Ang Diyos Misulay sa Pagtuo ni Abraham

MAKITA mo ba unsay gibuhat ni Abraham dinhi? May gikuptan siyang kutsilyo ug daw buot niyang patyon ang iyang anak. Ngano man kaha nga iyang buhaton gayod kana? Una, tan-awon ta sa unsang paagi si Abraham ug si Sara nakabaton sa ilang anak.

Hinumdomi, ang Diyos nagsaad kanila nga makabaton sila ug usa ka anak lalaki. Apan kana daw dili mahimo, tungod kay si Abraham ug si Sara maoy tigulang na kaayo. Bisan pa gituhoan ni Abraham ang saad sa Diyos. Busa unsay nahitabo?

Sa dihang si Abraham 100 ka tuig ang edad, ug si Sara 90 ka tuig ang edad, ang Diyos mituman sa iyang saad. Sila nakabaton sa usa ka batang lalaki nga ginganlan Isaac!

Apan sa dihang si Isaac huhamtong na, si Jehova nagsulay sa pagtuo ni Abraham. Miingon siya: ‘Dad-a ang imong anak nga si Isaac ug tungas ngadto sa usa ka bukid nga akong ipakita kanimo. Didto patya ang imong anak ug itanyag siya ingon nga usa ka halad.’ Apan hinumdomi, ang Diyos nagsaad nga ang kaanakan ni Abraham magpuyo sa yuta sa Canaan. Apan unsaon kana sa pagkahitabo kon si Isaac patay na? Si Abraham wala makasabot, apan sa gihapon siya misugot sa Diyos.

Sa dihang nahiabot siya sa bukid, si Abraham migapos kang Isaac ug nagpahaluna kaniya sa ibabaw sa halaran nga iyang gitukod. Apan sa gutlo gayod nga iya na untang patyon si Isaac, ang manulunda sa Diyos mitawag: ‘Abraham, ayaw unsaa ang bata. Karon ako nahibalo nga ikaw may pagtuo kanako, tungod kay wala nimo ihikaw ang imong bugtong anak gikan kanako.’

Pagkadako ang pagtuo ni Abraham sa Diyos! Nagtuo siya nga si Jehova makabanhaw gani kang Isaac gikan sa mga patay. Apan ang Diyos sa pagkatinuod wala magtinguha nga patyon ni Abraham si Isaac. Busa ang Diyos nagpahinabo nga mabitik ang usa ka karnero sa haduol nga kupongkupongan, ug nagsulti kang Abarahm sa paghalad niini inay sa iyang anak.