Makasuportar ba ang Yuta sa Umaabot nga Kaliwatan?
TINAMPO SA MAGSUSULAT SA PAGMATA! SA CANADA
◼ Human sa upat ka tuig nga pagtuon sa dagkong ekosistema sa yuta, ang grupo sa mga eskolar ug sa mga tawong nagtinguha sa pagpreserbar sa atong kalikopan—nga miapil sa pagtuon nga gitawag ug Millennium Ecosystem Assessment [MA]—nagpatik sa ilang unang taho. Ang pipila sa ilang mga panghinapos mao kini: Sulod sa miaging 50 ka tuig, ang nagkadakong panginahanglan sa pagkaon, tubig, kahoy, lanot, ug aseite nagpahinabog dakong kausaban sa ekosistema sa yuta. Tungod niini, maglisod na ang yuta sa pagsuportar sa umaabot nga kaliwatan. Giabusohan pag-ayo ang kinaiyanhong katakos sa yuta sa pagmalo sa mga tanom, pagtaganag oksiheno nga gikan sa mga tanom, ug sa pagresiklo sa mga sustansiya diha sa kadagatan. Daghan usab nga mga espisye ang nameligrong mapuo.
“Dako kaayo ang kadaot nga nahimo sa tawo sa atong planeta ug kini nakapasamot sa kapeligrohan nga madaot ang atong kalikopan ug motungha ang sakit, maupaw ang kalasangan o mawad-ag mga buhing linalang ang pipila ka bahin sa dagat,” nag-ingon ang mantalaang Globe and Mail sa Canada. Ang maong mantalaan midugang: “Ang kalamakan, kalasangan, kasagbotan, mga bokana, kabaybayonan ug uban pang mga dapit nga nagresiklo sa hangin, tubig ug mga sustansiya alang sa tanang buhing linalang nadaot pag-ayo nga dili na kini maulian pa.” Giila sa hunta direktiba sa MA nga ang mga tawo adunay katakos sa pagpamenos sa kadaot nga gipahinabo diha sa ekosistema, apan mahimo lamang kini kon “bug-os nga mausab ang mga paagi sa pag-atiman sa kalikopan.”
Maluwas pa kaha ang planetang Yuta? Oo gayod! Sanglit kitay gipiyalan sa Diyos sa pag-atiman sa kalikopan, angay gayod natong himoon ang atong maarangan sa pagpanalipod niini. (Salmo 115:16) Apan, ang Diyos lamang ang makapasig-uli sa kabalanse sa ekosistema sa yuta. Ang atong “Dakong Magbubuhat” misaad nga iyang iliso ang iyang pagtagad sa yuta ug ‘hatagan kini ug kadagaya.’ (Job 35:10; Salmo 65:9-13) Kini naglakip sa kadagatan ug sa tanang anaa niana tungod kay ingong Maglalalang, si Jehova nga Diyos adunay gahom ibabaw sa kadagatan. (Salmo 95:5; 104:24-31) Ang iyang mga saad matuman gayod tungod kay ang Diyos “dili makabakak.”—Tito 1:2.
Makapahupay gayod ang pagkasayod nga ang yuta makasuportar sa umaabot nga kaliwatan. Kini magpalihok sa tanang may kahadlok sa Diyos sa pagdayeg kaniya tungod sa iyang dagayang kaalam, gahom, ug pagkamaayo. Takos usab siyang dayegon tungod sa iyang dakong gugma sa iyang kalalangan.—Salmo 150:1-6.
[Picture Credit Line sa panid 12]
Globe: NASA photo