Ang Imo Bang Ngabil Maoy ‘Bililhong Sudlanan’?

● ‘Adunay bulawan, ingon man daghang korales; apan ang mga ngabil sa kahibalo maoy bililhong sudlanan,’ misulat si Haring Solomon. (Proverbio 20:15) Sukad kaniadto, ang bulawan taas na kaayog bili, ug sa adlaw ni Solomon, ang korales bililhon usab. Apan, ang atong ngabil mahimong mas bililhon pa niana. Sa unsang paagi? Dili sa kanindot sa dagway niini kondili sa mga pulong nga gipahayag niini.

Ang bililhong mga ngabil magpahayag ug pagkamaayo, kalulot, ug gugma. Ug ingong “mga ngabil sa kahibalo,” kini magsulti sa kamatuoran bahin sa Diyos sumala sa giingon sa Bibliya. Oo, kining karaang basahon puno sa kaalam ug kamatuoran bahin sa atong Maglalalang, maingon man sa maayong mga tambag.—Juan 17:17.

Ikasubo, daghang tawo ang sayop nga naggamit sa ilang ngabil pinaagi sa pagsultig bakak bahin sa Diyos. Pananglitan, ang pipila nagbasol sa Diyos tungod sa inhustisya ug pag-antos nga nahitabo karon, bisan tuod ang mga tawo maoy sagad nga hinungdan niini. Maylabot niana, ang Proverbio 19:3 nag-ingon: “Daoton sa pipila ang ilang kaugalingon pinaagi sa ilang binuang nga mga buhat ug unya basolon ang Ginoo.”—Today’s English Version.

Ang uban nagpakaway-bili sa ilang ngabil pinaagi sa dili-sinserong sinultihan, makadaot nga tabi, o bisan sa pagbutangbutang. Gamit ang epektibong ilustrasyon, ang Proverbio 26:23 nag-ingon: “Ingon sa pasinawng plata nga gihaklap sa bika mao ang mainitong mga ngabil uban sa daotang kasingkasing.” Sama sa “pasinawng plata” nga nagtabon sa bika, ang “mainitong mga ngabil,” nga daw nagpakitag mainitong pagbati ug bisan pagkasinsero, mahimong nagtagog “daotang kasingkasing.”—Proverbio 26:24-26.

Siyempre, ang maong pagkadaotan dili malilong sa Diyos. Siya nakakita kon kinsa gayod kita! Busa, si Jesus miingon: “Hinloi una ang sulod sa kopa ug sa pinggan, aron mamahinlo usab ang gawas niini.” (Mateo 23:26) Tinuod gayod kana! Dugang pa, ang kahinlo o kaputli sa kahiladman, duyog sa kasingkasing nga puno sa espirituwal nga kamatuoran, madayag diha sa atong sinultihan. Unsay resulta niana? Ang atong ngabil mahimong ‘bililhong sudlanan,’ ilabina sa panan-aw sa Diyos.

[Hulagway sa panid 19]

Ang ngabil sa maalamon maoy ‘bililhong sudlanan’