Pagkaluwas Ngadto sa Usa ka Bag-ong Yuta
Kapitulo 20
‘Ang Usa nga Gamay Mahimo nga Usa ka Kusganong Nasod’
KADTONG mga magsisimba ni Jehova sa dugay na diyutay ra sa gidaghanon kon itandi sa populasyon sa tanang tawo. Apan sa atong adlaw ang ilang gidaghanon nagauswag sa gikusgon nga makapalipay sa mga nahigugma sa pagkamatarong. Mahitungod sa gidak-on sa pag-uswag, si Jehova mismo mitagna: “Ang usa nga diyutay mahimo nga usa ka libo, ug ang usa nga gamay mahimo nga usa ka kusganon nga nasod. Ako mismo, si Jehova, magapadali niini sa iyang panahon.” (Isaias 60:22) Sumala sa ginapahayag sa maong kasulatan, si Jehova mismo ang magpatuman niini. Sa unsang paagi? Pinaagi sa iyang pagpalungtad taliwala sa iyang mga alagad sa kahimtang nga magapailang sila lahi kaayo sa mga nasod sa ilang palibot ug kusganong nagadani sa mga tawong buotan ug kasingkasing.
2 Kini gitagna sa Isaias 60:1, 2, diin si Jehova nagatumong sa iyang “babaye,” ang iyang organisasyon nga nalangkoban sa maunongong espiritung mga linalang ingon man sa inanak-sa-espiritung mga anak sa yuta, nga nagaingon: “Tindog, Oh babaye, sidlak, kay ang imong kahayag miabot na ug ang himaya mismo ni Jehova misubang diha kanimo. Kay, tan-awa! ang kangitngit mismo motabon sa yuta, ug ang mabaga nga kangitngit motabon sa kanasoran; apan si Jehova mosidlak sa ibabaw nimo ug sa ibabaw nimo ang iyang himaya makita.” Ang pasikranan sa maong kalainan mao ang pagkatawo sa Mesiyanikong Gingharian diha sa mga kamot ni Jesu-Kristo sa 1914. Maoy niadto nga ang “himaya ni Jehova” misidlak ibabaw sa iyang langitnong organisasyon, nga nagpakatawo sa Gingharian. May hinungdan sa dakong pagsadya sa ilang taliwala. (Pinadayag 12:1, 2, 5, 10-12) Ug sa yuta ang dinihogang nahibilin sa mga manununod sa Gingharian miambit sa maong kalipay. Sugod sa 1919, sila “misidlak” samtang ilang gihimo ang tibuok-kalibotang pagmantala sa Gingharian sa Diyos ingon nga matuod ug bugtong paglaom sa katawhan.—1 Pedro 2:9; Mateo 5:14-16.
3 Sa kasukwahi, sa 1914 ang mga nasod sa kalibotan, kay nag-away aron padayong mahuptan ang ilang kaugalingong paggahom, misulod sa usa ka panahong may kapintasan ug kawalay-kasegurohan nga gikan niana sila wala na gayod hiulii. Ang kakulang sa pagkalig-on sukad niadto nakapaamgo sa daghan nga, bisan pa sa “siyentipikanhong pag-uswag,” sila wala magbaton sa may-kasegurohang kaugmaon nga ilang kasaligan. Sa pagkamatuod, “ang kangitngit mitabon sa yuta.’ Nganong sila dili makakaplag ug lutsanan? Kay ang kanasoran nagsalikway kang Jehova ingon nga Soberano. Sa labing dako, ang pila ra ka magmamando nagaalagad sa ngabil sa usa ka “Diyos” kansang ngalan wala gayod nila gamita. Sila determinado sa pagdumala sa mga butang sa ilang kaugalingon, apan ang tawo walay katakos sa pagsulbad sa mga problema nga ilang giatubang. (Jeremias 8:9; Salmo 146:3-6) Ang presenteng kalibotan, uban ang kadalo ug kahiwian niini, misulod na sa iyang “kataposang mga adlaw.” Walay paagi nga kini makalikay sa kalaglagan nga nagapaabot niini. Ang mga tawo lamang nga nagabutang sa ilang bug-os nga pagtuo sa Gingharian sa Diyos ang makalantaw sa umaabot nga masaligon. Sa nagauswag nga gidaghanon, ang mga tawong buotag kasingkasing nakaamgo niini ug sila aktibong nakig-uban sa mga Saksi ni Jehova, kinsa dili lamang maghisgot sa Gingharian kondili sinserong naningkamot sa pagkinabuhi nahiuyon sa ilang ginawali.
‘ANG USA NGA DIYUTAY MAHIMO NGA USA KA LIBO’
4 Sa natapos ang Gubat sa Kalibotan I, ang pagtigom sa mga manununod sa Gingharian wala pa mahuman. May dugang pang “mga anak lalaki” ug “mga anak babaye” sa langitnong Jerusalem nga gikinahanglan sa pagkompleto sa gitagnang 144,000 nga magamando uban kang Kristo sa langit. Bisan pa niana, gitagna ni Jehova ang pagkatapos niining buluhatona, nga miingon: “Iyahat ang imong mga mata sa palibot ug tan-awa! Silang tanan natigom; sila nanganha kanimo. Ang imong mga anak nga lalaki padayong nanganha gikan sa halayo, ug ang imong mga anak nga babaye nga gisampila.” (Isaias 60:4) Ingong resulta sa pagmantala sa Gingharian nga gihimo sukad ug tapos sa 1919 kaliboan pa ang nagpahinungod sa ilang kaugalingon kang Jehova, nabawtismohan ug nadihogan sa balaang espiritu. Tanantanan sila, hinunoa, ang tibuok pundok sa mga manununod sa Gingharian gihisgotan ni Jehova ingon nga “gamay nga panon” lamang. (Lucas 12:32) Sa pagtuman sa natagna sa Isaias 60:22, tinong may dugang pa nga pagatigomon ngadto sa matuod nga pagsimba. Tinuod nga nahitabo kana!
5 Sila gihisgotan sa Isaias 55:5 niining paagiha: “Tan-awa! ikaw magatawag ug usa ka nasod nga wala mo hiilhi, ug ang iya sa usa ka nasod nga wala mo hiilhi modalagan nganha kanimo. Tungod kang Jehova nga imong Diyos, ug tungod sa Balaan sa Israel, kay sila nagpatahom kanimo.” Kini mao ang mga tawo sa gawas sa espirituwal nga Israel. Sila nagagikan sa daghang nasod apan sila mahimong nahiusang katawhan, ang tanan nagahatag ug maunongong pagpaluyo sa Gingharian sa Diyos. Sila maoy “usa ka nasod” nga niadto wala “hiilhi” sa nahibilin sa espirituwal nga Israel sumala sa ilang pagsabot sa Kasulatan, ni ang maong katawhan sa nangagi gihatagag nahiangayng pag-ila sa mga alagad sa Diyos. Apan ingong sangpotanan sa pagwali sa maayong balita, sila nadani tungod kay sila nakaamgo nga kining espirituwal nga mga Israelinhon nagasimba sa matuod ng Diyos ug tungod kay ilang naila diha kanila ang espirituwal nga katahom nga mahimong resulta lamang sa pagpanalangin sa Diyos.
6 Bisan pa sa tanang gihimo ni Satanas sa pagpugong sa pagsangyaw sa mensahe sa Gingharian ug sa pagpaliso sa pagtagad sa katawhan ngadto sa ubang mga kalihokan, ang kahayag sa kamatuoran nagapadayong nakaabot ngadto pa sa hilit nga mga bahin sa yuta. Ang resulta maoy sumala sa dugay nang matagnaong gisulti sa Diyos ngadto sa iyang “babaye”: “Nianang panahona ikaw makakita ug mosidlak, ug ang imong kasingkasing mangurog ug modako, tungod kay kanimo iuli ang bahandi sa dagat; ang katigayonan mismo sa kanasoran maanha kanimo. . . . Ug ilang igapahayag ang mga pagdayeg kang Jehova.” (Isaias 60:5, 6) Oo, ang “dakong panon” sa mga tawo nga sa nangagi bahin sa “dagat” sa katawhan nga nahimulag sa Diyos, katawhan kansang kinabuhi nangitngitan sa “mabaga nga kangitngit” nga mitabon sa kanasoran, miduyog sa espirituwal nga Israel. Sa panan-aw sa Diyos, kini sila tinuod nga bililhon gikan sa tanang kanasoran.
7 Sa panahon sa pagtukod pag-usab sa templo ni Jehova sa Jerusalem, iyang gidasig ang iyang propetang si Haggeo sa pagpahibalo: “‘Uyogon ko ang tanang nasod, ug ang mga bililhong butang sa tanang nasod moabot, ug kining balaya pun-on ko sa himaya,’ nagaingon si Jehova sa mga panon.” (Haggeo 2:7) Ang maong pag-uyog ug pagpakurog sa kanasoran sa kataposan motultol ngadto sa ilang kalaglagan, apan sa dili pa kana mahitabo “ang bililhong mga butang sa tanang nasod” pagatigomon gikan sa ilang taliwala ug pagadad-on ngadto sa dakong espirituwal nga templo ni Jehova, ang iyang unibersohanong balay sa pagsimba. Dinhi sila makakaplag sa kaluwasan dihang ang kalibotan magun-ob sa kalaglagan. Ang maong buhing mga magsisimba mao ang bililhon kang Jehova. Ang ilang materyal nga bahandi dili mao ang iyang gitinguha. (Miqueas 6:6-8) Ang butang labing bililhon nga ilang ikahatag kang Jehova mao ang ilang tibuok-kalag nga pagsimba. Sila nangabot uban ang mga halad sa debosyon sa kasingkasing ug madasigong pag-alagad, nga silang tanan ‘nagapahayag sa mga pagdayeg kang Jehova.’ Dako gayong kalipay ang gihatag sa ilang pagtungha alang sa maunongong mga alagad ni Jehova sa langit ug sa yuta!
8 Pila ba unya kining mga magsisimba ni Jehova nga nagahambin ug paglaom sa kinabuhi sa usa ka Paraisong yuta? Ang Bibliya wala mohatag ug pihong gidaghanon. Kini bukas sa labing daghang tawo gikan sa tanang nasod nga modawat sa mahigugmaong mga tagana ni Jehova. Apan, usa ka ilhanan kon unsay dahomon makita sa Isaias 60:8, nga nagahubit kanila ingon sa mga salampati “nga nagalupad sama sa usa ka panganod”—usa ka panganod nga makapangitngit sa yuta sa ubos. Kini nagapunting sa kalihokan sa daghang tawo sa hamubong panahon. Tungod sa maong dakong pagsulod sa mga magsisimba ni Jehova, gitagna, “ang usa nga diyutay” sa espirituwal nga Israel “mahimo nga usa ka libo, ug ang usa nga gamay nga usa ka kusganong nasod,” ug si Jehova miingon nga siya “magapadali niini sa iyang panahon.” (Isaias 60:22) Kana mohaom ba sa tinuod nahitabo?
9 Tapos sa unang gubat sa kalibotan may pila ra ka libong aktibong nagpakig-ambit sa paghatag ug publikong pagsangyaw mahitungod sa Gingharian. Sa pagka 1935 sila may total nga duolag 60,000 sa tibuok kalibotan. Sa 1941 ang gidaghanon sa mga magmamantala sa Gingharian milabaw sa 100,000 nga marka. Sa pagka 1953, may kapin sa 500,000. Napulo ka tuig sa ulahi ang ilang gidaghanon usa ka milyon. Sa sinugdanan sa 1984, may 2,652,323. Sa aberids, ilang ginadeboto ang kapin kaayo sa usa ka milyong oras sa usa ka adlaw sa pagpakita sa uban nganong ang Gingharian sa Diyos lamang ang nagahatag ug tinuod nga paglaom alang sa umaabot. Kon itandi sa gidaghanon si kinsa, ingong mga Saksi ni Jehova, nagahatag ebidensiya nga sila mga sakop sa Mesiyanikong Gingharian ni Jehova, pagamatikdang mga 60 ka nasod sa kalibotan karong adlawa may indibiduwal nga mga populasyon nga diyutay pa niining nagakadakong “nasod.” Bisan pa niana, kining linaing “nasod” dili moapil sa kalibotanong politika apan nagadeboto nga linain ngadto sa pag-alagad sa matuod nga Diyos.
10 Kini ba ang kabug-osang katumanan niining tagnaa? Ang nahitabo igo na aron mohaom sa kahubitan sa Bibliya. Ug kahibulongan, usab, kon atong tagdon ang mga sirkumstansiya nga ubos niana kining buluhatona gihimo—ang mga babag nga nabuntog, ang ebidensiya sa balaang pagtultol aron kini molampos, ang debosyong gipakita niadtong nakig-ambit niini. Kahibulongan, usab, ang kausabang gipatungha niini diha sa mga kinabuhi sa mga tawo. Apan ang pag-uswag sa mga tawo nga dayag nagahimo niining pagbarog dapig kang Jehova walay hunong, ni kini mihinay. Sa katuigang dili pa dugay, sa aberids, kapin sa 10,000 kada bulan ang nagapresentar sa ilang kaugalingon alang sa bawtismo sa tubig, ug ang katibuk-ang gidaghanon nagauswag kada tuig. Kini silang tanan, pinaagi sa pagkinabuhi sa ginasimbolohan sa ilang bawtismo, makabaton sa mapasaligong kalaoman nga maluwas ngadto sa “bag-ong yuta.”
11 Kining minilyong tawo dili lamang independenteng mga estudyante sa Bibliya, nga ang matag usa nagaalagad sa Diyos sa iyang kaugalingong paagi. Sila maoy mga tawong mapasakopong nahimong bahin sa makitang organisasyon ni Jehova. Sumala sa atong nakita, ang mga manununod sa Gingharian unang “gitigom.” Karon ang uban nga gikan sa kanasoran, nga may paglaom nga yutan-ong kinabuhi, ‘nanganha kanila.’ (Isaias 60:4, 5) Sila nagkahiusa sa “usa ka panon” ubos sa “usa ka magbalantay,” si Jesu-Kristo. (Juan 10:16) Gibatbat ni apostol Pedro ang matuod nga mga Kristohanon ingong tibuok-kalibotang ‘kapunongan sa mga igsoon,’ ug giawhag sila ni Pablo nga dili magpalain kondili ‘magtigom,’ ug ilabina na samtang nagkahiduol ang adlaw sa pagpatuman sa balaang paghukom. (1 Pedro 5:9; Hebreohanon 10:23-25) Sa maong paagi sila gilig-on ug gisangkapan sa pag-apil sa dakong katuyoan nga alang niini nagalungtad ang maong organisasyon. Ug unsa ba kana? Sa pagbayaw sa ngalan ni Jehova.—1 Pedro 2:9; Isaias 12:4, 5.
USA KA BULUHATON NGA PAGABUHATON
12 Ang tanan nga nakig-uban sa organisasyon ni Jehova sa dili madugay makaamgo nga kadtong sakop niana maoy mga magbubuhat. Sa pagsundog kang Jesu-Kristo silang tanan aktibong mga magwawali sa Gingharian sa Diyos, nga mao ang paagi nga niana ang ngalan ni Jehova mabayaw. Si Jesus mismo miingon: “Kinahanglang akong ipahayag ang maayong balita sa gingharian sa Diyos, tungod kay alang niini ako gipadala.” (Lucas 4:43) Siya maikagong naghisgot bahin sa panginahanglan nga tukoron sa uban ang ilang mga kinabuhi palibot sa pagbuhat sa kabubut-on sa Diyos. Iyang gitudloan ang iyang mga sumusunod sa pagbuhat sa samang buluhatong iyang gibuhat. Alang sa panahong atong ginapuy-an, iyang gitagna nga “kining maayong balita sa gingharian” “igawali sa tibuok gipuy-ang yuta alang sa usa ka pamatuod ngadto sa tanang nasod.” (Mateo 24:14) Kini ang labing hinungdanong buluhaton nga mabuhat ni bisan kinsa kanato karong adlawa. Ngano man? Tungod kay pinaagi niana atong ginatuboy ang may-katungod nga pagkasoberano ni Jehova nga Diyos, nga niana nagaagad ang kaayohan sa tanang linalang. Pinaagi sa pagpakig-ambit nga bug-os kasingkasing sa maong buluhaton, atong ginapasundayag ang atong apresasyon alang sa dagayang dili-takos nga kalulot ni Jehova. Kita nagatabang usab sa isigkatawo sa pagpahimulos sa bugtong paagi nga posibleng sila maluwas sa umaabot nga dakong kasakitan.—Itandi ang 1 Timoteo 4:15, 16.
13 Ang mga kahimtang nga ilang nakaplagan sulod sa organisasyon ni Jehova nakapalipay sa ilang mga kasingkasing. Sumala sa gitagna ni Jehova pinaagi kang Isaias: “Igatudlo ko ang pakigdait nga inyong mga magtatan-aw ug ang pagkamatarong nga inyong mga tigtudlo sa buluhaton.” (Isaias 60:17) Ang pakigdait nga molungtad maoy dili lamang teoriya kondili matuod, usa ka bunga sa balaang espiritu sa Diyos. Kini wala magkahulogang ang usa ka indibiduwal makasinati sa maong pakigdait sa bug-os tungod kay siya nakig-uban sa organisasyon. Siya kinahanglang makakat-on sa personal sa “pagtinguha sa mga butang madaiton ug sa mga butang makapalig-on sa usag usa.” (Roma 14:19) Kinahanglang siya makatuon sa pagpasundayag sa diyosnong kaalam sa pag-antos sa mga pagkadili-hingpit sa uban, sa paghatag ebidensiya sa hataas-nga-pailob ug pagpugong sa kaugalingon, nga magpasayloon sa uban sama nga buot niyang siya pasayloon sa Diyos. Oo, siya kinahanglan usab nga ‘magmadaiton.’ (Sant. 3:17, 18; Galacia 5:22, 23; Colosas 3:12-14) Kadtong nagabuhat niana nagakalipay ug dako sa pagkahimong bahin sa “kusganon nga nasod” nga karon nagakaporma ug debotado sa pag-alagad kang Jehova, “ang Diyos nga malipayon.” (1 Timoteo 1:11) Ang mga membro niining maong “nasod” ang maluwas dihang ipatuman ni Jehova ang paghukom batok sa tibuok kalibotan nga nagapasakop kang Satanas ingong magmamando niini.
[Mga Pangutana nga Pagatun-an]
1. (a) Bahin sa gidak-on sa pag-uswag sa matuod nga mga magsisimba, unsay gitagna ni Jehova? (b) Kinsa ang matuod magpatuman niini, ug sa unsang paagi?
2. (a) Kang kinsa ang Isaias 60:1, 2 gitumong? (b) Sa unsang paagi ang “himaya ni Jehova” gipasidlak ibabaw kaniya? (c) Sa unsang paagi ang nahibilin “misidlak”?
3. (a) Ngano, ilabina sukad 1914, nga ang ‘kangitngit mitabon sa yuta’? (b) Unsa ang bugtong matuod nga solusyon?
4. Ingong katumanan sa Isaias 60:4, unsang buluhatong pagtigom ang unang gihatagag pagtagad?
5. Sa unsang paagi ang tinubdan sa dugang pag-uswag gihubit sa Isaias 55:5?
6. Asa nakaabot ang mensahe sa Gingharian, ug uban ang unsang makapalipay nga sangpotanan?
7. Sa paagi sa pagtagna sa pag-uswag, sa unsang paagi si Jehova nagapakita kon unsa ang tinuod bililhon sa iyang panan-aw?
8. Unsang mga ilhanan ang ginahatag sa Bibliya bahin sa gidak-on sa pagtigom sa umaabot yutan-ong mga manununod sa Gingharian?
9. Sa unsang gidak-on nahitabo ang maong pag-uswag sukad 1935?
10. (a) Unsang mga kahimtang ang nagahimo sa maong pag-uswag nga kahibulongan sa atong panan-aw? (b) Unsay nagapaila nga umaabot ang dugang pag-uswag?
11. (a) Giunsa pagpaila sa Bibliya nga ang maong minilyon mahimong bahin sa usa ka organisasyon? (b) Unsa ang pangunang katuyoan sa maong organisasyon?
12. (a) Giunsa pagpaila ni Jesus ang buluhaton nga niana kitang tanan angay makig-ambit? (b) Unsa kini ka hinungdanon, ug ngano?
13. (a) Sa Isaias 60:17, unsang kahimtang ang gitagna alang sa organisasyon ni Jehova? (b) Unsay kinahanglang atong buhaton aron sa bug-os makasinati niini? (c) Unsang kalaoman ang anaa sa atubangan niadtong nagabuhat niana?