Pagkahimong Responsable

UNSAY NALANGKIT SA PAGKAHIMONG RESPONSABLE?

Kasaligan ang tawong responsable. Buhaton niya ang gipatrabaho kaniya ug humanon kini sa saktong panahon.

Bisag limitado pag mahimo ang mga bata, puwede silang makakat-on nga mahimong responsable. Ang librong Parenting Without Borders nag-ingon: “Dihang ang bata 15 ka bulan na, makamao na siyang mosunod sa isulti sa iyang ginikanan, ug dihang siya 18 ka bulan na, gusto na niyang sundogon ang ginahimo sa iyang ginikanan. Sa daghang lugar, gitudloan na sa mga ginikanan ang ilang mga anak sa pagtabang ilabina dihang mag-edad ug singko hangtod siyete, maong bisag bata pa daghan na silag nahibaloang trabaho sa balay.”

NGANONG IMPORTANTE ANG PAGKAHIMONG RESPONSABLE?

Ang terminong “boomerang generation” nagtumong sa mga batan-on nga mibiya sa balay ug nagkinaugalingon pero mibalik sa poder sa ilang ginikanan kay naglisod sa kinabuhi. Sa pipila ka kahimtang, kini nahitabo kay ang maong mga batan-on wala matudloi kon unsaon pagbadyet, pag-atiman sa balay, o pagkahimong responsable.

Busa mas maayong bansayon na nimo karon ang imong mga bata aron mahimo silang responsable inigdako nila. Ang librong How to Raise an Adult nag-ingon: “Dili maayo nga magdepende lang nimo ang imong mga anak hangtod sa ilang pag-edad ug 18 unya pasagdan na dayon sila.”

KON UNSAON PAGTUDLO ANG PAGKAHIMONG RESPONSABLE

Pag-asayn ug mga buluhaton.

PRINSIPYO SA BIBLIYA: “Ang tanang paghago naay kaayohan.”​—Proverbio 14:23.

Ang mga bata ganahang motabang sa ilang ginikanan. Puwede nimo kining pahimuslan pinaagi sa paghatag nilag mga buluhaton sa balay.

Ang ubang ginikanan nagduhaduha sa paghimo niana. Para nila, gikapoy na ang ilang mga bata sa daghan kaayong homwork sa eskuylahan, busa dili na nila gustong mahago pag dugang ang ilang mga bata.

Pero ang mga bata nga nagatabang sa mga buluhaton sa balay mas may purohang molampos sa pag-eskuyla, kay ang maong mga buluhaton magtudlo nila nga dawaton ug humanon ang bisan unsang asaynment ug buluhaton nga ihatag kanila. Ang librong Parenting Without Borders midugang nga “kon balewalaon nato ang tinguha sa bata sa pagtabang, maghunahuna sila nga dili importanteng motabang . . . Magdahom sab sila nga ang uban maoy mohimo sa mga buluhaton para nila.”

Gipakita sa maong libro nga ang paghimo sa mga buluhaton sa balay magbansay sa mga bata nga mahimong matinabangon imbes kaugalingon lang ang hunahunaon, nga mahimong tighatag imbes tigdawat. Ang mga buluhaton sa balay makapaamgo sa mga bata nga naa silay pulos ug responsabilidad sa pamilya.

Tabangi ang imong anak nga manubag sa iyang sayop.

PRINSIPYO SA BIBLIYA: “Paminaw sa tambag ug dawata ang disiplina, aron mahimo kang maalamon sa umaabot.”​—Proverbio 19:20.

Dihang masayop ang imong anak​—pananglitan makadaot siyag butang sa laing tawo—​ayawg taboni ang iyang sayop. Tabangi siyang angkonon ang iyang sayop, mangayog pasaylo, ug kon mahimo bayran o ilisan ang iyang nadaot.

Ang pag-angkon sa sayop ug kapakyasan magtudlo sa imong anak nga

• mahimong matinud-anon ug motug-an sa iyang sayop

• dili mamasangil sa uban

• dili mangrason o mangitag lusot

• mangayog pasaylo kon gikinahanglan