Gikan sa Among mga Magbabasa

Mga Apohan Salamat sa inyong mahigugmaong paagi sa pagtagad sa ulohang “Mga Apohan—Ilang mga Kangaya, Ilang mga Kalisdanan.” (Marso 22, 1999) Nag-inusara akong apohan sa duha ka apong lalaki. Tig-abuso sa droga ang ilang inahan kaniadto ug karon. Sama sa gihisgotan sa artikulo, anaa ang kasuko sa mga batang lalaki nga akong sagubangon. Wala koy ideya kon unsa gayoy bation kon biyaan sa duha ka ginikanan. Apan sa miaging tuig lamang ang akong batabatang apong lalaki miingon kanako, “Salamat sa imong pag-atiman kanamo.” Kadtong mga pulonga naghimo sa tanang mga pakigbisog ug mga luha nga takos niana.

D. B., Tinipong Bansa

Tungod sa gugma ug pagkabuotan sa among gipangga nga apohang babaye, ang akong mga igsoon ug ako nagpabiling-buhi sulod sa katuigan sa pag-abandonar ug pag-abuso sa ginikanan. Ang mga kamatuoran sa Bibliya nga iyang gitisok sa among mga kasingkasing naghatag kanamog kusog sa paglahutay. Karon, ang iyang tulo ka apo ug pito ka apo-sa-tuhod maoy dedikadong mga Kristohanon.

B. L. B., Brazil

Ako adunay 17-ka-bulan nga masuso, ug dunay nagpadayong tensiyon tali sa akong ugangang-babaye ug kanako bahin sa pag-atiman kaniya. Nasina kaayo ako nga miabot ako sa puntong dili na gani ako malipay sa Kristohanong mga tigom. Ugaling, kining artikuloha nakatabang nako sa pagsabot nga siya walay daotang tuyo ug nga siya wala magtinguha sa pag-angkon kaniya. Nagpasalamat ako kang Jehova nga akong nadawat kining impormasyona sa dihang ako kining gikinahanglan pag-ayo.

M. Z. C., Mexico

Lima ka Anak Lalaki Akong nakaplagan ang artikulong “Nagpasalamat Ako Kang Jehova Tungod sa Akong Lima ka Anak Lalaki” (Marso 22, 1999) nga makapaikag, sanglit dunay daghang kaamgiran tali kang Helen Saulsbery ug sa akong inahan. Silang duha nabawtismohan sa samang tuig. Sama kang Helen, ang akong inahan nagpabilin sa balay ug nag-atiman kanamo sa dihang ang among pamilya naglisod sa panalapi—ang kompaniya sa akong amahan nahapay. Nag-alagad usab siya nga payunir, usa ka bug-os panahong tig-ebanghelyo, ug kanunayng nagsugilon kanamo ug makapadasig nga mga kasinatian gikan sa kanataran. Naghimo kini sa payunir nga pag-alagad nga makapadani kaayo kanako. Karon nga ako aduna nay duha ka anak babaye, makasabot ako kon unsa ka dakong paningkamot ang gihimo sa akong inahan alang kanamo.

M. S., Hapon

Usa ka espesyal nga pasalamat tungod sa artikulo. Ingong usa ka amahan, naningkamot ako sa pagsunod sa mga tambag sa Bibliya, apan kasagarang mibati akong kulang ang akong mahimo. Ang kasinatian sa pamilyang Saulsbery nagpalig-on kanako sa paglahutay.

R. M. R., Brazil

Pagkagustog mga Butang Ako maoy 12 anyos nga batang babaye. Buot ko kamong pasalamatan sa artikulong “Mga Batan-on Nangutana . . . Nganong Dili Nako Mabatonan ang mga Butang nga Gusto Nako?” (Marso 22, 1999) Dunay mga butang nga gusto nako—sama sa bisikleta ug sista. Apan ang akong amahan dili makaarang sa paghatag niini kanako. Nakapahigawad kini kanako. Bisan pa niana, ang inyong artikulo nakadasig gayod kanako. Salamat sa pagpatik niining amahanong tambag.

C. U., Nigeria

Kaunoran Human sa akong pag-ehersisyo niadtong buntaga, milingkod ako aron sa pagbasa sa artikulong “Kaunoran—Mga Obra-Maestra sa Disenyo.” (Abril 8, 1999) Nagsugod ako sa pagpamalandong bahin sa kaunoran sa akong mata nga nagalihoklihok samtang nagbasa ako sa kada panid, ang kaunoran sa akong bukton nga nagpikopiko ug nagrelaks samtang naghigop ako sa akong kape, ang kaunoran sa akong bitiis nga naglihoklihok samtang ako magbalhinbalhin ug posisyon sa akong lingkoranan. Waw! Pagkakahibulongang disenyo!

N. T., Belize

Ang atong kaunoran nagbutyag ug gamayng bahin lamang sa dako kaayong kaalam ug intelihensiya sa atong Dakong Maglalalang, si Jehova nga Diyos. Ang pagbasa bahin sa tawhanong lawas kanunayng nakapahibulong kanako. Apan kini ang unang higayon nga ako nakabasag ingon nianang artikuloha nga maayo kaayo ang pagkasulat ug sayong sabton.

P. J. O. S., Brazil