Mga Pangutana nga Kinahanglang Tubagon

SA USA ka panahon sa imong kinabuhi, ikaw basin nakasukna: ‘Kon may Diyos, nganong gitugotan niya ang labihang pag-antos? Ug nganong gitugotan niya kini sa dugay kaayong panahon, sa tibuok kasaysayan sa tawo? Kanus-a ba gayod matapos ang pag-antos?’

Tungod kay wala makabaton ug makapatagbawng mga tubag nianang mga pangutanaha, daghan ang nayugot. Ang pipila gani mingtalikod sa pagtuo sa Diyos, o ilang gibasol siya sa ilang mga kaalaotan.

Pananglitan, usa ka lalaki nga naluwas sa Holocaust, ang pagpatay sa milyonmilyon sa mga Nazi sa Gubat sa Kalibotan II, nayugot kaayo nga siya miingon: “Kon makatilap ka pa sa akong kasingkasing, mahilo ka niini.” Ang laing lalaki nga nag-antos ingong sangpotanan sa etnikong paglutos, nga nakapatay sa mga higala ug mga membro sa pamilya sa Gubat sa Kalibotan I, nangutana nga mayugtanon: “Diin ba ang Diyos sa dihang amo siyang gikinahanglan?”

Busa, nalibog ang daghang tawo. Gikan sa ilang punto de vista, mopatim-aw nga panagsumpaki nga ang Diyos sa pagkamaayo ug gugma nagatugot nga mahitabo ang daotang mga butang sa dugay kaayong panahon.

Kon Unsay Nahimo sa mga Tawo

Tinuod gayod nga ang mga tawo nakahimog hilabihang mga pagkadaotan batok sa uban latas sa kasiglohan​—sa pagkamatuod, sulod sa kaliboan ka katuigan. Ang pagkadako ug pagkamakalilisang niining tanan makapalibog sa handurawan.

Sa pag-uswag kono sa sibilisasyon, ang mga tawo mimugnag labi pang makahahadlok nga mga galamiton sa pagpatay o pagbakol sa uban: artileriya, mga masinggan, mga ayroplanong iggugubat, mga tangke, mga missile, flamethrowers, kemikal ug nukleyar nga mga hinagiban. Ingong sangpotanan, niining sigloha lamang, ang mga gubat sa mga nasod nakapatayg duolag usa ka gatos ka milyong tawo! Gatosan pa ka milyon ang nangaangol o nag-antos sa laing mga paagi. Ug ang kantidad sa propiedad nga nangaguba, sama sa mga balay ug mga butang, dili masukod.

Palandonga ang labihang kasub-anan, ang kasakit, ug ang mga luha nga gipahinabo sa gubat! Kasagaran kaayo ang mga tawong inosente ang nagaantos: tigulang nga mga lalaki ug mga babaye, mga bata, mga masuso. Ug kasagaran kaayo, daghan nga nagpahinabo sa mga kadaotan wala papanubaga.

Sa tibuok kalibotan, ang pag-antos nagapadayon hangtod niining gutloa. Kada adlaw, ang mga tawo ginapatay o sa laing paagi gibiktima sa krimen. Sila nangaangol o nangamatay diha sa mga aksidente, apil sa ‘mga pagbuot sa kinaiyahan’ sama sa mga bagyo, mga baha, ug mga linog. Sila nagaantos gumikan sa inhustisya, pagpihigpihig, kakabos, kagutmanan, o sakit, o sa daghan pang laing paagi.

Sa unsang paagi ang usa ka Diyos nga maayo nakalalang​—sa katawhan​—nga nagaantos sa hilabihan, nga subsob kaayo, sa sunodsunod nga siglo?

Usa ka Gumonhap Diha sa Lawas sa Tawo

Kini nga gumonhapa gibanaag bisan diha sa lawas sa tawo. Ang mga siyentipiko ug ang uban nga nagtuon niini nagauyon nga ang lawas sa tawo gibuhat sa kahibulongan, matahom kaayong paagi.

Tagda lang ang pipila sa kahibulongang mga bahin niini: ang dikatuohang mata sa tawo, nga dili masuhid sa kamera; ang katingalahan kaayong utok, nga nagahimo sa labing modernong kompiyutir nga bakikaw tan-awon; ang paagi sa pagtimbayayong sa makuting mga parte sa lawas nga wala nato hagoi; ang milagro sa pagpanganak, nga magapatunghag makalingaw nga masuso​—nga kopya sa mga ginikanan niini​—sa siyam lang ka bulan. Daghang tawo ang naghinapos nga kining obra maestra sa desinyo, ang lawas sa tawo, gilalang gayod sa usa ka batid nga Tigdesinyo​—ang Maglalalang, ang Diyos nga Makagagahom sa Tanan.

Bisan pa niana, makapasubo, kanang kahibulongan mismong lawas madaot. Sa nahaigong panahon kini maapsan sa sakit, pagkatigulang, ug kamatayon. Sa kataposan kini mapulpog ngadto sa pagkaabog. Pagkaluoy! Sa dihang ang tawo angay na untang makapahimulos sa tinagpulo ka tuig nga kasinatian ug nahimong mas maalamon, ang lawas mahugno. Makapahinuklog gayod nga katugbang, sa panahon sa kataposan niini, sa natagong kagahom sa kahimsog, kalagsik, ug katahom nga nabatonan sa lawas sa sinugdan niini!

Nganong ang mahigugmaong Maglalalang mobuhat sa butang nga matahom kaayo sama sa lawas sa tawo, nga mosangko lamang nga makapasubo kaayo? Nganong maglalang siyag usa ka mekanismo nga maayo kaayong moandar sa sinugdan, uban ang dako kaayong natagong kagahom, apan nga mosangko nga daot kaayo?

Kon Giunsa Pagtin-aw Kini sa Uban

Ang uban nag-ingon nga ang pagkadaotan ug pag-antos maoy mga galamiton sa Diyos sa pagpauswag sa atong kinaiya pinaagi sa kalisdanan. Usa ka Metodistang klerigo mipatuo: “Ang pagbayad sa maayo alang sa daotan maoy bahin sa plano sa Diyos sa kaluwasan.” Gipasabot niya nga aron maugmad ang maayong kinaiya ug maluwas, ang mga tawong maayo kinahanglang mag-antos gumikan sa mga buhat sa mga tawong daotan ingong bahin sa plano sa Diyos.

Apan ang usa ba ka mahigugmaong tawhanong amahan mosulay sa pagpauswag sa kinaiya sa iyang mga anak pinaagi sa pagplano nga sila mabiktima sa pintas nga kriminal? Palandonga, usab, nga daghang batan-on ang mamatay sa mga aksidente o ginapatay o mamatay sa panggubatan. Kanang batan-ong mga biktima wala nay higayon sa pagpauswag sa ilang kinaiya kay sila patay na man. Busa ang ideya nga gitugotan ang pag-antos aron sa pagpauswag sa kinaiya dili gayod makataronganon.

Walay makataronganon ug mahigugmaong tawhanong amahan ang gusto nga ang pag-antos o trahedya modangat sa iyang mga minahal. Ngani, ang usa ka amahan nga magplano nga ang iyang mga minahal mag-antos aron ‘maugmad ang kinaiya’ pagaisipong dili maayo, nga buang pa.

Nan makataronganon bang ikaingon nga ang Diyos, ang labing mahigugmaong Amahan, ang maalamon-sa-tanang Maglalalang sa uniberso, naghikay nga tinuyo sa pag-antos ingong bahin sa iyang ‘plano alang sa kaluwasan’? Kana maoy paglangkit kaniya sa mapintason ug makalilisang kaayong hiyas, usa ka hiyas nga isipon tang tanan nga dili dalawaton bisan sa timawa nga mga tawo.

Pagkaplag sa mga Tubag

Diin kita makadangop alang sa mga tubag sa mga pangutana nga nagalibot sa pagtugot sa Diyos sa pag-antos ug pagkadaotan? Sanglit ang mga pangutana nagalangkit sa Diyos, makataronganon ang pagkakita nga siya mismo ang nagahatag sa mga tubag.

Sa unsang paagi makaplagan nato ang iyang mga tubag? Pinaagi sa pag-adto sa tinubdan nga giingon sa Diyos iyang gipasulat ingong giya alang sa mga tawo​—ang Balaang Bibliya, ang Sagrada Eskritura. Bisan unsa pay hunahunaon sa usa bahin sa maong tinubdan, kini angay susihon, kay, sumala sa giingon ni apostol Pablo: “Ang tibuok nga Kasulatan gidasig sa Diyos ug mapuslanon . . . sa pagtul-id sa mga butang.” (2 Timoteo 3:16) Siya misulat usab: “Sa dihang inyong gidawat ang pulong sa Diyos, nga inyong nadungog gikan kanamo, inyong gidawat kini, dili ingon nga pulong sa mga tawo, kondili, sumala sa pagkamatuod mao kini, ingon nga pulong sa Diyos.”a​—1 Tesalonica 2:13.

Ang pagpangita sa mga tubag sa mga pangutana bahin sa pagtugot sa pag-antos dili lamang ehersisyo sa pangutok. Ang mga tubag hinungdanon sa atong pagsabot sa kon unsay nagakahitabo karon mismo sa talan-awon sa kalibotan, kon unsay mahitabo sa duol nga umaabot, ug sa unsang paagi ang matag usa kanato apektado.

Angay nga tugotan nato ang Bibliya, ang komunikasyon sa Diyos alang sa tawhanong pamilya, nga mosulti sa kaugalingon. Nan, unsay ginaingon niini bahin sa unsang paagi ang pag-antos misugod ug nganong gitugotan kini sa Diyos?

Ang usa ka yawi sa pagsabot sa tubag maylabot sa kon unsang paagi kita gibuhat sa mental ug emosyonal nga paagi. Ang Bibliya nagapakita nga ang Maglalalang nagbutang diha sa atong kahulmahan ingong mga tawo niining hinungdanong hiyas: ang tinguha sa kagawasan. Hisgotan nato sa daklit kon unsay nalangkit sa kagawasan sa pagpili sa mga tawo ug kon unsay labot niini sa pagtugot sa Diyos sa pag-antos.

[Footnote]