Si Jehova Kinsa ba Siya?
NGA nanghabas sa kabugangan sa iyang pag-agi sa lasang sa Cambodia, si Henri Mouhot, nga usa ka Pranses nga eksplorador sa ika-19ng siglo, nahiabot sa lapad nga trenserang nagliyok sa usa ka templo. Kadto ang Angkor Wat, ang labing dakong relihiyosong monyumento sa yuta. Sa pagpasiklap si Mouhot nakaila nga ang gilumotang estruktura maoy ginama sa kamot sa tawo. “Nga gipatindog sa usa ka karaang Michelangelo,” siya misulat, “kini labawng kahibulongan kay sa bisan unsang gibilin kanato sa Gresya o Roma.” Bisan pag gipasagdan ug wala tagda sa mga siglo, siya wala magduhaduha nga luyo sa makutihong tinukod, diha ang usa ka tigdisenyo.
Makaiikag, usa ka basahon sa kinaadman nga nasulat kasiglohan kanhi migamit ug susamang pangatarongan, nga nag-ingon: “Dayag, ang matag balay adunay nagtukod, apan siya nga nagtukod sa tanang butang mao ang Diyos.” (Hebreohanon 3:4) Apan ang uban tingali moingon, ‘Ang paglihok sa kinaiyahan lahi kay sa nianang ginama sa tawo.’ Bisan pa niana, dili tanang siyentipiko uyon sa maong pagtutol.
Human sa pag-uyon nga “ang biokemikal nga mga sistema dili kay way-kinabuhi nga mga butang,” si Michael Behe, luyoluyong propesor sa biokemistriya sa Lehigh University, Pennsylvania, T.B.A., nangutana: “Ang buhing biokemikal nga mga sistema ba intelihenteng madisenyo?” Dayon iyang gipakita nga ang mga siyentipiko sa pagkakaron nagdisenyo ug sukaranang mga kausaban diha sa buhing mga organismo pinaagi sa mga metodo nga sama sa genetic engineering. Oo, ang mga butang nga buhi ug way-kinabuhi mahimong “tukoron”! Sa pagsusi sa mikroskopikong buhing mga selula, si Behe nakamatikod sa katingalahang makutihong mga sistema nga gilangkoban ug mga sangkap nga nagsaliganay sa usag usa aron makalihok. Iyang panghinapos? “Ang resulta niining nagdugang nga mga singkamot sa pagsusi sa selula—ang pagsusi sa kinabuhi diha sa kahimtang nga molekula—maoy kusog, tin-aw, langgis nga pagpatugbaw bahin sa ‘disenyo!’”
Nan, kinsa ba ang Tigdisenyo luyo niining tanang makutihong mga sistema?
Kinsa ang Tigdisenyo?
Ang tubag anaa nianang karaang basahon sa kinaadman nga gikutlo nga sayosayo—ang Bibliya. Sa unang mga pulong niini, ang Bibliya nagtubag nga yano ug tin-aw kaayo sa pangutanang kon kinsay nagdisenyo sa tanang butang: “Sa sinugdan gilalang sa Diyos ang mga langit ug ang yuta.”—Genesis 1:1.
Hinunoa, sa pagpalahi sa iyang kaugalingon gikan sa uban nga giingong Diyos, ang Maglalalang nagpaila sa iyang kaugalingon pinaagi sa linaing ngalan: “Mao kini ang giingon sa matuod nga Diyos, si Jehova, ang Maglalalang sa mga langit . . . , ang Usa nga nagpahimutang sa yuta ug sa abot niini, ang Usa nga naghatag ug gininhawa ngadto sa katawhan ibabaw niini.” (Isaias 42:5, 8) Jehova ang ngalan sa Diyos nga nagdisenyo sa uniberso ug naglalang sa mga lalaki ug babaye sa yuta. Apan kinsa si Jehova? Unsang matanga siya nga Diyos? Ug nganong angay kang mamati kaniya?
Kahulogan sa Iyang Ngalan
Una sa tanan, unsay kahulogan sa ngalan sa Maglalalang, nga Jehova? Ang balaang ngalan gisulat diha sa upat ka Hebreohanong titik (יהוה) ug makita duolag 7,000 ka beses diha sa Hebreohanong bahin sa Bibliya. Kining ngalana giisip nga pormang kausatibo sa Hebreohanong berbo nga ha·wahʹ (“mamao”) ug sa ingon nagkahulogan nga “Siya Magpahinabo nga Mamao.” Sa laing mga pulong, sa kamaalamon si Jehova magpahinabo nga siya mamao bisan kon unsay kinahanglang siya mamao aron pagtuman sa iyang mga katuyoan. Siya mamahimong Maglalalang, Maghuhukom, Manluluwas, Tigsustento sa kinabuhi, ug uban pa, sa pagtuman sa iyang mga saad. Dugang pa, ang Hebreohanong berbo nakabaton ug pormang gramatikanhon nga nagpaila sa usa ka lihok nga nagakatuman. Kini nagpasabot nga si Jehova nagpahinabo gihapon nga siya mismo mahimong magtutuman sa iyang mga saad. Oo, siya maoy Diyos nga buhi!
Nagpatigbabaw nga mga Hiyas ni Jehova
Ang Bibliya nagpadayag sa maong Maglalalang ug magtutuman sa iyang mga saad ingon nga makapadani kaayong persona. Si Jehova mismo nagbutyag sa iyang talagsaong mga hiyas ug nag-ingon: “Si Jehova, si Jehova, usa ka Diyos nga maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran, nagatipig ug mahigugmaong-kalulot alang sa linibo, nagapasaylo ug kasaypanan ug kalapasan ug sala.” (Exodo 34:6, 7) Si Jehova gihulagway ingon nga Diyos sa mahigugmaong-kalulot. Ang Hebreohanong pulong nga gigamit dinhi mahubad usab nga “maunongong gugma.” Aron pagtuman sa iyang walay-kataposan nga katuyoan, si Jehova sa kamaunongon nagpadayon sa pagpakitag gugma nganha sa iyang mga linalang. Dili ka ba mahinangop sa maong gugma?
Si Jehova mahinay usab sa kasuko ug daling mopasaylo sa atong mga sayop. Makalilipay nga mahiduol sa usa ka tawo nga dili tigpangitag sayop apan andam mopasaylo kanato. Apan kana wala magpasabot nga si Jehova mokonsentir sa buhat nga daotan. Siya nagpahayag: “Ako, si Jehova, nahigugma sa hustisya, nagdumot sa panulis uban sa pagkadili-matarong.” (Isaias 61:8) Ingon nga Diyos sa hustisya, siya dili makatugot hangtod sa hangtod sa tampalasang mga makasasala nga magpadayon sa ilang pagkadaotan. Sa ingon, kita makapaneguro nga sa gitakda niyang panahon, si Jehova magtul-id sa inhustisya sa kalibotan alirong nato.
Gikinahanglan ang kaalam aron mahuptang padayon ang hingpit nga katimbang tali sa mga hiyas sa gugma ug hustisya. Kining duha ka hiyas gitimbang ni Jehova sa kahibulongang paagi diha sa iyang pagpakiglabot kanato. (Roma 11:33-36) Hinuon, ang iyang kaalam makita sa bisan diin. Ang mga kahibulongan sa kinaiyahan nagpamatuod niini.—Salmo 104:24; Proverbio 3:19.
Bisan pa niana, dili igo ang pagkabaton ug kaalam. Aron sa hingpit matuman kon unsay mosantop sa iyang hunahuna, gikinahanglan usab nga ang Maglalalang adunay bug-os nga gahom. Gipakita sa Bibliya nga ingon niana siya nga Diyos: “Iyahat ang inyong mga mata sa itaas ug tan-awa. Kinsay naglalang niining mga butanga? Mao ang Usa nga nagpatungha sa ilang panon nga hilabihan ka daghan . . . Gumikan sa kadagaya sa dinamikong kusog, . . . walay usa kanila ang nawala.” (Isaias 40:26) Sa pagkatinuod, nahuptan ni Jehova ang “kadagaya sa dinamikong kusog” nga magamit niya sa pagtuman sa iyang kabubut-on. Dili ka ba madani kang Jehova tungod nianang mga hiyasa?
Mga Kaayohan sa Pagkaila Kang Jehova
Si Jehova “wala maglalang [sa yuta] sa wala lamay kapuslanan” kondili “nag-umol niini aron pagapuy-an” sa mga tawong adunay bililhong relasyon uban niya. (Isaias 45:18; Genesis 1:28) Siya matinagdanon sa iyang yutan-ong mga linalang. Gihatag niya sa tawo ang hingpit nga pagsugod diha sa samag-tanaman nga pinuy-anan, usa ka paraiso. Ang mga tawo, sa ilang bahin, nagdaot niini, nga wala gayod kahimut-i ni Jehova. Bisan pa niana, sa pagtuman sa kahulogan sa iyang ngalan, si Jehova sa bug-os magtuman sa iyang orihinal nga katuyoan alang sa tawo ug sa yuta. (Salmo 115:16; Pinadayag 11:18) Ipasig-uli niya sa yuta ang Paraiso alang niadtong kinabubut-ong magmasinugtanon kaniya ingon nga iyang mga anak.—Proverbio 8:17; Mateo 5:5.
Ang kataposang basahon sa Bibliya naghubit sa matang sa kinabuhi nga imong matagamtam sa maong Paraiso: “Iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” (Pinadayag 21:3, 4) Kana ang tinuod nga kinabuhi nga gusto ni Jehova nga matagamtam nimo. Pagkamaluloy-on niya nga Amahan! Gusto ba nimong dugang mahibalo bahin kaniya ug kon unsay gikinahanglan kanimo aron makapuyo sa Paraiso?
Gawas kon ipaila, ang tanang kinutlo sa Bibliya maoy gikan sa Bag-ong Kalibotang Hubad sa Balaang Kasulatan.