Pagkawalay Puy-anan—Tibuok-Kalibotang Suliran
TINAMPO SA MAGSUSULAT SA PAGMATA! SA POLANDIA
“NANGALISBO, lago nga mga alkoholiko—sila walay kabtangan, wala hiilhi, wala tanan!” Kana maoy makapakurat nga paghulagway, apan matod pa sa mga boluntaryo nga nagtabang sa mga tawong walay puy-anan sa Czestochowa, Polandia, mao kanay kasagarang pag-isip sa publiko sa mga walay puy-anan.
Sumala pa sa taho sa The Economist pipila ka tuig kanhi, ilalom sa kadalanan sa Ulaanbaatar, Mongolia, daghan sa libolibong kabataan sa kadalanan sa siyudad anaa magpuyo sa baho kaayong mga kanal nga nagpadulong sa mga imburnal o sa heating system sa siyudad. Bisan tuod nakurat sa pagkahibalo bahin sa mga batang walay puy-anan, daghang taga-Mongolia miingon nga mitungha kining kahimtanga “kay ang mga tawo tapolan kaayong moatiman sa ilang mga anak,” matod pa sa mantalaan.
Sa pikas bahin sa kalibotan, ang mga bata sa kadalanan gipamatay sa nangangkon nga organisadong mga vigilante. Ngano? Usa ka publikasyon sa Hiniusang Kanasoran nagpatin-aw: “Sa Latin Amerika daghang tawo diha sa mga hukmanan, kapolisan, media, negosyo, ug sa katilingban sa katibuk-an nagtuo nga ang mga bata sa kadalanan makadaot sa moralidad sa usa ka sibilisadong katilingban.” Ang samang tinubdan nag-ingon: “Gikataho nga nag-aberids ug tulo ka bata ang ginapatay kada adlaw sa estado sa Rio de Janeiro.”
Ang mga tawong walay puy-anan “makapahadlok ug makapakulba kanamo . . . , apan mga tawo usab sila nga magping-it sa kagutom sama kanato. Daghan ang sama kanila nga wala gayoy igong nabatonan nga makatagbaw sa ilang mga panginahanglan.” Mao kanay giingon sa Web page nga gimugna sa mga boluntaryo nga nagtabang sa mga tawong walay puy-anan sa Czestochowa. Ang samang tinubdan midugang: “Kami naglaom nga . . . duna untay mga tawo nga mosanong niining dakong panginahanglan.” Unsa ba gayod ang panginahanglan, ug unsa ka dako kini?
[Hulagway sa panid 2, 3]
Usa ka grupo sa mga batang walay puy-anan ang nagpuyo ilalom niining manhole
[Credit Line]
Jacob Ehrbahn/Morgenavisen Jyllands-Posten