Gikan sa “Hilom nga Pagserbisyo” Ngadto sa Pagserbisyo sa Ginoo
Sumala sa Giasoy ni Andrew Hogg
“Kon ugaling malansad nato ang atong nukleyar nga mga bomba,” miingon ang komandante sa among submarino, “napakyas kita sa atong misyon.” Nakapukaw kini ug bibo nga panaghisgot kon husto bang makigbahin sa nukleyar nga pagpakiggubat. Apan sa unsang paagi ako nakaserbisyo diha sa submarino sa militar, nga gitawag usab ug hilom nga pagserbisyo tungod sa among paningkamot nga makapabiling dili mamatikdan?
NATAWO ako sa Philadelphia, Pennsylvania, U.S.A., niadtong 1944. Sa nagdako ako, naimpluwensiyahan ako sa akong amahan, apohan, ug uyoan, nga pulos mga sundalo, nga nag-isip niini ingong kinalabwang serbisyo. Sa bata pa ako, nakasuroy ako sa baraderohan sa navy duol sa among balay ug didto ako unang nakakita ug submarino. Sukad niadto, nangandoy ako nga mahimong sundalo nga magserbisyo sa submarino. Sa talitapos na ako sa hayskul, nadawat ako sa U.S. Naval Academy. Paglabay ug upat ka tuig, migraduwar ako sa Hunyo 1966.
Nagpaenrol ako sa Naval Nuclear Propulsion Program sa pagbansay bahin sa nuclear engineering ug sa tanang operatiba sa navy nga maylabot sa submarino. Dayon sa Abril 1967, akong gipakaslan si Mary Lee Carter, nga akong minahal nga asawa. Sa kataposan, sa Marso 1968, akong nakab-ot ang akong gipangandoy sa bata pa ako dihang giasayn ako sa akong unang submarino, ang USS Jack. Paglabayg mga usa ka tuig natawo si Allison, ang panganay sa duha namo ka anak ni Mary Lee.
Pagka-1971, ako nahimong Engineer Officer sa USS Andrew Jackson, kansang kapitan maoy namulong sa akong gihisgotan sa sinugdan. Samtang naglawig kami sa submarino nga dunay missile nga Polaris, dihay sunog nga nahitabo, nga maoy gikahadlokan sa tanang tripulante ug submarino. Paglabay sa tungang gabii, samtang nagpahulay kauban sa akong mga isigkasundalo, morag misagunto ang submarino. Dayon mitingog ang alarma ug among nadunggan ang pahibalo, “Sunog sa unang lawak sa makina!”
Kay ako may nagdumala halos sa tanang sistema sa makinarya ug elektrisidad, midalidali dayon akog dagan sa pagsusi sa kadaot. Misilaob ang usa sa mga oxygen generator sa submarino, nga maoy nagsuplay kanamog hangin nga mahanggab. Upat kaming nagdalidalig taod sa among air-breathing mask ug among gipanguha ang tanang mosilaob nga gas. Maayo na lang kay walay naunsa. Bisan pa niini, nakapadayon kami sa among misyon, nga nagpamatuod nga maayong pagkabansay ang mga tripulante.
Ang Akong Gipiling Basahon Mao ang Bahin sa Usa ka Tigpatunhayg Kalinaw
Aron dili kami matensiyon sa trabaho, gidasig kami sa paggahin ug pipila ka oras sa pagbasag mga basahon bahin sa kultura. Ang akong kasagarang basahon mao ang kinabuhi sa iladong mga sundalo. Apan niining higayona ang akong gipili mao ang bahin sa usa ka iladong tigpatunhayg kalinaw—si Jesu-Kristo. Nagsugod ako pagbasa sa mga Ebanghelyo diha sa Bibliya nga giregalo kanako sa migraduwar ako sa eskuylahan sa navy. Apan daghan akog gikalibgan sa akong gibasa. Nagkinahanglan akog tabang.
Sa hapit nang matapos ang among misyon, ang among komandante nagpatawag ug tigom sa mga opisyales ug miingon: “Gentlemen, ang atong inhenyero gihatagan ug kinamaayohang asaynment sa United States Navy. Gitudlo siya nga Engineer Officer sa una ug kinabag-ohang matang sa submarino sa navy.” Wala ako makatingog!
Tungod sa akong bag-ong asaynment, mibalhin ang akong pamilya sa Newport News, Virginia, diin gigama pa ang USS Los Angeles. Akoy modumala sa pagtesting sa engineering systems ug sa paghimog mga manuwal may kalabotan sa makina ug sa mga programa sa pagbansay. Lisod kaayo kining trabahoa apan makalingaw. Kasamtangan, gipanganak ni Mary Lee ang among anak nga lalaki nga si Drew. Karon duha nay akong anak, ug nakahunahuna na usab ako bahin sa Diyos: ‘Unsa kahay iyang panglantaw sa gubat? Unsa kahay mahitabo sa tawo inigkamatay? Duna bay impiyerno?’
Natubag ang Akong mga Pangutana!
Niining mga panahona, tigduawan ang mga Saksi ni Jehova sa akong asawa. Usa ka adlaw niana dihang mitawag ako sa balay gikan sa baraderohan, si Mary Lee miingon, “Aniay duha ka babaye dinhi sa ato nga nagsangyaw bahin sa Bibliya.”
“Unsay ilang relihiyon?” nangutana ako.
“Mga Saksi ni Jehova,” siya mitubag.
Wala akoy ideya bahin sa mga Saksi, apan gusto kong makasabot sa Bibliya. “Paduawa silag usa ka gabii,” miingon ako. Wala magdugay, usa kanila mibalik uban sa iyang bana, ug nagsugod kami sa pagtuon sa Bibliya.
Natubag ra gayod ang akong mga pangutana nga nakapalibog nako sa daghang tuig. Pananglitan, akong nahibaloan nga ang mga patay “walay nahibaloan nga bisan unsa,” nga gipakasama ni Jesus sa hinanok nga pagkatulog. (Ecclesiastes 9:5; Juan 11:11-14) Sa ato pa, ang mga patay wala sa langit ni gisakit kondili “nangatulog” diha sa kamatayon, nga naghulat sa pagkabanhaw.
Kami ni Mary Lee nagsugod sa pagtambong ug Kristohanong mga tigom sa Kingdom Hall. Didto nakakita kamig mga Saksi nga lainlain ug kultura, edukasyon, ug kagikan—tanan nag-alagad sa Diyos nga malinawon ug nagkahiusa. Kami nakaingon: “Ang Bibliya makapausab gayod sa kinabuhi sa tawo.”—Salmo 19:7-10.
Panahon sa Pagdesisyon
Sa dihang naggubatay ang mga nasod sa Arabia ug Israel niadtong 1973, ang mga submarino sa U.S. Atlantic Fleet gipadala didto. Seguradong modako ang gubat sa usa lang ka sayop nga desisyon, ug diha niana akong naamgohan nga ang Gingharian sa Diyos lamang, dili tawhanong gobyerno, ang makapatunghag tinuod ug walay kataposang pakigdait. Gani ako kanunayng nag-ampo: “Moabot unta ang imong gingharian. Matuman ang imong pagbuot dinhi sa yuta,” apan wala ako mahibalo kon unsay buot ipasabot niana. (Mateo 6:9, 10, Ang Biblia—Bag-ong Hubad Nga Binisaya) Karon nakasabot na ako nga ang Gingharian sa Diyos maoy usa ka langitnong kagamhanan nga magmando sa tibuok yuta sa dili madugay, ug paphaon gikan niini ang tanang pagkadaotan ug ang mga mamumuhat ug daotan.—Daniel 2:44; 7:13, 14.
Usa ka teksto sa Kasulatan nga nakapabalaka kanako mao ang 2 Corinto 10:3, 4. Sumala pa niini, ang matuod nga mga Kristohanon ‘dili makiggubat sumala sa kon unsa kita diha sa unod. Kay ang mga hinagiban sa atong pagpakiggubat dili unodnon, kondili gamhanan tungod sa Diyos.’ Akong nakat-onan nga espirituwal kini nga “mga hinagiban,” ug lakip niini mao “ang espada sa espiritu”—ang Balaang Bibliya.—Efeso 6:17.
Kinahanglang modesisyon ako. Magpadayon ba ako niining trabahoa nga nakalingaw nako bisan pag lisod, o ako bang ipahiuyon ang akong kinabuhi subay sa kamatuoran sa Bibliya? Human sa pag-ampo bahin niini, nakadesisyon ako nga aron mahimo gayod ako nga tigpatunhayg kalinaw, kinahanglang sundon nako ang paagi sa Diyos.
Ang Akong Bag-ong “Hepe Komandante”
Kami ni Mary Lee nag-ampo ug naghisgot bahin sa among umaabot ug kami nakahukom sa pag-alagad sa kinalabwang “Hepe Komandante”—si Jehova nga Diyos. Kami midesisyon sa pagpahinungod sa among kinabuhi kang Jehova, ug nagpadala akog sulat sa pagluwat gikan sa navy. Niana gibalhin ako ngadto sa Norfolk, Virginia, nga naghulat sa permiso sa akong paghunong sa pagserbisyo sa militar. Ang kadaghanan sa kauban nakong mga opisyales naglibog sa akong desisyon, ug ang pipila naglagot. Apan ang uban interesado sa akong pinasukad sa Bibliya nga baroganan ug mirespetar sa akong desisyon.
Akong nadawat ang permiso sa pagbiya sa militar sa 1974. Nianang tuiga kami sa akong asawa nagpasimbolo sa among pagpahinungod sa Diyos pinaagi sa bawtismo sa tubig diha sa “Diyosnong Katuyoan” nga Distritong Kombensiyon sa mga Saksi ni Jehova sa Hampton, Virginia. (Mateo 28:19, 20) Nagsugod ang among bag-ong kinabuhi.
Nag-atubang ug Bag-ong mga Problema
Kami ni Mary Lee dunay duha ka gagmayng mga anak, walay panginabuhian, ug ang among kuwarta igo lang sa pipila ka bulan. Daghang kompaniya ang akong giaplayag trabaho ug akong gitugyan ang tanan ngadto sa Diyos. Wala magdugay nakakita akog trabaho. Ang akong suweldo katunga lang sa akong suweldo sa navy, apan ang akong pamilya dili na kinahanglang mobalhin pag laing lugar.
Samtang miuswag ang among espirituwalidad, buot namong makahimo pag dugang sa pag-alagad kang Jehova. Usa ka pamilyang Saksi nga among kaila mibalhin sa sentro sa Virginia sa pag-alagad diin dako ang panginahanglan ug mga magtutudlo sa Bibliya, ug ila kaming gipabisita sa ilaha. Nakombinsir kami sa usa lang ka pagduaw ug dayon nagplano kami sa pagbalhin. Mihangyo ako sa kompaniya sa pag-asayn kanako niining dapita, ug nalipay ako nga ila akong gitugotan. Gani gihatagan ako ug taas-taas nga posisyon! Ug ang kompaniya pa gani ang mibayad sa tanang galastohan sa pagbalhin. Kami nakaingon nga atimanon gayod diay sa Diyos kadtong maningkamot sa pagtuman sa iyang kabubut-on.—Mateo 6:33.
Kay simple man kamig kinabuhi, kami ni Mary Lee nakaalagad sa bug-os panahon. Busa daghan kamig panahon para sa among duha ka buotang mga anak samtang sila nagdako. Tungod niini si Allison ug Drew nagpadayon sa “paglakaw diha sa kamatuoran,” nga nakapalipay gayod kanamo.—3 Juan 4; Proverbio 23:24.
Tinuod may mga panahon nga nabalaka kami bahin sa kuwarta, balay, panglawas, ug sa pagkatigulang. Apan gitabangan gayod kami ni Jehova. Nagbasol ba ako nga gibiyaan nako ang “hilom nga pagserbisyo”? Wala gayod! Sa mamalandong kami ni Mary Lee sa among kinabuhi, kami makaingon gayod nga ang pag-alagad kang Jehova mao ang labing hamili ug makapatagbaw nga kalihokan sa tawo.—Ecclesiastes 12:13.
[Blurb sa panid 14]
Kami nakahukom sa pag-alagad sa kinalabwang “Hepe Komandante”
[Hulagway sa panid 12, 13]
Ang USS “Los Angeles”
[Credit Line]
U.S. Navy photo
[Hulagway sa panid 13]
Kami ni Mary Lee karon