Pagpasidlak sa Kahayag Taliwala sa Kangiob sa Yuta
“Ania karon! ang kangitngit mismo motabon sa yuta, ug ang mabagang kangiob sa kanasoran; apan si Jehova mosidlak sa ibabaw nimo, ug ang iyang himaya makita sa ibabaw nimo.”—ISAIAS 60:2.
1. Unsang positibong tubag ang ikahatag sa mga pangutanang gibangon dinhi?
KARON maoy mahimayaong mga adlaw nga kinabuhian! ‘Mahimayaong mga adlaw?’ tingali may mangutana. ‘Sa unsang paagi makasulti ka niana, sa dihang ang tibuok kalibotan nagsusapinday tungod sa politikanhon, ekonomikanhon, ug relihiyosong pagkabahinbahin, taliwala sa nukleyar-panahong kangiob nga nagalukob sa kanasoran?’ Apan karon maoy mahimayaon gayong mga adlaw—tungod sa maayong balita nga karon ginamantala sa tibuok yuta, nga nagalamdag sa gigutom-sa-kamatuorang katawhan mahitungod sa kahulogan sa atong mga panahon ug sa malipayong palaaboton sa labi pang mahimayaong mga adlaw nga basin ila pang makita!
2. (a) Unsang mga pulong sa pagdasig ang ginahatag ni Jehova sa Isaias kapitulo 45 ug 60? (b) Kinsa ang “babaye” sa Diyos?
2 Ang Tinubdan sa atong kahibulongang paglaom maoy walay lain kondili ang Soberanong Ginoo si Jehova, ang dakong Magbubuhat sa langit ug sa yuta. (Isaias 45:12, 18) Siya mao ang nagahatag sa sugo nga nahitala sa Isaias kapitulo 60, bersikulo 1: “Tindog, O babaye, ipasidlak ang imong kahayag, kay ang imong kahayag miabot ug ibabaw kanimo ang himaya mismo ni Jehova misidlak.” Kinsa ba kining “babaye”? Siya dili mao ang walay-kinabuhi nga Statue of Liberty; ni siya unodnong babaye nga nagapangampanya alang sa kagawasan sa kababayen-an. Hinunoa, siya mao ang gamhanan, nagauswag, langitnong organisasyon ni Jehova nga Diyos, ang iyang debotadong katabang nga nalangkoban sa napulo ka libo sa napulo ka libong maunongong manulonda ug karon naglakip sa binanhawng “mga balaan”—kadtong nakapamatuod nga matinumanon bisan hangtod sa kamatayon ingong dinihogang mga Kristohanon dinhi sa ibabaw sa yuta.—Pinadayag 11:18; 2:10.
3. Sa unsang paagi ang babaye sa Diyos (a) ‘mitindog,’ ug (b) “mipasidlak sa kahayag”?
3 “Tindog, O babaye,” mao ang sugo ni Jehova. Sa pagkamasinugtanon, ang langitnong organisasyon sa Diyos mitindog gikan sa kasiglohan-gidugayong apuli, awaaw nga kahimtang ngadto sa kahimtang sa pagkamabungahon. Sa 1914 iyang gipakatawo ang Mesiyanikong Gingharian. (Pinadayag 12:1-5) Sukad 1919 iyang gidala ang nahibilin sa iyang dinihogan mga anak sa yuta ngadto sa usa ka “yuta,” o kahimtang sa mahimayaong espirituwal nga kauswagan. (Isaias 66:8) Dugang pa, ang langitnong organisasyon sa Diyos “nagpasidlak sa kahayag” bahin sa kahibulongang mga tagna sa Gingharian. Ang daghan niyang anak “gitudloan ni Jehova.”—Isaias 54:1, 13.
Kahayag Taliwala sa Mabagang Kangiob
4. Si Jehova nagahisgot sa unsang kalainan tali sa katawhan sa Diyos ug sa kanasoran sa yuta?
4 “Ang imong kahayag miabot,” nagpahayag si Jehova. Sa pagkamatuod, “ang himaya mismo ni Jehova misidlak” ibabaw sa iyang langitnong organisasyon, ug kini gibanaag sa kahibulongang paagi sa napasig-uling katawhan ni Jehova sa yuta. Ugaling, si Jehova sunod mipahayag sa kaatbang nga kahimtang, nga miingon: “Ania karon! ang kangitngitan mismo motabon sa yuta, ug ang mabagang kangiob sa kanasoran.” (Isaias 60:2) Dili ba kana nagabatbat nga maayo sa tibuok-yutang mga kahimtang sukad 1914?
5. Nganong ang bakak nga relihiyon wala makakaplag ug solusyon sa nukleyar-panahong mga suliran?
5 Ang Kakristiyanohan ilabina nagsalikway sa matagnaong ‘ilhanan sa presensiya ni Jesus ug sa kataposan sa sistema sa mga butang.’ Busa, siya nagsukarap sa bagang espirituwal nga kangitngitan. Ang mga relihiyon sa Kakristiyanohan nagpadayag nga sila dili-malaksing bahin sa imperyo sa bakak nga relihiyon sa kalibotan, ang Dakong Babilonya—nga halayo, halayo kaayo sa kahayag sa kamatuoran. (Mateo 24:3-14; Pinadayag 17:3-6) Ang kalibotanong relihiyon wala mohatag ug solusyon sa mga suliran niining nukleyar nga panahon, ni makawagtang kini sa baga nga kangiob, sa makapaguol nga kawalay-paglaom, nga milukob sa katawhan. Ang pagkalangkit sa bakak nga relihiyon sa kahikayan sa politikanhong kanasoran sa kataposan mosangpot sa iyang kaugalingong kalaglagan.—Pinadayag 17:16, 17.
6, 7. (a) Sa unsang paagi ang himaya ni Jehova “misidlak” sa katuigang 1919-31? (b) Kini miabot sa unsang tayuktok sa 1931?
6 Sa kasukwahi, si Jehova nagkanayon bahin sa iyang langitnong organisasyon: “Si Jehova mosidlak sa ibabaw nimo, ug ang iyang himaya makita sa ibabaw nimo.” (Isaias 60:2) Kining himayaa gibanaag ngadto sa dinihogang mga Kristohanon dinhi sa yuta, mao nga sila sa baylo ‘makapasidlak sa ilang kahayag atubangan sa mga tawo.’ (Mateo 5:16) Ang katuigang 1919 hangtod 1931 maoy mahimayaong mga katuigan sa pagpasidlak sa kahayag sa Gingharian, kay ang katawhan sa Diyos bug-os naghiklin sa nahibiling mga gapos sa Babilonyanhong doktrina, panghunahuna, ug mga kostumbre. Sulod nianang mga katuigana, ang gamay nga nahibilin sa matuod nga mga Kristohanon misugod sa paghatag ug positibong tubag sa pangutana “KINSAY MOPASIDUNGOG KANG JEHOVA?”—kay kini mao ang ulohan sa artikulong tun-anan sa Enero 1, 1926, isyu sa The Watch Tower.
7 Unya, sa 1931, ang himaya ni Jehova nakitang labi pang bug-os diha sa iyang “alagad,” samtang ilang gidawat ang ngalang iya mismong gihatag kanila—MGA SAKSI NI JEHOVA. (Isaias 43:10, 12) Sulod sa 12 ka mabungahon, punog-aksiyong katuigan hangtod 1931, ang mga magmamantala sa Gingharian miuswag gikan sa maihap-sa-kamot ngadto sa tinagpulo ka libong madasigong mga saksi.
Dugang ‘Pagpasidlak’
8, 9. (a) Sa 1931, unsang laing pundok ang gihatagag pagtagad sa The Watch Tower? (b) Sumala sa Kasulatan, sa unsang paagi kini sila ‘gitiman-an’?
8 Apan, si Jehova “mosidlak” ba lamang alang sa mga dinihogan sa ‘gamay nga panon sa mga manununod sa Gingharian’? (Lucas 12:32) Dili, kay ang katuigang 1931 hangtod 1938 napamatud-ang dakong yugto sa dugang kalamdagan, kay ang The Watch Tower misugod sa pagsentro sa pagtagad sa laing pundok. Ang tun-anang artikulo sa isyu nianang Septiyembre 1, 1931, nag-ulohang “LALAKI NGA MAY TINTERO SA MAGSUSULAT,” nga kadto gipasukad sa Ezekiel 9:1-11. Tapos sa pagpaila sa ‘magsusulat’ ingong ang dinihogang nahibilin, ang The Watch Tower mihimo niining komentoha:
9 “Ang sugo gihatag sa pagbutang ug ‘timaan diha sa mga agtang sa mga tawo nga nagaagulo ug nga nagahilak, tungod sa tanang dulumtanan nga gibuhat sa taliwala’ sa Kakristiyanohan. . . . Ang Ginoo namulong mahitungod sa usa ka matang sa mga tawo si kinsa iyang ‘pagaluwason sa usa ka panahon sa kalisdanan ug pagabuhion ug pagapanalanginan ibabaw sa yuta.’ (Sal. 41:1, 2) Kini mao gayod ang matang sa mga tawo nga subsob gibatbat ingong ‘ang milyonmilyong buhi karon nga dili na gayod mamatay’.” Karong adlawa, makapahinam ang pagkakita sa milyonmilyon kanila nga gibutangag timaan alang sa kaluwasan, samtang ilang ginasul-ob ang matuod Kristohanong pagkatawo, diha sa relasyong napahinungod kang Jehova pinaagi kang Kristo Jesus.—Genesis 22:15-18; Sofonias 2:1-3; Efeso 4:24.
10, 11. (a) Sa unsang paagi si Jehu naglandong kang Jesus? (b) Ipaila ang modernong-adlaw nga “Jonadab.”
10 Namatikdan ilabina ang mga tun-anang artikulo diha sa mga isyu sa The Watchtower sa Hulyo 1 hangtod Agosto 1, 1932. Sa pagtumong sa Ikaduhang Hari kapitulo 9 ug 10, kadto nagpakita sa unsang paagi si Haring Jehu milandong sa Maglalaglag ni Jehova, ang Haring Jesu-Kristo, nga gihawasan sa yuta sa dinihogang nahibilin, kinsa nagapasidaan sa uban mahitungod sa umaabot nga pagpatuman sa hukom ni Jehova. Apan kinsay gilandongan sa kauban ni Jehu, si Jonadab? Ang The Watchtower mitubag:
11 “Si Jonadab milandong sa matang sa katawhan nga karon ania sa yuta sa panahong ang buluhaton ni Jehu nagapadayon si kinsa . . . wala mahiuyon sa organisasyon ni Satanas, si kinsa nagabarog sa kiliran sa pagkamatarong, ug mao ang pagaluwason sa Ginoo panahon sa Armageddon, nga pagaluwason sila sa maong kalisdanan ug pagahatagan silag kinabuhing walay kataposan sa yuta.” Ang The Watchtower sunod mipakita nga sila mao ang ‘gibulahan sa Amahan’ diha sa sambingay ni Jesus sa ‘mga karnero ug mga kanding.’ (Mateo 25:31-46) Kini miingon: “Kini sila mao ang ‘karnero’ nga matang nga nagadapig sa dinihogang katawhan sa Diyos, tungod kay sila nasayod nga ang dinihogan sa Ginoo nagabuhat sa buluhaton sa Ginoo.”
12. Unsang makapaukyab nga pagpadayag sa balaang kamatuoran ang gihimo sa 1935?
12 Ang maong mga dan-ag sa matagnaong kahayag nag-andam sa pasukaranan sa makasaysayanhong pakigpulong mahitungod sa “Ang Dakong Panon,” nga gidiskurso sa Mayo 31, 1935 sa presidente sa Watch Tower Society, si J. F. Rutherford, sa Washington, D.C., nga kombensiyon sa mga Saksi ni Jehova. Pagkatalagsaon kadto nga pagpadayag sa balaang kamatuoran! Gipahayag niadtong panahona ang bug-os nga pamatuod nga nagpaila nga ang “dakong panon” sa Pinadayag 7:9 mao ang “ubang mga karnero” sa Ginoo sa Juan 10:16, nga mao ang matang Jonadab, nga mao ang gitiman-an sa agtang alang sa kaluwasan, nga mao ang milyonmilyon nga buhi karon nga dili na gayod mamatay, ug mao ang “mga karnero” nga gibulag gikan sa “mga kanding” ug magapanunod sa kinabuhing walay kataposan sa yutan-ong dominyo sa Gingharian sa Diyos. Kining tanan gihisgotan sa The Watchtower, Agosto 1 ug 15, 1935.
13. Unsang dugang sugyot ang gihimo sa 1938?
13 Sa misunod nga katuigan, ang organisasyon sa Diyos mihatag ug dakong pagtagad sa “dakong panon” ug sa ilang dakong paglaom sa paglabang-buhi ngadto sa napasig-uling Paraiso sa yuta. Sulod sa Septiyembre 9-11, 1938, ang mga Saksi ni Jehova nagtigom sa kombensiyon sa London, Inglaterra, nga ang duha ka pangunang pakigpulong gipasa pinaagig direktang koneksiyon sa telepono ngadto sa ubang kombensiyon sa tibuok kalibotan. Pinasukad sa nangaging mga kasugoan nga gihatag sa mga tawo, usa sa maong mga diskurso, nga nag-ulohang “Pun-a ang Yuta,” nagpaila nga ang “mga Jonadab” nga makalabang sa dakong kasakitan mahimong, labing menos sa usa ka panahon, magminyo ug manganak diha sa Bag-ong Kahikayan tapos sa Armageddon.—Genesis 1:28; 9:1, 7; tan-awa ang The Watchtower, Oktubre 15 ug Nobyembre 1, 1938.
14. Giunsa pagpauswag ni Jehova ang iyang katawhan sulod nianang mga tuiga?
14 Sulod niadtong mga tuiga, ang Agalong si Jesu-Kristo mipadayon sa pagtigom ug pagpadalag dugang mga mamumuo. Sa ingon ang mga magmamantala sa kanataran miuswag ngadto sa duolag 50,000 sa 1938.—Mateo 9:37, 38.
“Mga Hari” ug “Mga Nasod”
15, 16. Sa unsang paagi ang “mga hari” nakaambit sa pagtuman sa Isaias 60:3-10 (a) sa karaang mga panahon, ug (b) sa modernong mga panahon? (c) Sa unsang paagi ang “mga dumuloong” karon nagaalagad duyog sa “mga hari”?
15 Kining buluhatong pagpanigom maanindot nga pagkabatbat diha sa Isaias kapitulo 60, bersikulo 3 hangtod 10. Dinha si Jehova nagahisgot sa “mga hari” nga mopatim-aw maylabot sa “pagsidlak” sa Sion ug si kinsa nagaalagad nianang samag-asawang organisasyon. Sa mibalik ang katawhan sa Diyos sa karaang mga panahon gikan sa pagkabihag sa Babilonya, si Haring Dario nga Medianhon ug si Haring Ciro sa Persia ang nanguna sa paghimog tagana alang sa pagpasig-uli sa pagsimba ni Jehova sa Jerusalem. (Daniel 5:30, 31; 9:1; Esdras 1:1-3) Niini, sila tukmang naghulagway sa Labing Gamhanang Hari, si Jehova, ug sa iyang kaubang Hari, si Jesus, kinsa maoy nagdumala sa pagpasig-uli sa matuod nga pagsimba taliwala sa katawhan ni Jehova sa modernong mga panahon. (Pinadayag 11:15, 17) Dugang pa, ang dinihogang nahibilin sa matuod nga mga magsisimba—ang umaabot nga “mga hari,” “kaubang mga manununod ni Kristo”—maoy nagapanguna sa modernong-adlaw nga buluhatong pagsangyaw. Nagaalagad duyog kanila mao ang “mga dumuloong”—kadtong dili sakop sa espirituwal nga Israel, apan si kinsa mahimong yutan-ong mga sakop sa Gingharian ug nagapakig-ambit bisan karon sa paglig-on sa teokratikanhong buluhaton sa tibuok yuta.—Roma 8:17; itandi ang Isaias 61:5, 6.
16 Si Jehova mismo nagadapit kanato: “Iyahat ang inyong mga mata sa palibot ug tan-awa!” Ang natigom nga mga manununod sa Gingharian karon gikuyogan nianang “dakong panon . . . gikan sa tanang kanasoran”! (Pinadayag 7:9; Zacarias 8:23; Isaias 2:2, 3) ‘Ang mga pagdayeg ni Jehova ilang ginapahayag,’ diha sa madasigong ministeryo. Sila nagahago usab sa ilang kaugalingon diha sa mga proyekto sama sa pagtukod ug mga Kingdom Hall alang sa pagsimba—nga ang pipila niana gitukod sa duha lang ka adlaw. Sila “nagaalagad,” diha sa tibuok-kasingkasing nga pagpaluyo sa tibuok-yutang pagpauswag sa intereses sa Gingharian.—Isaias 60:4-7.
17, 18. (a) Ikalipay, unsang makapaukyab nga ‘pagpanglupad’ ang karon nagakahitabo? (b) Sa unsang paagi ang pinanahong hitabo sa Palestina tukmang nagailustrar niining ‘pagpanglupad’?
17 Si Jehova sunod nangutana niining nahiangay nga pangutana: “Kinsa ba kining nangabot nga nanaglupad sama sa panganod, ug sama sa mga salampati ngadto sa ilang mga tamboanan?” Unang nangabot sa organisasyon sa Diyos mao ang iyang “mga anak gikan sa halayo,” nga bug-os mibulag sa tanang Babilonyanhong relihiyon. Ang maong mga dinihogan nagadalag bililhong mga butang, nga nagapahinungod sa ilang tanan “ngadto sa ngalan ni Jehova,” ang ilang Diyos. Ingong “ang Balaang Usa sa Israel,” iyang gibutang ang iyang ngalan ibabaw kanila ug gipatahom sila sa pribilehiyo sa pag-alagad kaniya ingong iyang mga saksi. Sila nagapanguna sa pagbayaw sa ngalan sa ilang Soberanong Ginoo, si Jehova, ingong ang labing dako, labing bantogan, labing mahimayaong ngalan sa tibuok uniberso.—Isaias 60:8, 9.
18 Ikalipay, ang dinihogang nahibilin wala mag-inusara sa pagbuhat niini. Kana malisod unta kon sila nagainusara! Kining nagkatigulang nga pundok nagkagamay, samtang ang tinagsatagsa magtapos sa ilang yutan-ong dalan sa kinabuhi nga matinumanon. Mga 9,000 karon ang nahibilin. Apan ang uban, nga moabot sa milyonmilyon, nagapanon samag mga salampati ngadto sa ilang “mga tamboanan,” o “mga balay sa salampati,” nga nakakaplag ug salipdanan sulod sa organisasyon sa Diyos. (NW; The New English Bible) Sila sama sa mga panon sa salampati nga makita sa Palestina sa tinong mga panahon—nga nagalupad sama gayod sa panganod, nga hilabihan kadaghan nga sila makapaitom sa langit.
‘Bukas Kaayong mga Ganghaan’
19. Sa unsang paagi ang “mga ganghaan” sa organisasyon ni Jehova nagapabiling bukas, ug unsa ang pagsanong sa “mga hari” ug “mga dumuloong”?
19 Sa pagkamaluluy-on, gibuksan ug dako ni Jehova ang mga ganghaan sa iyang organisasyon, nga iyang ginatumong karon niining mga pulonga: “Ang imong mga ganghaan sa kanunay binuksan; kana sila dili pagatak-opan sa maadlaw o sa magabii, aron pagadad-on nganha kanimo ang mga bahandi sa kanasoran.” Kana mao gayod ang kahimtang karon samtang ang mahigugmaon-sa-kalinaw nga “dakong panon” kanunay nagauswag sa gidaghanon. Ikalipay, ang maong “mga dumuloong” nagaamot sa ilang mga bahandi nga mao ang panahon, kusog, ug salapi sa “balaang pag-alagad sa adlaw ug sa gabii.” Ilang gipahimuslan ang “dakong ganghaan nga motultol sa buluhaton” ug nagaapil uban sa umaabot nga mga hari sa pagdalag matahom nga pagdayeg sa ngalan ni Jehova.—Isaias 60:10, 11; Pinadayag 7:4, 9, 15; 1 Corinto 16:9.
20. (a) Kinsa ang mahidangat sa “kalaglagan”? (b) Unsang malipayong kalainan ang atong mamatikdan dinhi?
20 Sunod, giingnan ni Jehova ang iyang organisasyon, nga miingon: “Ang bisan unsang nasod ug bisan unsang gingharian nga dili magaalagad kanimo mangahanaw; ug ang kanasoran mismo sa walay pakyas mahidangat sa kalaglagan.” Ang tanang hambogirong kalibotanong kanasoran ug ubang magsusupak paubson sa Armageddon. Sa kasukwahi, patahomon ni Jehova ang iyang kaugalingong sangtuwaryo sa pagsimba. Iyang ‘himayaon ang dapit mismo sa iyang mga tiil,’ ang yutan-ong mga sawang sa iyang dako espirituwal nga templo sa pagsimba, samtang iyang tigomon didto ang kanunay-nagauswag nga gidaghanon sa dakong panon. Pinaagi sa laing manalagna, si Jehova nagapahayag: “Akong pagauyogon ang tanang nasod, ug ang tilinguhaong mga butang sa tanang nasod magasulod; ug akong pun-on kining balaya sa himaya.” (Haggeo 2:7) Apan ang mga maglulutos, mga apostata, ug ubang dili-matinahorong magsusupak mapugos sa ‘pagyukbo’—nga magaila nga malagoton nga ang mga Saksi ni Jehova tinuod nagahawas sa organisasyon sa Diyos—“ang siyudad ni Jehova, ang Sion sa Balaang Usa sa Israel.”—Isaias 60:12-14.
21 Dili gayod biyaan ni Jehova ang iyang samag-asawang katabang bisan unsaon pagtamay sa mga magsusupak sa iyang ‘mga anak lalaki ug mga anak babaye’ dinhi sa yuta. Hinunoa, iyang pagasultihan ang iyang maunongong organisasyon: “Igapahimutang ko ikaw ingon nga butang ikapasigarbo sa panahong walay katinoan, nga kalipay sa sunodsunod nga kaliwatan. Ug ikaw magasuso gayod sa gatas sa kanasoran.” Sa masambingayong paagi ang yutan-ong mga hawas sa organisasyon sa Diyos sa ingon magagamit sa tanang mabatonang katigayonan sa pagpauswag sa matuod nga pagsimba. Ilang gamiton ang modernong mga kasangkapan sa komunikasyon, transportasyon, ug imprentahan aron ikasangyaw ang maayong balita. Ang mabinantayong pag-atiman ug giya ni Jehova nagauban sa mga Saksi ni Jehova niining buluhatona. Kini sila, usab, sa pag-alagad alang sa langitnong organisasyon ni Jehova, nagakalipay sa pagkatuman sa iyang saad: “Kamo makaila gayod nga ako, si Jehova, mao ang inyong Manluluwas, ug ang Gamhanang Usa ni Jacob mao ang inyong Manunubos.”—Isaias 60:15, 16.
21, 22. (a) Unsang pasalig ang ginahatag dinhi ni Jehova? (b) Sa unsang paagi, nga hawasnon, ang iyang katawhan “nagasuso sa gatas sa kanasoran”? (c) Unsang dugang makapaukyab nga pagtuon ang nagapaabot kanato?
22 Unsang dugang pagdasig ang ginahatag kanato ni Jehova sa Isaias 60:17-22? Kana mao ang makapaukyab nga ulohan sa atong sunod nga pagtuon.
Mga Pangutana sa Sumaryo
◻ Unsang kalainan tali sa kahayag ug kangiob ang dayag karong adlawa?
◻ Unsang mauswagong ‘pagsidlak’ ang nahitabo sa 1919-38?
◻ Sa unsang paagi ang Isaias 60:8 natuman sa modernong mga panahon?
◻ Sa unsang paagi ang “mga hari” ug “mga dumuloong” nagasulod sa ‘bukas kaayong mga ganghaan’?
[Kahon sa panid 13]
“Ang mga armas nga malaglagon kaayo gitigom nga mauswagon. . . . Ang lumba sa armas karon nakaabot sa kadagatan sa kalibotan ug sa kawanangan. Ngani kataw-anang ang pagtigom sa armas maoy usa sa pila ka mauswagong mga industriya panahon sa ekonomikanhong depresyon ug kangiob.”—Sekretaryo-Heneral sa HK, si Gn. Javier Perez de Cuellar
“Didto, ilalom sa pultahan sa balay sa usang adlaw, mao ang laing sinating mensahe sa dagway sa usa ka relihiyosong pulyeto. ‘Kita nagakahiduol na ba sa Armageddon?’ mao ang mga pulong mabasa nga tin-aw ibabaw sa dag-om ug sa liti nga nag-apektar kanato. May panahon sa nangagi nga kanang matanga sa mensahe pahiyoman lamang. Sa kalit, kadto mopatim-awng dili na kataw-anan.”—Haynes Johnson, The Washington Post