Gilabanan sa Uropanhong Korte ang Katungod sa Usa ka Inahan

Tinampo sa magsusulat sa Pagmata! sa Pransiya

NIADTONG Disyembre 16, 2003, ang Uropanhong Korte sa Tawhanong mga Katungod, nga nahimutang sa Strasbourg, Pransiya, mihukom nga ang mga korte sa Pransiya sad-an sa relihiyosong pagpihig batok kang Séraphine Palau-Martínez, usa ka Saksi ni Jehova.

Sa 1996, si Séraphine gihatagan ug legal nga pagtugot sa pagdiborsiyo sa iyang bana, nga duha ka tuig nang mibiya kaniya. Si Séraphine ang gihatagan ug katungod sa pag-atiman sa ilang duha ka anak. Apan sa 1997, sa dihang ang mga bata nagpuyo na uban sa ilang inahan sa halos tulo ug tunga ka tuig, ang amahan midumili sa pagbalik kanila human matapos ang gikasabotang panahon sa pagpakig-uban kanila. Si Séraphine miingon: “Sa dihang kuhaon na nako ang mga bata sa eskuylahan aron mamauli, ang prinsipal mitawag ug polis. Gitugotan lang ako sa pagpakigkita sa akong mga anak sa dihang may mga polis nga nagseguro nga dili nako estoryahan ang mga bata bahin sa akong pagtuo. Ako gitratar nga samag kriminal. Giingnan ako nga makuha lang nako ug balik ang mga bata kon mopirma ako ug usa ka dokumento nga nagpamatuod nga dili nako sila estoryahan bahin sa Diyos o sa Bibliya o dalhon sila sa Kristohanong mga tigom.”

Si Séraphine midangop sa korte. Apan, sa 1998, gihatag sa Korte sa Apelasyon sa Nîmes ang katungod sa pag-atiman sa mga bata ngadto sa amahan. Gipakamatarong sa korte ang desisyon niini pinaagig maharason ug mapatuyangon nga pagsaway sa pasukaranang mga pagtulon-an nga gituohan niini nga gitudlo sa mga Saksi ni Jehova sa ilang mga anak. Si Séraphine nahinumdom sa iyang gibati: “Sakit kaayo ang akusasyon nga naghimo akog kadaot sa akong mga anak, sa dihang ang gusto lang nakong himoon mao ang paghatag kanila sa gihunahuna nako nga kinamaayohang butang alang kanila​—ang Kristohanong pagmatuto.”

Sa dihang ang Cour de Cassation, ang kinatas-ang korte sa apelasyon sa Pransiya, midapig sa korte sa apelasyon sa Nîmes, si Séraphine nakahukom sa pagpresentar sa kaso ngadto sa Uropanhong Korte sa Tawhanong mga Katungod. Sa desisyon nga 6 kontra 1, kini mipahayag nga “napamatud-an sa Korte nga ang korte sa apelasyon [sa Pransiya] adunay gipalabi sa duha ka ginikanan tungod sa relihiyon sa usa nga misumbong. . . . Ang ingon niana nga pagpalabi mapihigon.” Nasuta niini nga ang desisyon sa korte sa Pransiya wala gipasukad sa katakos ni Séraphine sa pag-atiman sa iyang mga anak​—usa ka butang nga wala gayod dudahi​—ni sa aktuwal nga mga ebidensiya kondili sa “kasagarang mga obserbasyon bahin sa mga Saksi ni Jehova.” Tungod niining relihiyosong pagpihig ug paglapas sa mga katungod ni Séraphine, ang Korte nagmando sa Pransiya sa pagbayad ug danyos ug sa pag-abaga sa mga bayranan sa korte.

Kini nga desisyon nahiuyon sa hukom nga gipakanaog sa Uropanhong Korte sa Tawhanong mga Katungod niadtong Hunyo 1993 sa susamang kaso diin nasuta sa Korte nga ang Austria nagpihig kang Ingrid Hoffmann, usa ka Saksi ni Jehova, tungod sa iyang relihiyon.a “Sama sa hukom nga gipakanaog sa kaso ni Hoffmann,” matod sa magasing pamalaod nga La Semaine juridique, “gipalig-on niining maong hukom nga ang mga desisyon nga ipakanaog maylabot sa awtoridad sa ginikanan dili angayng maimpluwensiyahan tungod lang sa relihiyon.” Ang abogado ni Séraphine miingon: “Hinungdanon kaayo kini nga desisyon, sanglit ang miaging mga hukom nga gipakanaog sa Korte milaban tanan sa katungod sa mga ginikanang Saksi ni Jehova maylabot sa pagbaton nila ug dili-mapihigon nga paghukom.”

Sa dihang gipangutana kon unsay iyang gibati bahin sa desisyon, si Séraphine, nga karon nagpuyo na sa Espanya, miingon: “Nalipay ug nahupayan kaayo ko. Pait gayod kaayo sa dihang ang akong mga anak gikuha gikan kanako tungod sa akong relihiyon ug ako nahimulag kanila sulod sa lima ka tuig, apan si Jehova kanunayng nagpalig-on kanako. Nanghinaot ako nga kining maong desisyon makatabang sa uban nga sama kanako ug kahimtang.”

[Footnote]

[Hulagway sa panid 12]

Si Séraphine