Bahin 1
Tinuod Bang May Pagtagad ang Diyos Kanato?
1, 2. Unsa ang pangutana sa mga tawo mahitungod sa Diyos, ug ngano?
SA USA ka panahon sa imong kinabuhi, tingali nakapangutana ka: ‘Kon adunay Diyos nga tinuod may pagtagad kanato, nganong gitugotan niya ang labihang pag-antos?’ Kitang tanan nakaagig pag-antos o may nailhan nga nakaagi niana.
2 Sa tinuoray, sa tibuok kasaysayan ang mga tawo nagaantos sa kasakit ug kangutngot sa kasingkasing gumikan sa gubat, kapintasan, krimen, inhustisya, kakabos, balatian, ug kamatayon sa mga minahal. Sa atong ika-20ng siglo lamang, ang mga gubat nakapatayg kapin sa 100 ka milyong tawo. Ginatos ka milyon pang uban nangaangol o nawad-ag mga balay ug kabtangan. Daghan kaayong makalilisang nga mga butang nahitabo sa atong panahon, nga misangpot sa dakong kasub-anan, daghang mga luha, ug pagbati sa kawalay-paglaom sa bahin sa di-maihap nga katawhan.
3, 4. Unsay pagbati sa daghan mahitungod sa pagtugot sa Diyos sa pag-antos?
3 Ang uban nahimong mayugtanon ug mibati nga kon ugaling may Diyos, wala gayod siyay pagtagad kanato. O tingalig sila mibati pa nga walay Diyos. Pananglitan, usa ka lalaki nga nakaagig etnikong paglutos nga nagpahinabo sa kamatayon sa mga higala ug pamilya sa Gubat sa Kalibotan I nangutana: “Diin ba ang Diyos sa diha nga siya among gikinahanglan?” Ang lain, nga nakalabang sa pagpamatay sa minilyon pinaagi sa mga Nazi sa Gubat sa Kalibotan II, nayugot kaayo sa pagpaantos nga iyang nakita nga siya miingon: “Kon matilaan pa nimo ang akong kasingkasing, ikaw mahilo.”
4 Busa, daghang tawo dili makasabot kon nganong ang usa ka Diyos nga maayo makatugot nga mahitabo ang daotang mga butang. Magduhaduha sila kon kaha siya tinuod nga may pagtagad kanato o kon kaha siya ba tinuod nga nagalungtad. Ug daghan mobati nga ang pag-antos sa tanang panahon bahin sa kinabuhi sa tawo.
[Hulagway sa panid 2, 3]
Haduol na ba ang bag-ong kalibotan nga walay pag-antos?