TABANG ALANG SA PAMILYA | MGA BATAN-ON
Kon Unsaon Pagdawat sa Pagbadlong
ANG PROBLEMA
“Kon may magbadlong nimo, morag gisultihan ka niya nga nakahimo kag sayop. Ug wala koy nailhan nga moingon, ‘Ganahan gyod kong sultihan nga nasayop ko!’”—Amy, 17.a
Ang dili modawat sa pagbadlong maoy sama sa usa ka piloto nga nagbalewala sa instruksiyon gikan sa control tower. Peligroso kini.
Malisdan ka ba sa pagdawat sa pagbadlong gikan sa imong ginikanan, titser, ug uban pang hamtong? Kon mao, kini nga artikulo makatabang nimo.
ANG ANGAY NIMONG MAHIBALOAN
Ang tanan nagkinahanglag pagbadlong.
“Kitang tanan mangapandol sa makadaghan.”—Santiago 3:2.
“Kon nakahimo kag sayop, dili ka angayng maulaw kon badlongon ka.”—Jessica.
Ang pagbadlong wala magpasabot nga daotan ka.
“Ang gihigugma ni Jehovab iyang ginabadlong, ingon sa ginabuhat sa usa ka amahan sa anak nga iyang gikahimut-an.”—Proverbio 3:12.
“Kon dunay mobadlong nako, akong hunahunaon nga dili lalim para nila ang pagbuhat niana, ug gimahal ko nila maong ila kong gitambagan.”—Tamara.
Ang pagbadlong makatabang aron mahimo kang mas maayong tawo.
“Patalinghog sa disiplina ug mahimong maalamon.”—Proverbio 8:33.
“Ang pagbadlong gikinahanglan sa pag-uswag. Mahibalo ka kon unsay hunahuna sa uban bahin nimo ug matabangan ka sa pag-usab sa dili maayong mga kinaiya nga tingali wala nimo mamatikdi.”—Deanne.
ANG IMONG MAHIMO
Buksi ang imong hunahuna. Tingali masakitan ka dihang badlongon. Apan ayaw padaog sa imong gibati. Aron mahimo kana, sulayi pagbalit-ad ang situwasyon ug hunahunaa nga ikaw ang nagbadlong sa lain—tingali sa imong manghod. Karon, duna ka bay nakitang kaayohan sa maong tambag? Hunahunaag balik ang imong situwasyon ug lantawa ang maong tambag sa positibong paagi.—Prinsipyo sa Bibliya: Ecclesiastes 7:9.
“Usahay, kay nahiubos ka pag-ayo, makalimot ka nga gusto lang kang tabangan sa nagbadlong nimo nga mahimong mas maayong tawo, ug dili niya gustong pasakitan ka.”—Theresa.
Magmapaubsanon. Ayaw isalikway ang pagbadlong tungod sa imong garbo. Pero ayaw pod kaluya kon dunay ka pay kinahanglang pauswagon. Ang pagpaubos makatabang nimo sa pagdawat sa pagbadlong ug dili maluya. Hinumdomi: Ang pagbadlong nga sakit kaayo basig mao ang pagbadlong nga gikinahanglan kaayo nimo. Kon imong isalikway kini, bisag unsa pay rason, imong gipalabay ang kahigayonan nga mouswag.—Prinsipyo sa Bibliya: Proverbio 16:18.
Ang pagbadlong nga sakit kaayo basig mao ang pagbadlong nga gikinahanglan kaayo nimo
“Ang pagdawat sa pagbadlong importante sa pagkahimong hamtong. Kon dili ta makakat-on sa pagdawat ug sa pagpadapat sa pagbadlong, kita ray mag-antos.”—Lena.
Magmapasalamaton. Bisag nalisdan ka sa pagdawat sa pagbadlong, pasalamati gihapon ang nagbadlong nimo. Segurado nga gitinguha niya ang imong kaayohan aron mahimo kang mas maayong tawo.—Prinsipyo sa Bibliya: Salmo 141:5.
“Walay mawala kon moingon kag ‘Salamat,’ ilabina kon gikinahanglan nimo ang tambag. Bisag wala ka magkinahanglan niana, ikaw makapakitag kaayo ug makapasalamat sa paningkamot sa nagbadlong nimo.”—Carla.