Batan-ong lalaki na-stress tungod sa teknolohiya, sport, lingawlingaw, ug pag-eskuyla

MGA BATAN-ON NANGUTANA

Unsay Akong Himoon Aron Dili Ko Ma-burnout?

Paminaw ba nimo hapit na kang ma-burnout? Kon oo, kini nga artikulo makatabang nimo!

Kon nganong mahitabo ni

Sobra ka daghan ang kinahanglang himoon. “Sa tanang bahin sa kinabuhi,” miingon ang batan-ong si Julie, “ginasultian ta nga dapat mas hawod ta, mag-improve, mag-set ug mas taas nga goal ug molampos. Lisod gyod kon pirme tang pressured!”
Teknolohiya. Tungod sa mga smartphone, tablet, ug ubang gadget, puwede tang maka-online pirme ug makontak dayon sa uban. Kini makapa-stress nato ug sa kadugayan makapa-burnout.
Kulang ug Tulog. “Tungod sa trabaho, eskuyla, ug lingawlingaw, daghang batan-on ang late na matulog ug sayong momata, nahibalo silang dili ni maayo pero wala silay mahimo,” miingon ang batan-ong si Miranda. Kana sagad moresulta ug pagka-burnout.

Kon nganong dili ni maayo

Ang Bibliya nag-ingon nato nga magkugi. (Proverbio 6:6-8; Roma 12:11) Pero wala ni mag-ingon nga magpasobra tag kugi hangtod nga maapektohan na ang tanang bahin sa atong kinabuhi—apil ang atong panglawas.

“Kas-a, wala ko nakamatikod nga tibuok adlaw diay kong walay kaon. Napokus kog maayo sa pag-asikaso sa daghang responsabilidad nga akong gidawat. Nakat-onan nako nga maayo pod diayng mobalibad panagsa ilabina kon mameligro na ang imong panglawas.”—Ashley.

Tinuod ang giingon sa Bibliya: “Ang buhing iro mas maayo pa kay sa patay nga leyon.” (Ecclesiastes 9:4) Kon pugson nimo ang imong kaugalingon sa paghimog labaw kay sa imong makaya, basin maghunahuna ka nga ang imong kusog parehas sa leyon pero temporaryo lang na. Kadugayan ma-burnout ka ug makadaot na nimo.

Ang imong mahimo

Balibad kon dili na kaya. Ang Bibliya nag-ingon: “Ang kaalam anaa sa mga makasaranganon.” (Proverbio 11:2) Ang tawong makasaranganon nahibalo sa iyang limitasyon ug dili siya modawat ug mas daghang responsabilidad kay sa kaya niyang himoon.

“Ang pinakadakog posibilidad nga ma-burnout mao tong dili makamaong mobalibad, nga modawat ug daghang responsabilidad bisag dili na niya kaya. Dili na makasaranganon. Kadugayan, moresulta nag pagka-burnout.”—Jordan.
Pahulayg sakto. Ang Bibliya nag-ingon: “Mas maayo pa ang usa ka hakop nga pahulay kay sa duha ka hakop nga kahago ug paggukod sa hangin.” (Ecclesiastes 4:6) Giingon nga ang pagtulog maoy “pagkaon sa utok.” Ang mga tin-edyer kinahanglang matulog ug 8 hangtod 10 ka oras kada gabii pero kadaghanan nila wala makahimo niana.

“Sagad late na kong matulog kon hectic kaayo ang akong schedule. Pero kon natulog na lang unta kog sayo, mas daghan pa kog mahimo ug mas abtik pagkasunod adlaw.”—Brooklyn.
Magmaorganisado. Ang Bibliya nag-ingon: “Ang mga plano sa kugihan mosangpot gayod sa kaayohan.” (Proverbio 21:5) Tun-i kon unsaon nimo pag-organize ang imong panahon ug buluhaton. Magamit na nimo sa tibuok nimong kinabuhi.

“Usahay kita ra poy hinungdan kon nganong ma-stress ta. Pero malikayan na kon mogamit tag planner. Kon makita dayon nimo ang imong schedule, dali ra kang makahimog mga adjustment aron dili ka ma-burnout.”—Vanessa.

Ang giingon sa ubang batan-on

“Ang uban ma-burnout kay naningkamot silang makakuwartag dako. Pero ang 1 Timoteo 6:8 nag-ingon nga magmakontento sa pangunang mga panginahanglan. Maayo ni nga pahinumdom sa pagkinabuhing simple ug dili sobrang maghago para sa mga butang nga wala kinahanglana.”—Gianna.

“Ang paghimog schedule kada semana nakatabang gyod nako. Tong wala pa nako ni himoa, dili ko mobalibad sa mga responsabilidad nga ihatag sa akoa bisag dili nako kaya. Tungod ana, ma-stress ko ug dili na hinuon mahuman ang ubang buluhaton.”—Waylon.

“Seguro naghunahuna ka nga kinahanglan gyod nimong dawaton ang tanang imbitasyon ug dili ka malipay kon naa kay balibaran. Pero sayop diay na. Mas magmalipayon ka ug dili kaayo ma-stress kon naa kay igong panahon sa pagrelaks.”—Kara.