Pagpaniid sa Kalibotan
Gipakita sa estadistika sa Arab Road Safety Organization nga nagbase sa Tunisia nga kapin sa 500,000 ka aksidente sa sakyanan ang mahitabo matag tuig diha sa Arabic nga mga nasod, nga nakapatayg kapin sa 36,000 ka tawo.—REUTERS NEWS SERVICE, TUNISIA.
“Alang sa Insek nga mga tin-edyer, ang Internet mao ang pangunang tinubdan sa impormasyon bahin sa sekso, kay kulang ang gitudlo bahin sa sekso diha sa eskuylahan ug panimalay, matod pa sa usa ka surbi.”—CHINA DAILY, CHINA.
Pagpanglili Pinaagig Webcam
Di pa dugay, nadakpan sa kapolisan sa Germany ang usa ka lalaki nga giakusahang nanglili sa mga kuwarto sa batan-ong mga babaye gamit ang ilang Webcam. Ang hacker gikaingong nakatag-an sa sayon nga password sa usa ka account sa Internet, mao nga nakakuha siyag impormasyon bahin sa pipila ka tawo. Gituohan nga gigamit niya ang maong account sa pagpadalag malware (malicious software) nga konohay screen saver ngadto sa mga amiga sa iyang biktima—diin pinaagi niini makontrolar niya ang kompiyuter sa maong mga babaye ug magamit ang ilang Webcam bisan kanus-a. Gikataho nga sa dihang gi-raid sa mga imbestigador ang apartment sa hacker, dihay nakita nga tulo ka milyong hulagway ug siya “konektado sa mga kompiyuter sa 80 ka babaye nga wala nila masayri,” sumala sa Aachener Zeitung.
Bag-ong Nadiskobrehan nga mga Pinulongan
Ang mga eksperto nga nagsusi sa wala kaayo mailhi nga mga pinulongang Aka ug Miji—nga gigamit sa amihanan-sidlakang estado sa India, ang Arunachal Pradesh, nga anaa sa utlanan sa Bhutan ug China—nakadiskobreg ikatulong lumad nga pinulongan, ang Koro. “Kini nga pinulongan wala mailhi kaniadto,” miingon ang tigdukiduki nga si Gregory Anderson, direktor sa Living Tongues Institute for Endangered Languages. Ang Koro wala dayon madiskobrehi kay mga 800 lamang ka tawo ang nagsulti niana ug nagpuyo sila sa dapit diin limitado ra ang makasulod. Niadtong 2009, 24 ka pinulongan ang nadiskobrehan diha sa usa ka dapit sa China nga kaniadto gituohang usa ray pinulongan.
Radyoaktibong mga Baboy
Sa Germany, “ang gibayad sa gobyerno alang sa mga mangangayam nga nawad-ag kinitaan tungod sa radyoaktibong mga baboy misakag upat ka pilo sukad niadtong 2007,” nagtaho ang Spiegel Online. Daghang mangangayam ang nagbaligyag karne sa baboy alang sa pagkaon, apan ang gobyerno nagdili sa pagbaligyag karne nga daghan kaayog cesium-137, usa ka radyoaktibong elemento nga nabuga tungod sa aksidenteng nahitabo sa planta sa Chernobyl, 25 ka tuig na ang milabay. Ang mga baboy dakog purohan nga makontaminar kay ganahan silag “uhong ug truffle, nga kusog kaayong mosuhop ug radyoaktibong mga elemento,” matod sa Spiegel. “Siyempre, ang hinungdan sa pagdako sa bayranan, mao ang pagdaghan sa mga baboyng ihalas, dili ang pag-uswag sa radyoaktibong kontaminasyon.” Ang mga eksperto nag-ingon nga ang problema labot sa radyasyon lagmit dangtan pag 50 ka tuig.