pagsugot o pagsimba, ug dili gayod maghukom o magbadlong kanimo. Siya anaa kanunay sa imong kiliran, masiboton sa imong kaayohan ug maikagon sa paghatag sa tanan nimong gusto. Daghan karon ang sinserong nagtuo niining mga butanga.

Sa pagkamatuod, ang pagtuo ug mga anghel dili bag-o. Sila nakadula ug dagkong bahin sa relihiyosong mga pagtuo sa mga tawo sukad pa sa kakaraanan. Kini makita diha sa arte. Ang mga larawan sa mga kerubin, usa ka matang sa anghel, nadayandayan sa karaang Hudiyohanong tabernakulo ug templo. Ang mga anghel nadayandayan sa mga simbahan ug mga katedral sa tibuok Kakristiyanohan. Ang mga museyo napuno sa mga dibuho ug mga eskultora sa mga anghel.

Popularidad sa Anghel

Karong bag-o, ang mga anghel nahimong popular kaayo sa ubang kayutaan. Sagad ilarawan sa mga pelikula ang mga anghel ingong mga tawo nga nangamatay na ug mibalik sa yuta aron maghimog maayong mga buhat. Diha sa usa ka pelikula, gitabangan sa mga anghel ang kapildihon nga tem sa besbol. Diha sa lain, usa ka anghel nga magbalantay mitabang sa usa ka tin-edyer nga lalaki sa pagpanimalos sa pagkapatay sa iyang trato. Ang anghel-magtatabang nga tema daghan usab diha sa popular nga programa nga gipasalida sa telebisyon sa T.B.

Ang mga awit bahin sa mga anghel daghan kaayo. Sa dili pa dugayng mga dekada sa Tinipong Bansa, 1 sa popular nga awit sa matag 10 nakahisgot bahin sa anghel. Sa tungatunga sa tuig 1990, dihay kapin sa 120 ka “anghel nga mga tindahan” ang miabli sa Amerika. Kining mga tindahana nagbaligyag anghel nga mga figurine, mga pabitay sa kuwentas, ug papel nga sulatanan—bisan ang mga kilingkiling nga dulaan sa masuso dunay dayandayan nga mga anghel. Dunay mga seminar ug mga sulat-balita nga ginaingong nagtudlo sa mga tawo kon unsaon pagkontak niining maong mga persona sa kalangitan. Ang mga magasin, mga mantalaan, ug mga programa nga nag-interbiyo ug mga tawo nag-asoy ug mga sugilanon bahin sa mga tawo nga nakakita ug mga anghel.

Ginatos ka Libro

Unya anaa pay mga libro nga naghisgot bahin sa mga anghel. Usa ka dakong tindahag libro sa New York City nagtanyag ug kapin sa 500 ka lainlaing mga libro nga naghisgot bahin sa mga anghel, ilabina sa mga anghel nga magbalantay. Kining mga libroha nagsaad sa pagpakita sa ilang mga magbabasa kon unsaon pagkontak sa mga anghel nga magbalantay, pagkahibalo sa ilang mga ngalan, pagpakigsulti kanila, ug pagpangayo kanila ug tabang. Kining mga libroha nasudlan ug daghang sugilanon kon sa unsang paagi ang mga anghel motungha panahon sa panginahanglan, sa pagpadaplin sa mga tawo palayo sa nagsingabot nga mga sakyanan, pag-ayo sa makamatayng mga sakit, paglipay sa mga tawong naguol, ug pagpanalipod sa mga sundalo diha sa panggubatan. Kining maong mga anghel nag-alagad nga “wala magpangayo ug bisan unsang timaan sa paghinulsol, pagbag-o, o pag-unong sa gituohang doktrina.” Apan panagsa ra nga ang maong modernong-adlawng “mga pagkakita” ug anghel nagtukmod sa mga tawo sa paghimog kausaban sa ilang mga kinabuhi. Kadtong nangangkon nga nakakita ug mga anghel kasagaran mibati ug diyutayng kalipay lamang pagkahuman.

Sa panahon sa kalisod ug krisis, kining mga sugilanona daw nahisamag dili-katuohan nga maayong balita. Apan kasaligan ba kini? Hinungdanon ba kini?

[Blurb sa panid 4]

Daghan ang nagtuo nga sila mismo nakakita ug mga anghel