Karaang Paagi sa Russia sa Pagdibuho Diha sa Kahoy
● Kadaghanan sa turista sa Russia ganahan kaayong mamalit ug mga handicraft, sama sa monyekang matryoshka. Kaniadto, ang kadaghanan niini nga produkto nga gama sa kahoy hinimo sa hawod nga mga tigdibuho sa komunidad. Ang karaang paagi sa pagdibuho sa kahoy gitawag ug khokhloma.
Sa daghang siglo, ang mga Ruso mogamit ug maayong pagkakulit nga mga panaksan nga may nindot nga dibuho, ug ang ilang kutsara, tasa, ug ubang gamit sa pagpangaon gama pod sa kahoy. Sagad gidibuhoan kinig tanom o mananap. May mga komunidad nga naggama lang ug usa ka matang sa produkto.
Himoon nila kini panahon sa taas nga tingtugnaw kay dili kaayo sila makapanguma. Mga 200 ka tuig kanhi o kapin pa, ang paghimog mga handicraft nahimong dakong negosyo sa ubang mga lungsod ug baryo. Pananglitan, dihay panahon nga ang tanang molupyo sa Semënov mihunong sa pagpanguma ug nakagamag halos duha ka milyong kahoyng panaksan, bandihado, tasa, ug mga kutsara sa usa lang ka tuig.
Ang mga molupyo duol sa lungsod sa Nizhniy Novgorod nakaimbentog paagi sa paghimog sinaw ug dili daling matangtang nga mga dibuho. Naghimo silag mga pintura ug barnis nga dili madaot sa kainit, ug gihurno nila ang ilang mga produkto. Tungod sa init nga temperatura, ang plata nga kolor niini mahimong kolor bulawan. Ang maong pamaagi gigamit gihapon karon sa mga pabrika sa Nizhniy Novgorod nga naggamit ug khokhloma nga estilo sa pagdibuho.
Ang mga disenyo nga khokhloma naglakip sa mga bulak ug tanom nga makita sa kalasangan ug kabalilihan sa Russia, maingon man mga langgam ug isda. Ang kasagarang disenyo maoy nagbawog nga mga dahon sa sagbot ug ubang mga dahon-dahon ug mga prutas, sama sa lainlaing matang sa berry. Kasagaran pula, itom, bulawan, ug berde ang kolor niini. Karon, ang khokhloma nga mga produkto nadayan-dayan diha sa mga lamesa sa mga tawo sa lainlaing dapit sa kalibotan, nga gidibuhoan ug nindot nga mga kolor sa mga talan-awon sa kabaryohan sa Russia.