Sa Unsang Paagi Makatabang ang Ginikanan?

ANG usa ka edukasyonal nga organisasyon sa Amerika nag-awhag sa mga estudyante sa hayskul: “Ipakita nga andam kamong maningkamot taman sa ginhawa.” Kay gipugos sa pagkab-ot sa ilang mga tumong, ang pipila ka batan-on maningkamot sa paghimog labaw pa sa ilang maarangan. Si Madeline Levine, nga gihisgotan sa miaging artikulo, misulat: “Tungod sa pagkuhag dugang mga subject, daghang ekstrakurikular nga mga kalihokan, abanteng pagpangandam alang sa hayskul o sa kolehiyo, ug sa paningkamot sa mga tutor nga moabante ang estudyante sa ilang pagtuon, daghang batan-on ang puliki kaayo nga gipameligro na nila ang ilang lawas.” Ang mga estudyante nga nailalom nianang maong kahimtang mahimong makasinatig pisikal ug emosyonal nga kadaot.

Kon nabalaka kamo sa giatubang nga tensiyon sa inyong anak, adto sa iyang eskuylahan. Pakigsulti sa mga magtutudlo, magtatambag, ug mga tagdumala sa tunghaan. Tug-ani sila sa inyong namatikdan sa inyong anak. Inyo kanang katungod.

Ang Bibliya nag-awhag sa mga ginikanan nga bantayan pag-ayo ang pag-uswag sa ilang anak samtang kini nagtubo. Giingnan ni Moises ang mga ginikanan sa nasod sa Israel: “Isilsil mo kini [mga balaod sa Diyos] sa imong anak ug magsulti ka mahitungod niini sa maglingkod ikaw sa imong balay ug sa maglakaw ikaw sa dalan ug sa imong paghigda ug sa imong pagbangon.”​—Deuteronomio 6:7.

Ang pagpakitag dakong kaikag sa edukasyon sa inyong anak wala magpasabot nga nanghilabot kamo sa iyang kinabuhi. Kana nagpakita nga kamo mahigugmaong nagpaluyo sa inyong anak. Dako gayod kanag ikatabang sa pagpamenos sa tensiyon nga iyang gibati diha sa eskuylahan.

[Hulagway sa panid 8, 9]

Pakigsulti sa mga magtutudlo ug mga magtatambag bahin sa tensiyon nga gibati sa inyong anak