Tabang sa Paghimog Maalamong mga Desisyon

MIHIMO si Alice ug dili maayong desisyon nga miresultag kadaot. “Gibulag ko ang akong kaugalingon gikan kang Jehova ug sa iyang organisasyon,” siya miadmiter. Bisan ug mibalik siya sa kataposan, mikabat kinig 13 ka tuig sa paghimo niini​—“makasubong mga tuig” nga maoy pagtawag niya niana.

Kinahanglang dili ipakamenos sa Kristohanon ang kapeligrohan sa paghimog dili-maayong mga desisyon mahitungod sa iyang pag-alagad sa Diyos. Dili buot ingnon nga ang sayop nga mga desisyon gituyo gayod sa pagbuhat tapos sa pagtimbangtimbang sa hinungdanong mga kamatuoran. Usahay mahimo sila tungod sa kinaiyanhong mga reaksiyon. Dihang molampos ang emosyon sa pagpahanap sa isyu ug ang dili-hingpit nga kasingkasing moimpluwensiya sa katakos sa paghunahuna, moresulta ang tanang matang sa kadaot ug kasub-anan.

Sa pagkatinuod, “ang kasingkasing mabudhion labaw sa tanang butang.” (Jeremias 17:9) Apan, ang Bibliya, nagpahayag kanato kon unsaon sa pagpanalipod sa atong kaugalingon. “Dihang mosulod ang kaalam sa imong kasingkasing,” kini nag-ingon, “ang kahibalo mopanalipod kanimo.” (Proverbio 2:10, 11) Apan sa unsang paagi makakuha kitag kaalam nga mosulod sa atong kasingkasing?

Pagtuon Gikan sa Nangagi

Sulayi kini. Ibutang ang imong kaugalingon sa lugar sa unang mga alagad sa Diyos nga nakaatubang ug masulayong mga kahimtang sama sa imoha. Ingnon ta, pananglitan, nga ang kahimtang sulod sa lokal nga Kristohanong kongregasyon nakapabalaka kanimo. Pagpalandong ug samang kahimtang nga gihisgotan diha sa Bibliya.

Unsay ikasulti bahin sa unang-siglong Kristohanong kongregasyon sa Corinto? Handurawa nga sakop ka sa kongregasyon sa Corinto. Nahimo kang Kristohanon sulod na sa duha o tulo ka tuig. Pagkadako sa kalipay nga nakadangat sa kahibalo sa kamatuoran sa panahon sa 18 ka bulan nga pagpuyo ni Pablo didto! Apan karon, dili na maayo ang kahimtang.

Ang tendensiya sa pagpormag mga grupo o mga pundokpundok makapabahin sa kongregasyon, mameligro ang kalinaw niini. (1 Corinto 1:10, 11) Ang pagpalabay sa imoral nga batasan nagapameligro sa espiritu niini. (1 Corinto 5:1-5) Ang pag-akusahay sa mga kabingkilan taliwala sa mga sakop sa kongregasyon atubangan sa mga hukmanan sa kalibotan nagadaot sa maayong dungog niini.​—1 Corinto 6:1-8.

Naghanduraw gihapon sa imong kaugalingon nga anaa sa karaang Corinto, nabalaka ka nga ang ubang sakop sa kongregasyon kanunayng nag-away sa gagmayng mga butang. (Itandi sa 1 Corinto 8:1-13.) Nahasol ka sa kabingkilan, kasina, kasuko, ug kagubot nga imong nakita. (2 Corinto 12:20) Tinuod, nasubo ka sa pipila ka mapahitas-on nga nagpahimo sa Kristohanong pagkinabuhi nga malisod. (1 Corinto 4:6-8) Naguol kang nakadungog nga ang uban nagduhaduha sa baroganan ug awtoridad ni apostol Pablo, nga nagpatunghag dili-makataronganong mga akusasyon, ug gitamay siya nga dili larinong mamumulong. (2 Corinto 10:10; 12:16) Nabalaka ka niadtong bukas ra kaayong nagpadako sa ilang personal nga mga opinyon ug nagpahuyang sa pagtuo sa kongregasyon sa pangunang doktrina.​—1 Corinto 15:12.

Pag-atubang ug Desisyon

‘Dili gayod kini mahimo,’ tingali manghupaw ka. ‘Nganong dili man makatul-id ang mga ansiano niining mga butanga? May dako gayod kining deperensiya.’

Biyaan ba nimo ang kongregasyon sa Corinto, mohukom nga mas maayo pang moalagad ka kang Jehova sa laing dapit? O tingali modesider ka nga labing maayong moundang na lang sa pagpakig-uban sa isigka-Kristohanon? Tugotan mo ba kining mga problemaha sa pagpalong sa imong kalipay ug pagsalig nga si Jehova nga Diyos ug si Jesu-Kristo mao ang nagadumala sa mga butang? Ugmaron ba nimo ang hinawayon, bagolbolang espiritu, nga mopaduhaduha kanimo sa mga motibo sa kaubang mga Kristohanon? Moundang ka ba sa buluhatong pagsangyaw, mangatarongan nga walay kapuslanan ang pag-agak sa mga interesado sa ingon niining matanga sa kongregasyon?

Ang paglantaw sa kahimtang nga walay pagpinig sumala sa panglantaw karon, imong makita nga dali ang pag-ingon nga ang imong desisyon mao ang pagpabiling maunongon sa kongregasyon sa Diyos, bisan pa sa mga dili-kahingpitan niini. Apan kon atubangon ug samang mga kahimtang karon, makahupot ka bag matin-awng hunahuna ug malinawong kasingkasing? Mohimo ka bag desisyon karon sumala sa imong hunahuna nga maoy imong himoong desisyon kon nabuhi ka pa niadto?

Pagpahimulos Gikan sa Maalamong Tambag

Ang mga Kristohanon sa Corinto nga mihimog maalamong desisyon mao kadtong nagpibiling suod sa kongregasyon. Sama ang ilang gibati ni Pedro sa nangaging mga katuigan. Dihang ang ubang mga disipulo miundang sa pagpakig-uban ni Jesus, si Pedro miingon: “Ginoo, kang kinsa man kami moadto? Ikaw mao ang may mga pulong mahitungod sa kinabuhing dayon; ug kami nagatuo ug among nasinati nga ikaw mao ang Balaang Usa sa Diyos.” (Juan 6:68, 69) Sa matin-aw, pinaagi lamang sa pagpabiling suod sa organisasyon sa Diyos nga kita makapahimulos sa mga tambag gikan niini.

Diha sa bag-ong mga kongregasyon, sama niadtong sa Corinto, dili tagsaon nga tawhanong mga pagkadili-hingpit ang hinungdan sa problema nga nagkinahanglan ug malig-ong tambag. Apan sa naghatag ug tambag sa mga Kristohanon sa Corinto, nakahinumdom si Pablo nga ang kadaghanan kanila sa gihapon “mga hinugugma.” (1 Corinto 10:14; 2 Corinto 7:1; 12:19) Wala siya makalimot nga gitanyag ni Jehova ang dili-takos nga kalulot ug kapasayloan kanila nga misanong sa Iyang pagtultol.​—Salmo 130:3, 4.

Siyempre, kay nagadani man ang Kristohanong kongregasyon sa tanang matang sa mga tawo, ang uban dugaydugayng mosanong niini nga pagtultol kay sa uban. Tinuod kini tungod sa nagkalainlaing mga katarongan. Ang ubang mga kausaban mas malisod himoon kay sa uban. Lain pa, ang matag indibiduwal lahi sa pisikal ug mental nga katakos, palibot, kagikan, ug mga sirkumstansiya. Busa pagkamaalamong maglikay nga mahimong sobra ka hinawayon ug sa paghinumdom nga ang “gugma nagatabon sa kapid-an ka mga sala”! (1 Pedro 4:8) Gawas pa, kon andam si Jehova ug ang iyang Anak sa pag-antos sa pagkadili-hingpit ug pagkadili-hamtong sa ilang kongregasyon, dili ba angayng magpakita kita ug samang espiritu?​—1 Corinto 13:4-8; Efeso 4:1, 2.

Kon sakop ka pa sa kongregasyon sa karaang Corinto, ang pagpaminaw sa mahigugmaon ug malig-ong tambag ni Pablo mopahinumdom kanimo nga si Kristo, ingong ulo sa Kristohanong kongregasyon, maikagon kaayo sa kaayohan niini. (Mateo 28:20) Kadto angay makalig-on sa imong pagsalig sa saad ni Jesus sa paghimo sa iyang mga sumusunod nga nahiusa samtang ginasunod nila ang tabang nga gitagana pinaagi sa “matinumanon ug maalamong ulipon.” (Mateo 24:45-47; Efeso 4:11-16) Oo, ang mga pulong ni Pablo makatabang kanimo sa paghupot sa kalipay ug kalig-on bisan ilalom sa masulayong mga kahimtang. Masaligon kang hatagan ka sa Diyos ug kusog sa pagsagubang sa bisan unsang kalisdanan nga tingali temporaryo niyang itugot.

Dili buot ingnon nga walay himoong lakang ang Kristohanon kon motungha ang dili maayong kahimtang sa kongregasyon. Balik sa Corinto, ang hamtong nga mga lalaki sama kang Stepanas, Fortunatus, Achaicus, ug ang uban gikan sa panimalay ni Cloe, milihok. Tataw nga ilang gipahibalo kang Pablo ang kahimtang. (1 Corinto 1:11; 5:1; 16:17) Apan dihang nahimo na nila kini, sila masaligon sa pagtugyan niining mga butanga sa iyang mga kamot. Ang kasibot alang sa pagkamatarong wala magpahimo kanilang mawad-an ug pagsalig sa pagkaulo ni Kristo o “nasuko kang Jehova.”​—Proverbio 19:3

Ang atong kasibot alang sa pagkamatarong makapugong kanato sa pagpalandong sa kapilian nga magpaluyaluya sa atong hinatag sa Diyos sa buluhatong pagsangyaw sa maayong balita. Ang pagbuhat sa ingon mopadayag sa kakulang ug pagtagad sa kaayohan sa uban ug mahimong kapakyasan sa pagbuhat sa gitinguha ni Kristo nga maoy atong buhaton. “Busa, hinigugma kong mga igsoon,” mitambag si Pablo, “magpakalig-on kamo, dili matarog, sa kanunay magmadagayaon sa buluhaton sa Ginoo, sa nasayran ninyo nga diha sa Ginoo ang inyong pagpangabudlay dili makawang.”​—1 Corinto 15:58.

Ayaw Pagpabiling Walay Kasayoran sa mga Laraw ni Satanas

Ang mga problema sa kongregasyon sama niadtong nahitabo sa Corinto mas lisod atimanon kay sa bukas nga pagsulay. Pahimuslan ni Satanas ang mga situwasyong ingon niini aron makahimo kitag sayop nga mga desisyon nga makapalayo kanato gikan kang Jehova. Apan ‘kita nahibalo sa mga laraw ni Satanas.’​—2 Corinto 2:11.

Gisultihan ni Pablo ang mga Kristohanon sa Corinto nga sila makapahimulos gikan sa pagsusi sa rekord sa unang mga alagad sa Diyos. “Karon kining mga butanga nahitabo kanila ingon nga pananglitan,” siya miingon mahitungod sa mga Israelitas, “ug sila gisulat ingon nga pasidaan kanato nga hing-abotan sa kataposan sa sistema sa mga butang.” (1 Corinto 10:11) Maingon man, kita karon makapahimulos gikan sa mainampingong pagsusi sa unang Kristohanong rekord. Pananglitan, atong mapalandong ang nahitabo sa Corinto. Ang pagpalandong kon sa unsang paagi makahimo kitag hustong mga desisyon niadto makatabang kanato sa paglikay sa paghimog sayop nga desisyon karon.

Tapos sa 13 ka “makasubong mga tuig” sa pagkawala, si Alice miingon mahitungod sa iyang unang tigom diha sa Kingdom Hall: “Mahadlok akong makig-estorya kay basig makahilak unya ako. Nakapauli na ako​—tinuod nga nakapauli. Dili gayod ako makatuo niini.” Busa magmalig-on, bisan pa sa mga problema nga motungha, sa paghawid sa imong maalamong desisyon sa dili pagbulag sa organisasyon ni Jehova! Daghan ang imong mga panalangin sa pagpakig-uban sa katawhan sa Diyos. Ug kini mahimong walay kataposan.​—Proverbio 2:10-15, 20, 21.