Gikan sa Among mga Magbabasa

Pagluib Salamat sa Abril 22, 1999, nga serye sa Pagmata!, “Sa Dihang Magluib ang Usa ka Kapikas.” Biktima ako sa pagluib. Bisan pag diborsiyada na ako sulod sa tulo ka tuig, ang kaguol sakit pa. Ang mga artikulo nakatabang kanako sa pag-ila nga kinahanglang mohunong na ako sa paghinumdom sa kagahapon, magkinabuhing normal, ug ipadayon ang akong kinabuhi.

V. B., Trinidad

Akong gituki kining ulohana sa nangagi, apan wala kaayo kini ipatin-aw pag-ayo. Sukad sa gutlo nga una kong nadungog ang mensahe sa Bibliya, akong nasabtan nga kini ang kamatuoran. Karon si Jehova naghatag kanakog laing hinungdan sa pagtuo niini.

G. B., Italya

Tungod sa akong diborsiyo giantos ko ang grabeng depresyon, ubos nga pagtamod-sa-kaugalingon, ug way-kataposang listahan sa mga suliran sa lawas. Bisan pag nagpadayon ang pag-antos, ako gilipay pag-ayo sa akong pagtuo sa mga saad ni Jehova ug sa gugma ug emosyonal nga pagpaluyo gikan sa akong kongregasyon!

A. B., Canada

Siyam ka bulan human makigbulag sa akong bana, ako nagsagubang gihapon sa kasakit sa pagpuyong nag-inusara. Unsaon ko ba paglakaw sa dalan nga walay magkupot sa akong kamot? Kinsay molingkod tupad nako panahon sa Kristohanong mga tigom? Kinsay mokuyog kanako ngadto sa doktor? Salamat sa pagpahinumdom kanako nga si Jehova dili magbiya sa inosenteng mga kapikas.

E. S., Brazil

Ang kahon nga “Kinsay Hinungdan?” nakahupay kaayo kanako. Gipili ko ang diborsiyo human sa pagluib sa akong bana. Sama kang Job, may panahong buot kong mamatay. (Job 17:11-13) Apan ang pagpaluyo sa mga membro sa pamilya ug Kristohanong mga igsoong lalaki ug babaye nakapalig-on kanako.

M. O., Argentina

Wala ko lang basaha ang serye—gikahimut-an ko pag-ayo kana! Akong naagian ang diborsiyo, ug kining mga artikuloha naghisgot sa tanang pangutana ug kabalaka nga gipukaw niana. Salamat sa pagtagad kanamo.

E. L., Pransiya

Siyete anyos pa ako sa dihang giabandonar sa akong amahan ang among pamilya. Kadto mapintas nga hitabo. Pila ka tuig sa ulahi, mihangyo si Papa nga dawaton namo siya pag-usab. Ang akong mga magulang lalaki ug ako hugot nga supak sa ideya, apan si Mama misugot. Human sa pagbasa sa inyong mga artikulo, nasugdan ko pagsabot kon nganong gihimo niya kadtong lisod nga desisyon.

A. A., Brazil

Salamat, salamat, salamat sa serye! Makahupay ang pagkahibalo nga ang mga pagbati ug mga emosyon sa usa susama niadtong iya sa uban nga nag-atubang niining kahimtanga mismo. Ugaling, kamo miingon: “Mahimong ikaw wala maghatag ug dakong gugma, pagkamabination, pagdayeg, ug kadungganan sumala sa gikinahanglan sa imong kapikas.” Ang maong pahayag makapasakit kanamo nga naningkamot sa pagpalampos sa usa ka gubot nga kaminyoon. Sa dihang ang usa ka tawo nagahunahunang manapaw, siya mahimong salawayon, ug lisod nga magmabination sa maong tawo.

L. W., Tinipong Bansa

Gikasubo namo nga ang maong mga komento nakahatag ug kasakit kang bisan kinsa sa among mga magbabasa. Apan dili namo tuyo ang pagpasabot nga ang usa ka mananapaw makabasol sa iyang daotang panggawi sa iyang kapikas. Sa kahon nga “Kinsay Hinungdan?” among gipasiugda nga ang mananapaw maoy responsable sa iyang buhat nga daotan, way sapayan sa “mga kadili-hingpit sa inosenteng kapikas.” Ang pahayag nga gihisgotan maoy bahin sa usa ka panaghisgot bahin sa pag-uliay. Amo lamang gipasiugda ang panginahanglan sa maayong komunikasyon, nga nagdasig sa mag-uliay nga mga magtiayon sa pag-ila sa mga suliran sa ilang kaminyoon nga tingali magkinahanglag dinaliang pagtagad. Basin aduna usab ing sekretong pagkayugot nga kinahanglang ipahayag. Kasagaran, ang maong panaghisgot mosangpot sa pag-angkon sa duha ka kapikas sa pipila ka kahuyangan. Kon buot sabton, “kitang tanan mangapandol man sa makadaghan.” (Santiago 3:2) Ug bisan pag ang maong mga panaghisgot sagad nga makapasakit kaayo, kana sila, sumala sa gipahayag sa among artikulo, “usa ka hinungdanong bahin sa proseso sa pagpasig-uli sa pagsalig.”—ED.