Ang Hunahuna sa Bibliya
Nganong Gidumtan ang Matuod nga mga Sumusunod ni Jesus?
“Itugyan kamo sa mga tawo ngadto sa kasakitan ug pagapatyon kamo, ug kamo pagadumtan sa tanang kanasoran tungod sa akong ngalan.”—MATEO 24:9.
SI Jesus misulti nianang mga pulonga pipila ka adlaw una siya patya sa linuog nga paagi. Sa gabii una sa iyang kamatayon, siya miingon sa iyang matinumanong mga apostoles: “Kon sila naglutos kanako, sila magalutos usab kaninyo.” (Juan 15:20, 21) Apan nganong dumtan man sa mga tawo kadtong nagtuman kang Jesus ug naningkamot sa pagsundog kaniya? Kon buot hunahunaon, siya nagsakripisyo alang sa uban, nga naghupay sa mga kabos ug naghatag ug paglaom sa mga dinaogdaog.
Ang Bibliya nagpadayag sa espesipikong mga rason sa maong pagdumot. Sa dihang ato kining susihon, atong masabtan kon nganong ang mga tawo karon nga nagsunod kang Kristo makaagom sa samang pagsupak nga iyang naagoman.
Tungod sa Kawalay-Alamag
Si Jesus miingon sa iyang mga sumusunod: “Ang takna nagsingabot sa dihang ang matag usa nga mopatay kaninyo maghunahuna nga siya nakahimo ug sagradong pag-alagad sa Diyos. Apan pagabuhaton nila kining mga butanga tungod kay wala man sila makaila sa Amahan o kanako.” (Juan 16:2, 3) Tinuod nga daghang maglulutos ang nangangkon nga nag-alagad sa Diyos nga gialagaran ni Jesus, apan sila naimpluwensiyahan sa bakak nga relihiyosong mga pagtulon-an ug tradisyon. Oo, sila may “kasibot sa Diyos; apan dili sumala sa tukmang kahibalo.” (Roma 10:2) Ang usa sa maong magsusupak mao si Saulo sa Tarso, kinsa sa ulahi nahimong ang Kristohanong apostol nga si Pablo.
Si Saulo maoy sakop sa grupo nga nailhan ingong mga Pariseo, usa ka Hudiyohanong sekta nga dunay politikanhong gahom ug impluwensiya, nga supak sa Kristiyanidad. “Ako usa ka tigpasipala ug maglulutos ug tawong bagis,” si Saulo miingon sa ulahi. Siya miingon usab: “Ako walay alamag ug milihok uban ang kawalay-pagtuo.” (1 Timoteo 1:12, 13) Apan, sa dihang nahibaloan niya ang kamatuoran bahin sa Diyos ug sa Iyang Anak, siya nagbag-o dayon.
Ingon usab niana ang nahitabo sa daghan karon nga kanhing mga maglulutos. Dugang pa, ang pipila kanila, sama kang Saulo, gilutos usab sa ulahi. Bisan pa niana, sila wala mobalos ug daotan sa daotan kondili ilang gisunod ang tambag ni Jesus: “Magpadayon sa paghigugma sa inyong mga kaaway ug sa pag-ampo alang sa mga nagalutos kaninyo.” (Mateo 5:44) Ang mga Saksi ni Jehova naningkamot sa pagpadapat nianang mga pulonga, nga nanghinaot nga mausab ang tinamdan sa pipila ka magsusupak, sama sa nahitabo kang Saulo.
Tungod sa Kasina
Daghan nga misupak kang Jesus ang nagbuhat niana tungod sa kasina. Gani, ang Romanong gobernador nga si Poncio Pilato ‘nasayod nga tungod sa kasina nga si Jesus gitugyan sa pangulong mga saserdote’ aron ilansang. (Marcos 15:9, 10) Nganong nasina man kang Jesus ang Hudiyong mga lider sa relihiyon? Ang usa ka hinungdan mao nga si Jesus gitamod sa ordinaryong mga tawo, kinsa gitamay sa mga lider sa relihiyon. “Ang kalibotan nagsunod na kaniya,” matod sa mga Pariseo. (Juan 12:19) Sa susama, sa dihang ang mga tawo sa ulahi misanong sa pagsangyaw sa mga sumusunod ni Kristo, ang mga magsusupak “napuno [na usab] sa pangabugho” ug nangasuko sa Kristohanong mga tig-ebanghelyo.—Buhat 13:45, 50.
Ang ubang mga kaaway wala makaangay sa maayong panggawi sa mga alagad sa Diyos. Si apostol Pablo miingon sa mga isigka-Kristohanon: “Tungod kay kamo wala magpadayon sa pagpakig-uban kanila [mga daotan] niining samang paglunang sa unodnong pagpatuyang, sila nahibulong ug nagpadayon sa pagsulti nga mapasipalahon kaninyo.” (1 Pedro 4:4) Ang susamang negatibong tinamdan makita usab karon. Siyempre, ang matuod nga mga Kristohanon naglikay sa daotang panggawi, apan wala sila magpakamatarong sa kaugalingon ni maghunahuna nga labaw sila sa uban. Sa pagkatinuod, ang maong panggawi dili-Kristohanon, kay ang tanang tawo makasasala ug nagkinahanglan sa kaluoy sa Diyos.—Roma 3:23.
Tungod Kay ‘Dili Bahin sa Kalibotan’
“Ayaw ninyo higugmaa ang kalibotan o ang mga butang nga anaa sa kalibotan,” ang Bibliya nag-ingon. (1 Juan 2:15) Unsa nga kalibotan ang gitumong ni apostol Juan? Kana mao ang kalibotan sa katawhan nga nahimulag sa Diyos ug nagpasakop kang Satanas, ang “diyos niining kalibotana.”—2 Corinto 4:4, The New Testament in Modern English; 1 Juan 5:19.
Ikasubo, ang pipila nga nahigugma sa kalibotan ug sa daotang mga dalan niini supak niadtong naningkamot sa pagkinabuhi sumala sa mga pagtulon-an sa Bibliya. Busa, si Jesus miingon sa iyang mga apostoles: “Kon kamo bahin pa sa kalibotan, higugmaon sa kalibotan ang mga iyaha. Karon tungod kay kamo dili man bahin sa kalibotan, apan gipili ko kamo gikan sa kalibotan, tungod niini ang kalibotan nagdumot kaninyo.”—Juan 15:19.
Pagkamakapasubo nga ang mga tawo nagdumot sa mga alagad ni Jehova tungod kay wala nila higugmaa ang kalibotan nga puno sa korapsiyon, inhustisya, ug kapintasan ug gimandoan ni Satanas! Daghang sinserong mga tawo ang nagtinguha sa paghimo sa kalibotan nga mas maayong dapit, apan dili nila mabuntog ang dili-makitang magmamando niini. Si Jehova nga Diyos lamang ang makabuntog kang Satanas—ug buhaton Niya kana, pinaagi sa bug-os nga paglaglag kaniya, nga samag gisunog sa kalayo!—Pinadayag 20:10, 14.
Kanang kahibulongang palaaboton maoy hinungdanong bahin sa bililhong “maayong balita sa gingharian” nga gimantala sa mga Saksi ni Jehova sa tibuok kalibotan. (Mateo 24:14) Oo, kombinsido ang mga Saksi nga ang Gingharian lamang sa Diyos, ang iyang kagamhanan pinaagi kang Kristo, ang magpatunghag dumalayong kalinaw ug kalipay sa yuta. (Mateo 6:9, 10) Busa, magpadayon sila sa pagmantala sa maong Gingharian, nga nagpabili sa pag-uyon sa Diyos inay sa pag-uyon sa tawo.
NAKAPAMALANDONG KA BA?
● Nganong supak si Saulo sa Tarso sa mga sumusunod ni Kristo?—1 Timoteo 1:12, 13.
● Ang pipila sa mga kaaway ni Jesus natukmod sa unsang daotang tinamdan?—Marcos 15:9, 10.
● Giunsa paglantaw sa mga Kristohanon ang kalibotan?—1 Juan 2:15.
[Hulagway sa panid 21]
Niadtong 1945, ang mga Saksi sa Quebec, Canada gihasi sa mga magsusupak tungod sa pagsangyaw sa maayong balita sa Gingharian
[Credit Line]
Courtesy Canada Wide