Pagkaluwas Ngadto sa Usa ka Bag-ong Yuta
Kapitulo 18
Maunongon Ka ba sa Bag-ong Hari sa Yuta?
Sa Nisan 9 sa 33 K.P., gipadayag ni Jesu-Kristo ang iyang kaugalingon sa mga Hudiyo ingong ilang Hari, ang gitagnang Mesiyas. Dihang milugsong siya gikan sa Bukid sa mga Olibo paingon sa Jerusalem, ang panon sa mga disipulo nalipay ug midayeg sa Diyos tungod sa gamhanong mga buhat nga gihimo ni Jesus. (Lucas 19:37, 38; Zacarias 9:9) Apan sila ba nagpabiling maunongon sa Usa nga ilang gihimaya ingong Hari? Ang ilang pagkamaunongon hapit nang masulayan.
2 Sukad sa 1914 ang gihimayang Jesu-Kristo nga aktibong nagmando sa langit gipaila sa tanang katawhan ingon nga mao ang bag-ong hari sa yuta. Ang palaabutong kinabuhi ilalom sa kagamhanan sa mga kamot ni Kristo, nga may tinuod nga mga sulbad sa mga problema sa katawhan, nakahatag sa katawhan sa tanang kanasoran ug kalipay. Apan magpabilin ba silang maunongon? Komusta man kita sa tinagsatagsa?
ANG KAUGALINGONG REKORD SA HARI SA PAGKAMAUNONGON
3 Nakahatag si Jesu-Kristo ug daghang pamatuod nga ang iyang kaugalingong pagkamaunongon kang Jehova, ang Unibersal nga Soberano, malig-on. Tukma siyang gipunting diha sa Kasulatan ingong “maunongong usa” ni Jehova. (Salmo 16:10; Buhat 2:24-27) Ang Hebreohanong pulong sa “pagkamaunongon” nga gigamit dinhi may diwa sa pagkamahigugmaon ug malulot. Dili kini mabugnawng butang, nga gipasukad lamang sa balaod kun katarongan, kondili kini napalihok usab sa gugma ug pagsabot.—Itandi sa Salmo 40:8; Juan 14:31.
4 Sa langit, dihang misugod si Satanas sa pagpangita alang sa iyang kaugalingon ug kadungganan nga angay lamang sa Diyos ug dihang ang ubang mga manulonda mibiya sa ilang tukmang mga dapit sa langitnong organisasyon ni Jehova, ang panganayng Anak sa Diyos wala mosunod sa ilang espiritu. Dili gayod kana niya mahimo! Ingon niana ang iyang nagasakripisyo sa kaugalingong debosyon nga, sa pagtuman sa kabubut-on sa iyang Amahan, kining maunongong Anak mibiya sa iyang langitnong himaya, nahimong tawo ug gani nagpasakop sa kamatayon diha sa kahoy sa pagsakit. Sa mahigugmaon, iyang gipatino, mahitungod kaniya, nga walay detalye nga gilatid sa Kasulatan bahin kaniya nga dili matuman.—Filipos 2:5-8; Lucas 24:44-48.
5 Dihang dinhi pa si Jesus sa yuta, gihatagan siya ni Satanas ug dakong pag-ipit aron madaldal siya sa pagbiya sa buluhaton nga gihatag sa Diyos nga iyang buhaton—kon mahimo, sa pagdani kaniya sa pagbuhat ug usa ka butang nga mopahinabo sa Diyos sa pagsalikway sa iyang Anak. Iyang giagda si Jesus sa paghimog mga butang nga mohatag kabantog ug gahom—apan ingong bahin sa kalibotan nga niini si Satanas mao ang magmamando. Midumili si Jesus, gikutlo ang Balaang Kasulatan ingong iyang giya. (Mateo 4:1-10) Si Jesus adunay tagsaong mga katakos ug iyang gigamit kini sa maayong paagi, apan kanunay nga uyon sa kabubut-on sa iyang Amahan. Okupado kaayo siya sa paghimo sa buluhaton nga alang niini gipadala siya sa Diyos. (Juan 7:16-18; 8:28, 29; 14:10) Unsa ka maayong panig-ingnan sa pagkamaunongon!
6 Tungod sa napamatud-ang pagkamaunongon ni Jesus, gibanhaw siya ni Jehova gikan sa mga patay, “gituboy siya sa kinatas-ang dapit ug malulutong gihatagan siya sa ngalan nga labaw sa tanang mga ngalan, aron nga sa ngalan ni Jesus mangluhod ang tanan . . . ug ang tanang dila magasugid nga Ginoo si Jesu-Kristo alang sa kadayegan sa Diyos nga Amahan.” (Filipos 2:9-11) Kining “ngalan nga labaw sa tanang mga ngalan” naghawas sa gahom ug awtoridad nga gihatag kang Jesus aron matuman niya ang kabubut-on ni Jehova. ‘Ang pagluhod’ ngadto kaniya nagkahulogan sa pag-ila sa iyang hataas nga kahimtang ug magpasakop sa iyang awtoridad. Lakip niini ang maunongong pagpasakop diha kaniya ingong Hari.
MAUNONGONG GUGMA ALANG SA MGA DINIHOGAN NI JEHOVA
7 Ang kamatuoran nga, tapos sa iyang pagkayab sa langit, dili na makita si Jesus sa tawhanong mga mata moresultag nagatugkad sa kasingkasing nga mga pagsulay sa pagkamaunongon sa iyang mga sumusunod. Magkinabuhi ba sila sa mga prinsipyo nga iyang gitudlo kanila? Magpabilin ba silang dili bahin sa kalibotan? Tahuron ba nila kadtong gihatagan sa balaang espiritu sa mga responsibilidad sa pagdumala? Bug-os ba ang ilang kasingkasing sa pagbuhat sa buluhaton nga iyang gihatag kanila?
8 Sa tinudlong panahon ang “ubang mga karnero” tigomon sa ngadto sa pag-ubanay sa “gamayng panon” sa mga manununod sa langitnong Gingharian. Tinuod ba nilang pabilhan ang ilang natudlong mga katungdanan maylabot kang Kristo ingong Hari ug sa usag usa? Ang mga kamatuoran nagpakita nga ang tinuod mutuwal nga gugma milambo sa tanan nga nahimong bahin sa “usa ka panon” ilalom ni Jesu-Kristo. Kini gilandongan sa dili-mabuak, dili-mamatayng gugma ni Jonathan, nga anak ni Haring Saul, alang kang David. Dihang nakasaksi sa bug-os nga pagmahal ni David kang Jehova ug sa iyang pagsalig sa Diyos sa pagpatay sa higanteng si Goliat, natandog pag-ayo si Jonathan ug ang iyang “kalag nalanggikit sa kalag ni David, ug si Jonathan nahigugma kaniya ingon sa iyang kaugalingong kalag.” Ang iyang gugma wala mahanaw dihang napadayag nga ihatag ni Jehova ang pagkahari kang David ug dili kang Jonathan. Gani masubsob nga gipameligro ni Jonathan ang iyang kinabuhi alang kang David.—1 Samuel 17:45-47; 18:1; 23:16, 17.
9 Gawas kang Jonathan, dihay dili mga Israelinhon nga nagmahal kang David. Sila dili mga sinuholan sa pagpakig-away kondili maisogong mga lalaki nga milihok tungod sa ilang pagmahal kang David ingong dinihogan ni Jehova. Lakip niini ang mga Ceretihanon, Peletihanon ug ang mga pumoluyo niadto sa siyudad sa Pelestina sa Gath. Sila maunongong nagpabilin kang David bisag ang iyang anak nga si Absalom malimbongong nanglimbasog sa pagkawat sa pagmahal sa mga lalaki sa Israel. Bisan pa sa pagkainila ug pagkamaliputon ni Absalom, wala sila magpadala sa mabudhiong dalan pinaagi sa iyang maayong mga pulong.—2 Samuel 15:6, 10, 18-22.
10 Laing makalipay sa kasingkasing nga pagkabatbat sa relasyon ni Kristo, sa dinihogang nanghibilin ug sa “ubang mga karnero” makita diha sa Salmo 45. Dili lamang kini matahom nga balak kondili matagnaon maylabot sa Mesiyanikong Gingharian—ang Diyos mismo mao ang “trono,” sa ato pa, ang patukoranan ug haligi sa pagkahari ni Jesus. (Salmo 45:1-7; Hebreohanon 1:8, 9) Gibatbat sa salmista ang pangasaw-onon ni Kristo, “ang anak nga babaye sa hari,” nga gidala sa atubangan sa Hari sa adlaw sa iyang kasal. Uban kaniya “ang mga ulay . . . nga iyang mga kauban.” Kinsa sila? Sila mao kadtong nagalaom nga mahimong yutan-ong mga sakop sa Gingharian sa Diyos. “Uban sa kalipay ug pagmaya” sila mikuyog sa “pangasaw-onon” mga matang hangtod ang kataposang sakop niini mahiusa uban kang Kristo sa langit. Uban kanila, sila “mosulod sa palasyo sa hari,” dili pinaagi sa pagkayab sa langit, kondili sa paghalad sa ilang kaugalingon alang sa pag-alagad sa Hari. Bahin ka na ba nianang malipayong prosesyon?—Salmo 45:13-15.
UNSAY GIKINAHANGLAN ALANG KANATO SA PAGKAMAUNONGON
11 Ang dili-maisip nga mga kahimtang sa kinabuhi nagpadayag kon unsang matanga kita nga pagkatawo. Nagtuo ba gayod kita sa Mesiyanikong Gingharian sa Diyos? Tinuod ba kini alang kanato? Si Jesus miingon nga ang iyang tinuod nga mga sumusunod “dili bahin sa kalibotan.” Tinuod ba kana kanimo?—Juan 17:15, 16.
12 Maylabot kanatong dili-hingpit nga mga tawo, ang pagkamaunongon wala magpangayog kahingpitan. Apan nagkinahanglan kini nga likayan nato ang tinuyong paglapas sa kasugoan sa Bibliya, makakita man ug dili ang ubang mga tawo kanato. Kini mopalihok kanato sa pagpaningkamot sa bug-os nga pagpadapat sa mga prinsipyo sa Bibliya, inay tan-awon nato kon asa kutob kita makaduol sa mga paagi sa kalibotan. Kini mopahimo kanato sa pag-ugmad sa tinuod nga pagdumot sa daotan.—Salmo 97:10.
13 Kon tinuod natong dumtan ang daotan, dili nato tugotan ang pagkamausisaon sa pagdani kanato sa pagduol niana. Ang pagkamausisaon sa kinabuhi sa mga tawong imoral sa sekso moagak sa usa ngadto sa kalaglagan. (Proverbio 7:6-23) Busa, ang espirituwal nga kadaot moagpas kanila nga tungod sa pagkamausisaon mopalit ug mobasag mga basahon nga gipatik sa mga apostata, mga tawo nga mibiya kang Jehova ug sa iyang organisasyon ug nga kinsa “nagapamospos” sa ilang mga kaubanan kanhi. (Mateo 24:48-51) Ang Proverbio 11:9 mipasidaan: “Pinaagi sa iyang baba ang usa ka apostata mohatag kalaglagan sa iyang isigkatawo.” Apan ang pagkamaunongon mopanalipod kanato batok sa pagkahisalaag sa ilang maayong mga pulong.—2 Juan 8:11.
14 Ang usa sa labing hinungdanong mga paagi nga atong mapasundayag ang pagkamanunongon mao ang pagkahimong bug-os kalag diha sa buluhaton nga gitudlo ni Jesus nga buhaton sa iyang mga disipulo. Siya mismo mihatag sulondan pinaagi sa pag-adto sa siyudad ngadto sa siyudad ug sa balangay ngadto sa balangay, nga nagwali sa maayong balita sa Gingharian sa Diyos. (Lucas 8:1) Gitagna ni Jesus kon unsay buhaton karon sa tinuod nga mga Kristohanon dihang miingon siya: “Kining maayong balita sa gingharian igawali sa tanang kanasoran; ug unya moabot ang kataposan.” (Mateo 24:14) Pinaagi niining pagwali sa maayong balita nga ang isyu sa Gingharian mapadayag sa mga tawo sa tanang dapit aron sila makahimog personal nga desisyon. Alang sa dakong panon, kanang desisyona motultol ug kaluwasan latas sa dakong kasakitan. (Pinadayag 7:9, 10) Ikaw ba maunongong nagapakigbahin niining dinaliang buluhaton?
15 Sa dugay nang katuigan kanhi si salmistang David misulat: “Ang tanan mong mga buhat managdayeg kanimo, O Jehova, ug ang imong mga maunongon managhimaya kanimo. Sila managsulti mahitungod sa himaya sa imong pagkahari, ug mahitungod sa imong pagkagamhanan sila managsulti, aron nga ang imong mga buhat nga gamhanan igapadayag ngadto sa mga anak sa tawo ug ang himaya sa pagkahalangdon sa iyang pagkahari. Ang imong pagkahari maoy pagkahari nga walay kataposan, ug ang imong gingharian magapadayon sa tanang kaliwatan.” (Salmo 145:10-13) Kanang maong pagkahari karon ginapalihok pinaagi sa Mesiyanikong Gingharian diha sa maunongong kamot ni Jesu-Kristo, ug atong gipasundayag ang atong pagkamaunongon sa Diyos ug Kristo pinaagi sa libre ug madasigong pagpahayag mahitungod niana.
16 Unsang dakong bahin sa imong kinabuhi ang nahatag mo sa buluhaton sa pagsangyaw sa Gingharian? Giuna mo ba kini kay sa ubang mga pangagpas? Tingali mas dako ang imong nahimo o mas menos kay sa nahimo sa uban. Nagkalainlain ang mga sirkumstansiya sa mga indibiduwal. Apan kitang tanan makabatog kaayohan pinaagi sa pagbangon ug mga pangutana alang sa atong kaugalingon sama niini: ‘Ang ako bang bahin nagapabanaag nga usa lamang ka yanong katungdanan kini, pagpakaaron-ingong paghalad? Gilantaw ko ba kini ingong usa lamang ka kinahanglanon alang sa kaluwasan? O ang gugma ba alang kang Jehova, ug debosyon sa iyang Mesiyanikong Hari ug tinuod nga kabalaka sa akong isigkatawo ang nagpalihok kanako sa pag-una niini labaw sa tanan aron ang ubang mga intereses sa akong kinabuhi masentro diha niini?’ Ang pagkamaunongon mopalihok kanato sa pagpangitag mga paagi sa pagpasundayag nga kining buluhatona importante kanato sama nga importante kini sa atong Hari.
17 Sa dili madugay ang Usa nga malipayong gibayaw ingong Hari sa iyang mga disipulo dihang misulod siya sa Jerusalem sa 33 K.P. molaglag sa tanang mosalikway sa pagkasoberano ni Jehova sumala sa gipahayag sa Iyang Mesiyanikong Hari. Apan siya “magasultig pakigdait” ngadto sa “dakong panon” sa mga tawo gikan sa tanang kanasoran nga nagasundog sa iyang kaugalingong panig-ingnan sa pagkamaunongon. Usa ba unya ikaw kanila?—Zacarias 9:10; Efeso 4:20-24.
[Mga Pangutana nga Pagatun-an]
1. Dihang gipaila si Jesus ingong Hari sa 33 K.P., sa unsang paagi misanong ang panon sa katawhan?
2. (a) Unsay reaksiyon sa daghang tawo karon sa pahibalo nga si Kristo mao ang bag-ong Hari sa yuta? (b) Apan unsang mga pangutana ang takos hatagan ug seryosong pagtagad?
3. (a) Nganong gipunting si Jesus ingong “maunongong usa” ni Jehova? (b) Unsa ang pagkamaunongon?
4, 5. (a) Sa unsang paagi gipakita ni Jesus ang pagkamaunongon sa langit, tapos sa pag-alsa ni Satanas? (b) Sa unsang paagi gipakita kanang maong pagkamaunongon dinhi sa yuta?
6. Sa unsang paagi ang ganti nga gihatag kang Jesus nagkinahanglag atong pagkamaunongon?
7. Mahitungod sa unsang mga butanga nga masulayan ang mga sumusunod ni Jesus maylabot sa ilang pagkamaunongon?
8. Unsay gilandongan sa maunongong gugma ni Jonathan ug David?
9. Sa unsang paagi ang samang pagkamaunongon gipakita sa mga dili-Israelinhon nga nag-alagad sa kasundalohan ni David?
10. (a) Sa unsang paagi gilarawan sa Salmo 45 ang suod nga relasyon ni Kristo, sa dinihogang nanghibilin ug sa “ubang mga karnero”? (b) Sa unsa nga diwa nga ‘ang ulay nga mga kauban misulod sa palasyo sa hari’?
11. Unsang mga situwasyon nga kita masulayan maylabot sa pagkahimong “dili bahin sa kalibotan”?
12. Bisag dili kita hingpit, unsang ubang mga paagi nga makahatag kitag pamatuod sa pagkamaunongon?
13. Sa unsang paagi ang pagkamaunongon makapanalipod kanato batok sa maayong mga pulong sa mga apostata?
14. (a) Unsa ang usa sa labing importanteng mga paagi diin atong mapasundayag ang atong pagkamaunongon kang Kristo ingong Hari? (b) Nganong importante kaayo kining buluhatona?
15. (a) Unsay gipamulong sa Salmo 145:10-13 nga maoy hisgotan sa mga maunongon ni Jehova? (b) Sa unsang paagi aplikado kini kanato?
16. Sa unsang paagi ang pagkamaunongon makaimpluwensiya sa sukod sa atong pakigbahin sa pagsangyaw sa Gingharian ug sa motibo sa atong paghimo niana?
17. Kang kinsa nga “magasulti ug pakigdait” si Jesus dihang iyang laglagon ang daotan?