Sa Bukid sa mga Olivo

KINI mao si Jesus sa ibabaw sa Bukid sa Olivo. Ang upat ka tawo uban kaniya mao ang iyang mga apostol. Sila mao si Andres, Pedro, Santiago ug Juan. Nakita ba nimo ang templo sa Diyos sa Jerusalem sa halayo?

Martes kadto, duha ka adlaw human si Jesus mosakay sa nating asno paingon sa Jerusalem. Sayo sa maong adlaw, ang mga saserdote misulay sa pagdakop kang Jesus ug pagpatay kaniya. Apan sila nahadlok sa pagbuhat niini tungod kay ang katawhan nakagusto man kang Jesus.

Si Jesus misulti niining relihiyosong mga pangulo nga ang Diyos magsilot kanila tungod sa tanang daotang mga butang nga ilang nahimo. Human niana, si Jesus mitungas sa Bukid sa Olivo, ug kining upat ka apostol misugod sa pagsukna kaniyag mga pangutana. Buot silang masayod kanus-a si Jesus motapos sa tanang pagkadaotan ug moanhi pag-usab sa pagmando ingon nga Hari.

Si Jesus nahibalo nga ang iyang mga sumusunod sa yuta dili makahimo sa pagkakita kaniya kon siya moanhi pag-usab. Kini sa katarongan nga siya atua sa langit. Busa si Jesus misulti sa iyang mga apostol sa pipila sa mga butang nga magakahitabo sa yuta kon siya magmando ingon nga Hari didto sa langit.

Si Jesus misulti nga adunay dagkong mga gubat, daghang katawhan ang masakit ug magutman, ang krimen mahimong grabe kaayo ug adunay dagkong mga linog. Si Jesus usab miingon nga ang maayong balita mahitungod sa gingharian sa Diyos igawali sa tanang dapit sa yuta. Nakita ta ba kining mga butanga nga nagakahitabo sa atong panahon? Oo! Busa kita makahimo sa pagpaneguro nga si Jesus karon nagmando na sa langit. Sa dili madugay siya motapos sa tanang pagkadaotan sa yuta.