Watchtower ONLINE NGA LIBRARYA
Watchtower
ONLINE NGA LIBRARYA
Cebuano
  • BIBLIYA
  • PUBLIKASYON
  • MGA TIGOM
  • g 9/14 p. 4-7
  • Kon Unsaon Pagsagubang sa Burnout

Walay video nga available.

Sorry, dunay problema sa pag-load sa video

  • Kon Unsaon Pagsagubang sa Burnout
  • Pagmata!—2014
  • Sub-ulohan
  • Susamang Materyal
  • 1. KLAROHA KON UNSA GAYOY IMONG PRAYORIDAD.
  • 2. PASIMPLEHA ANG IMONG KINABUHI.
  • 3. PAGTUON SA PAGBALIBAD.
  • 4. PAGRELAKS.
  • “Burnout”—Ikaw ba ang Sunod?
    Pagmata!—1995
  • “Burnout”—Sa Unsang Paagi Makasagubang Ka?
    Pagmata!—1995
  • “Burnout”—Kinsay Nameligro ug Ngano?
    Pagmata!—1995
  • Unsay Akong Himoon Aron Dili Ko Ma-burnout?
    Mga Batan-on Nangutana
Uban Pa
Pagmata!—2014
g 9/14 p. 4-7

PANGUNANG TOPIKO

Kon Unsaon Pagsagubang sa Burnout

Si Anil, nga nagsagubang ug burnout sa trabaho

DILI na mabangbang ang kakapoy ni Anil. Midawat siyag bag-ong trabaho kay taas kini nga posisyon ug dako pag suweldo. Apan karon kanunay siyang magtrabaho bisag gabii nang dako ug bisan sa Sabado ug Dominggo, nga usahay moabot pag 80 oras sa usa ka semana. “Ang akong trabahoan gubot,” siya miingon, “ug ako pay responsable sa tanan. Nakaingon ko: ‘Unsa ba kining akong nasudlan? Kon dili ko maghimog kausaban, ako ray madaot.’” Si Anil hapit nang ma-burnout.

Ang pagka-burnout sa trabaho dili lang ordinaryong kakapoy ug simpleng tensiyon tungod sa adlaw-adlawng pagtrabaho. Ang mga simtoma sa burnout mao ang dili mawalang kakapoy ug pagbatig grabeng kahigawad ug kalapoy. Kadtong na-burnout sagad mawad-ag gana pagtrabaho, walay motibasyon, ug menos ug agi sa trabaho. Sumala sa mga pagtuon, nalangkit usab sa pagka-burnout ang daghang emosyonal ug pisikal nga mga problema.

Unsay hinungdan sa burnout? Sagad, ang sobra ka daghang trabaho. Tungod sa pinansiyal nga problema, pugson sa daghang kompaniya ang mga empleyado sa pag-obertaym, usahay sa gamayng suweldo. Tungod sa teknolohiya karon, dili kalikayan sa uban nga mag-akatar gihapon ug trabaho bisag wala na sa trabahoan, busa ang ilang pribadong kinabuhi mabalda. Ang uban ma-burnout usab tungod sa kawalay kasegurohan sa trabaho, kawalay kagawasan sa ilang pagtrabaho, o dili patas nga pagtratar. Maingon man ang walay klarong mga prayoridad o away-away sa mga kauban sa trabaho.

Posible usab nga tagtungod mismo ang naka-burnout sa iyang kaugalingon. Sa pagpangagpas sa pagkab-ot sa ilang gitinguhang mga posisyon ug nga modako ang kita, ang uban modawat ug dugang mga trabaho. Sila tingali dedikado ra kaayo sa trabaho ug makita na lang nila nga sila paingon na sa pagka-burnout.

Kon ikaw burnout na sa trabaho, unsay imong himoon aron ka maalibyohan? Tinuod, ang paghimog kausaban morag imposible kon sa imong hunahuna wala ka nay mahimo sa situwasyon. Apan, tagda ang upat ka paagi sa pagsagubang sa pagka-burnout. Basig duna ka pay mahimo.

1. KLAROHA KON UNSA GAYOY IMONG PRAYORIDAD.

Malipayong pamilya

Unsa ang labing importante kanimo? Tingali importante sa daghang tawo ang pamilya ug maayong panglawas. Kini ang lagmit maapektohan kon ikaw burnout na.

Kon klarohon nimo kon unsa gayoy imong prayoridad, imong giandam ang imong kaugalingon sa paghimog lisod nga mga desisyon ug sa pagdawat sa resulta niini. Pananglitan, tingali imong nakita nga ma-burnout ka na sa imong trabaho. Apan basig mangatarongan ka, ‘Dili ko puwedeng mobalhin ug trabaho o motrabaho ug menos; nagkinahanglan kog kuwarta!’ Tinuod, ang tanan nagkinahanglag kuwarta, apan unsa ka daghan ug unsay epekto niini diha sa mga butang nga importante kanimo?

Ayaw pagpaimpluwensiya sa pagsunod sa prayoridad sa uban. Ang prayoridad sa imong amo ug ang imong prayoridad lahi. Tingali mas importante sa uban ang trabaho, apan wala kini magpasabot nga mosunod ka kanila.

PRINSIPYO SA BIBLIYA: ‘BISAG ANG USA KA TAWO ADUNAY KADAGAYA, ANG IYANG KINABUHI WALA MAGAGIKAN SA MGA BUTANG NGA IYANG GIPANAG-IYA.’—LUCAS 12:15

2. PASIMPLEHA ANG IMONG KINABUHI.

Pagkaon

Aron makabatog panahon para sa mga butang nga importante kanimo ug dili kaayo matensiyon, mahimo nimong pakubsan ang imong oras sa pagtrabaho, mahimo nimong kombinsihon ang imong amo sa pagpamenos sa imong mga trabahoon, o kaha mobalhin kag laing trabaho. Bisag unsa pay imong desisyon, kinahanglang mag-usab ka sa imong paagi sa paggasto ug pagkinabuhi. Apan kini dili imposible ug dili ingon ka lisod kay sa imong gihunahuna.

Sa daghang kayutaan, ipakita sa tawo nga hilig mamalit ug mamaligya nga magmalipayon lang ang usa kon siya dakog suweldo ug daghag kabtangan. Pero dili kini tinuod. Ang tawo nga simpleg kinabuhi mas kontento ug malipayon. Aron maandam niini nga kausaban, ayaw pagsigeg gasto ug unya pagtigom. Limitahe o bayri ang mga utang. Ipakig-estorya kini sa pamilya, ug pangayo sa ilang kooperasyon.

PRINSIPYO SA BIBLIYA: “KON KITA ADUNAY MAKAON UG IKABESTI, KITA MAGMAKONTENTO NA NIINING MGA BUTANGA.”—1 TIMOTEO 6:8

3. PAGTUON SA PAGBALIBAD.

Kon sobra na ka daghan ang imong trabaho o dunay problema sa trabahoan nga wala masulbad, pakigsulti sa imong amo. Kon posible, paghatag ug mga solusyon nga mauyonan ninyong duha. Pasaligi ang imong amo nga seryoso ka sa imong trabaho, ug isulti kaniya kon unsay andam nimong himoon; pero iklaro kaniya ang trabaho nga dili nimo mahimo ug barogi kana.

Tawo nga nagtudlo sa iyang relo

Magmaalamon ug magmarealistiko. Kon dili ka gustong hatagag dugang trabaho, ang imong amo maglaom nga modawat kag menos nga suweldo. Dahoma ang posibleng mga problema sama sa pagkatangtang sa trabaho, ug andama ang imong kaugalingon. Timan-i nga mas dako kag tsansa nga makakitag laing trabaho kon may trabaho ka pa.

Bisag duna na kamoy gikasabotan sa imong amo, dahoma nga sa umaabot pugson ka niya sa pagdawat ug dugang trabaho. Unsay makatabang nimo aron dili ka madala? Tumana ang inyong gikasabotan. Kon motuman ka, may katarongan ka sa paghangyo sa imong amo nga tumanon pod niya ang iyang bahin, lakip sa gidaghanon sa trabaho nga ihatag kanimo.

PRINSIPYO SA BIBLIYA: “HIMOA LANG ANG INYONG PULONG NGA OO MAGKAHULOGAN UG OO, ANG INYONG DILI, DILI.”—MATEO 5:37

4. PAGRELAKS.

Bisag wala kaayoy dagkong problema ang imong trabaho, dili gihapon nimo malikayan ang tensiyon, mga tawong lisod ikauban, ug lisod nga mga situwasyon. Busa pahulay ug paglingawlingaw pod. Hinumdomi nga ang kalingawan dili kinahanglang gastoso aron ikaw ug ang imong pamilya makalingawlingaw.

Babaye nga nagbasabasa aron makapahayahay

Pagpakitag interes sa ubang butang ug pakighigala usab niadtong dili nimo kauban sa trabaho, ug ayaw sukda ang imong kaugalingon base sa matang ug gidaghanon sa imong trabaho. Ngano? Ang librong Your Money or Your Life nag-ingon: “Ang imong pagkatawo mas importante kay sa imong trabaho.” Kon ang imong pagkatawo ug pagtamod sa kaugalingon nagdepende lang sa imong trabaho, nan ang trabaho maoy imong hatagag importansiya.

PRINSIPYO SA BIBLIYA: “MAS MAAYO PA ANG USA KA HAKOP NGA PAHULAY KAY SA DUHA KA HAKOP NGA KAHAGO UG PAGGUKOD SA HANGIN.”—ECCLESIASTES 4:6

Makahimo ka bag kausaban nga gikinahanglan aron masagubang ang pagka-burnout? Oo, sama kang Anil nga gihisgotan sa sinugdan niini nga artikulo. Siya miingon: “Gikontak nako ang akong amo sa una ug ako siyang gihangyo kon mosugot ba siya nga mobalik ko pagtrabaho, ug siya misugot. Naulaw ko sa akong mga kauban sa trabaho kaniadto human nako sila gisultihan nga mangita kog mas maayong oportunidad. Ug misugot ko sa gamay nga suweldo. Pero malinawon na kog hunahuna, ug mas daghan kog panahon sa akong pamilya ug sa ubang butang nga mas importante kanako.”

NAULIAN SA PAGKA-BURNOUT

Si Wayne ug Marie magtiayon nga mga 30 anyos nga taga-Amerika.

Nganong na-burnout mo?

Wayne: Daghan mig negosyo ug nagkautang-utang. Gusto ko nga modako ang akong negosyo aron moharuhay ang kinabuhi ug modako ang kita sa menos nga hago. Gusto ko nga dili kaayo ko matensiyon, apan lahi kinig epekto kanako.

Sa unsang paagi kamo naapektohan?

Wayne: Among nakita nga ang tanang butang nga gihagoan namog maayo aron mabatonan—nindot nga mga sinina, dakong balay, ug luho nga bakasyon—wala makapalipay namo. Mibati kog kaluya, ug nawad-an kog gana sa pagtrabaho.

Marie: Ang akong panglawas naapektohan hasta ang among kaminyoon. Ug kami pirmeng maglalis.

Giunsa ninyo pagpasimple ang inyong kinabuhi?

Wayne: Gipamalandong namo ang among tumong ug situwasyon. Gimenosan namo ang mga galastohan sa among negosyo. Mibalhin kog opisina nga dili kaayo mahal ug abang. Ang akong mahalong awto giilisan nakog dili kaayo mahal. Ang dako nakong negosyo akong gipagamyan. Gipakubsan namo ang among galastohan.

Marie: Abi nakog lisod magpasimple sa kinabuhi. Kami panagsa na lang mangaon sa restawran. Kami maglakawlakaw, ug miarang-arang ang among panglawas. Sa ulahi, kami nagpartaym ug trabaho ug nagboluntaryo.

Unsay resulta sa inyong gihimong kausaban?

Marie: Wala na namo isentro ang among kinabuhi sa pagpangitag kuwarta. Giuna namo ang mas importanteng mga butang, ug milig-on ang among kaminyoon.

Wayne: Malinawon ug mas malipayon na kami karon.

    Cebuano Publications (1983-2025)
    Log Out
    Log In
    • Cebuano
    • Ipasa
    • Setting
    • Copyright © 2025 Watch Tower Bible and Tract Society of Pennsylvania
    • Kondisyones sa Paggamit
    • Polisa sa Pribasiya
    • Mga Setting sa Pribasiya
    • JW.ORG
    • Log In
    Ipasa