Maayong Panglawas Alang sa Tanan—Makab-ot ba nga Tumong?
NAGTINGUHA ka ba nga ikaw ug ang imong pamilya makatagamtam ug mas maayong panglawas? Siyempre. Apan bisan tuod ang kadaghanan kanato nag-antos lamang tingali ug popanagsang ginagmay nga mga sakitsakit, alang sa milyonmilyong tawo, ang kaluyahon maoy masakit, tibuok-kinabuhing kauban.
Bisan pa niana, ginahimo ang dagkong mga paningkamot aron mamenosan ang pagtakboy sa sakit ug balatian. Tagda ang World Health Organization (WHO), usa ka ahensiya sa Hiniusang Kanasoran. Sa usa ka komperensiya nga gipaluyohan sa WHO sa 1978, ang mga delegado gikan sa 134 ka nasod ug 67 ka organisasyon sa HK nagkauyon nga ang panglawas dili lamang kagawasan gikan sa sakit o balatian. Ang panglawas, matod nila, maoy “kahimtang sa bug-os nga pisikal, mental ug sosyal nga kaayohan.” Dayon ang mga delegado mihimog maisogong lakang sa pagdeklarar sa panglawas ingong “sukaranang katungod sa tawo”! Busa gihimong tumong sa WHO nga kab-oton ang “usa ka dalawatong sukod sa panglawas alang sa tanang tawo sa kalibotan.”
Makapalipay ang maong tumong, maayo pa gani. Apan may purohan ba nga makab-ot gayod kini? Sa tanang natad sa paningkamot sa tawo, ang medisina nahimo gayong usa sa labing sinaligan ug dinayeg. Sumala sa Britanikong mantalaan nga The European, ang mga tawo sa mga nasod sa Uropa ug Amerika naanad na sa “naandang medikal nga ideya bahin sa dihadihang tambal: usa ka pildoras nga moayo sa usa ka sakit.” Sa ato pa, alang sa matag balatian, dahomon nato nga ang natad sa medisina mohatag ug yano ug tukmang tambal. Makatuman ba gayod ang medikal nga propesyon sa ingon niana ka taas nga panahom?