Kasaligang Tinubdan sa Giya ug Paglaom
DILI sama sa mga demonyo, si Jehova nga Diyos labing maalamon ug labing gamhanan. Siya usab ang kinalabwang panig-ingnan sa gugma. (1 Juan 4:8) Ang iyang tambag kanunayng mapuslanon, walay bayad, ug para sa atong kaayohan. Sukwahi gayod kana sa tambag sa mga mananag-an ug mga psychic! Ang Diyos nag-ingon: “Hoy, kamong tanan nga ginauhaw [sa espirituwal]! Umari kamo sa tubig. Ug ang mga walay salapi! Umari kamo, palit ug kaon. Oo, umari kamo, palit ug bino ug gatas bisag walay salapi ug walay bayad. Nganong kamo nagbayad ug salapi alang sa dili tinapay, ug nganong kamo nagbudlay alang nianang dili makapatagbaw? Pamati pag-ayo kanako, ug kaon kon unsay maayo, ug tugoting makakaplag ang inyong kalag sa tumang kalipay niini diha sa katambok mismo.”—Isaias 55:1, 2.
Sanglit ang Bibliya inspirado sa atong mahigugmaong Maglalalang, kini naghatag kanatog paglaom, espirituwal nga proteksiyon, katuyoan sa kinabuhi, ug kinamaayohang mga prinsipyo nga angayng sundon. Palihog palandonga ang mosunod nga mga pangutana ug ang mga tubag niana sa Bibliya.
[Kahon sa panid 7]
● Sa unsang paagi makabaton kog tinuod nga kalinaw sa hunahuna? Ang Bibliya nagtubag: “Mao kini ang giingon ni Jehova, ang imong Manlulukat, ang Balaang Usa sa Israel: ‘Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan. Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba, ug ang imong pagkamatarong sama sa mga balod sa dagat.’”—Isaias 48:17, 18.
● Magpadayon ba ang pagkadaotan? “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana. Kon mahitungod sa mga daotan, sila pagaputlon gikan sa yuta; ug kon bahin sa mga maluibon, sila pagalukahon gikan niini.” (Proverbio 2:21, 22) Oo, ang daotang mga tawo, lakip na ang mga demonyo, malaglag sa dayon, nga samag gisunog sa kalayo.—Pinadayag 20:10, 14.
● Matapos ba ang sakit ug pag-antos? “Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang [ang mga problema karon] nangagi na.”—Pinadayag 21:3, 4.
Dili sama sa mga demonyo, ang Diyos dili gayod mamakak. Sa pagkatinuod, siya “dili makabakak.” (Tito 1:2) Dugang pa, ang kamatuoran nga naggikan kaniya maghatag ug kagawasan ug kinabuhi. Mao kini hisgotan sa sunod nga artikulo.—Juan 8:32; 17:3.