Kinsa si Jehova?

GISULTIHAN ni Jehova ang usa sa iyang matinumanong mga magsisimba: “Walay tawo ang makakita kanako ug magpabiling buhi.” (Exodo 33:20) “Ang Diyos maoy usa ka Espiritu,” ug ang mga tawo dili makakita kaniya pinaagi sa ilang pisikal nga mga mata. (Juan 4:24) Sama nga ang pagtan-aw direkta sa adlaw sa udtong-tutok makadaot sa atong mga mata, sa ingon makadaot kanato ang pagtan-aw sa hilabihan ka dakong Tuboran sa enerhiya kinsa nagbuhat dili lamang sa atong hayag kaayong adlaw kondili usab sa dili-maihap nga ubang mga adlaw sa uniberso.

Makalipay, kita dili kinahanglang makakita sa Diyos aron makahibalo bahin kaniya. Gipaila sa Bibliya ang Usa kinsa nag-andam nianang maanindot nga pakete, ang yuta, alang kanato ug nagbutyag sa iyang personalidad. Busa mapuslanong tan-awon ang Bibliya aron masusi ang bahin sa Amahan nga naghatag kanatog kinabuhi ug nagtaganag usa ka matahom nga pinuy-anan aron kalipayan kanang kinabuhia.

Kahulogan sa Iyang Ngalan

Ang tanang ngalan adunay mga kahulogan, bisan pag daghan tingali wala mahibalo niana karon. Pananglitan, ang komong Ingles nga ngalang David nagagikan sa Hebreohanong pulong nga nagkahulogang “Minahal.” Ang ngalan sa Maglalalang, Jehova, adunay kahulogan usab. Unsa man kana? Diha sa orihinal nga pinulongang Hebreohanon sa Bibliya, ang balaang ngalan gisulat sa upat ka letra, YHWH, ug makita halos 7,000 ka higayon sa Hebreohanong bahin sa Bibliya. Ang balaang ngalan nasabtang nagkahulogang “Siya Maoy Nagpahinabo.” Kini nagpasabot nga si Jehova maalamong nagpahinabo sa iyang kaugalingon nga mahimo bisan unsay iyang tuyo nga mahimo siya aron matuman ang iyang mga katuyoan. Siya ang Maglalalang, Maghuhukom, Manluluwas, Tigsustento sa Kinabuhi, ug busa siya makatuman sa iyang mga saad. Dugang pa, sa Hebreohanon ang ngalang Jehova maoy sa binaba nga matang nga nagpasabot ug usa ka aksiyon nga nagkamulo sa pagkatuman. Oo, si Jehova nagpahinabo gihapon sa iyang kaugalingon nga mahimong magtutuman sa iyang mga katuyoan. Siya maoy usa ka buhi nga Diyos!

Ang Nangibabawng mga Hiyas ni Jehova

Gibatbat sa Bibliya ang Maglalalang ingong “usa ka Diyos nga maluluy-on ug mapuangoron, mahinay sa kasuko ug puno sa mahigugmaong-kalulot ug kamatuoran, nga nagatipig sa mahigugmaong-kalulot alang sa libolibo, nagapasaylo sa kasaypanan ug kalapasan ug sala.” (Exodo 34:6, 7) Ang ekspresyong “mahigugmaong-kalulot” nagpatin-aw ug usa ka makahuloganon kaayong Hebreohanong pulong. Kini nagpasabot sa kalulot nga mahigugmaong motapot sa usa ka butang hangtod ang katuyoan niini alang nianang butanga matuman. Kini usab mahimong hubaron nga “maunongong gugma.” Ang kalulot ni Jehova mahigugmaong motapot sa iyang mga linalang ug magatuman sa iyang katingalahang katuyoan. Dili ba nimo ikalipay ang ingon niana nga gugma gikan sa Usa nga naghatag kanimo ug kinabuhi?

Si Jehova mahinay sa kasuko ug dali nga mopasaylo sa atong mga kasaypanan. Makalipay gayod nga masuod sa ingon niana nga persona. Bisan pa, kana wala magkahulogan nga palabyon lang niya ang daotang-buhat. Siya miingon: “Ako, si Jehova, nahigugma sa hustisya, nagadumot sa pagpangawat uban sa pagkadili-matarong.” (Isaias 61:8) Ingong Diyos sa hustisya, dili gayod niya tugotan hangtod sa hangtod ang masupilong mga makasasala nga magpadayon sa ilang pagkadaotan. Busa, kita makaseguro nga sa iyang tinakdang panahon, tul-iron ni Jehova ang mga inhustisya sa kalibotan. Dili niya talikdan ang mga sinakit.

Dili sayon ang paghupot ug hingpit nga pagkatimbang tali sa gugma ug hustisya. Kon ikaw usa ka ginikanan, malisdan ka ba sa paghukom kon kanus-a, sa unsang paagi, ug sa unsang sukod tul-iron ang imong mga anak kon sila magbinuang? Ang pagtimbang sa hustisya uban sa mahigugmaong kahangawa nagkinahanglan ug dakong kaalam. Ipasundayag ni Jehova kanang hiyasa sa dagaya gayod kon siya makiglabot sa mga tawo. (Roma 11:​33-36) Sa pagkamatuod, ang kaalam sa Maglalalang makita bisan asa, pananglitan diha sa mga katingalahan sa kalalangan nga nagalibot kanato.​—Salmo 104:​24; Proverbio 3:19.

Ang pagkabaton ug kaalam, hinunoa, dili pa igo. Aron matuman ang iyang kabubut-on, ang Maglalalang kinahanglan usab nga adunay gahom, ug ang Bibliya nagpadayag nga siya gamhanan kaayo: “Ihangad ang imong mga mata sa kahitas-an ug tan-awa. Kinsay nagbuhat niining mga butanga? Ang Usa nga nagdala sa panon kanila sa tinagdaghan, diin ang tanan iyang gitawag sa ngalan. Tungod sa kadako sa iyang dinamikong kusog, ug usab sa iyang pagkagamhanan, walay usa ang nakulang kanila.” (Isaias 40:26) Pinaagi sa “kadako sa iyang dinamikong kusog,” mahimo ni Jehova ang tanang butang. Dili ba kanang hiyasa makadani kanimo ngadto kaniya?

Diyos sa Tanang Kanasoran

‘Apan dili ba si Jehova mao ang Diyos sa “Daang Tugon,” ang Diyos sa karaang Israel?’ tingali mangutana ka. Tinuod nga si Jehova nagpadayag sa iyang kaugalingon ngadto sa mga Israelinhon. Sa gihapon, tungod sa paglalang sa unang tawhanong magtiayon, si Jehova mao ang Diyos “kang kinsa utang sa tanang kabanayan . . . sa yuta ang ngalan niini.” (Efeso 3:15) Kon nagtuo ka nga angayng tahoron ang imong mga katigulangan, dili ba angayng moyukbo sa Usa nga naghatag ug kinabuhi ngadto sa unang tawo, ang atong komong katigulangan, kinsa mao ang tinubdan sa tanang kaliwat nga naglungtad sa yuta karon?

Ang Maglalalang sa katawhan dili hiktin-ug-hunahuna. Tinuod, sa usa ka higayon siya adunay linain nga relasyon uban sa nasod sa Israel. Apan bisan pa niana, gibukhad niya ang iyang mga bukton ngadto sa tanan kinsa nagtawag sa iyang ngalan. Usa ka maalamong hari sa Israel miingon diha sa pag-ampo kang Jehova: “Ngadto sa usa ka langyaw, nga dili sakop sa imong katawhang Israel ug kinsa gikan pa gayod sa usa ka halayo nga yuta tungod sa imong ngalan . . . , hinaot nga mamati ka gikan sa kalangitan, . . . ug buhata ang tanang pagtawag sa langyaw kanimo; aron ang tanang katawhan sa yuta mahibalo sa imong ngalan.” (1 Hari 8:​41-43) Hangtod karong adlawa, ang katawhan sa tanang kanasoran mahimong makahibalo kang Jehova ug makabaton ug makahuloganong relasyon uban kaniya. Apan sa unsang paagi kana makaapektar kanimo?

Mga Kaayohan sa Pagkahibalo Kang Jehova

Balik sa ilustrasyon sa nag-unang artikulo, kon nakadawat ka ug maanindot nga pagkaputos nga pakete, natural nga ikaw buot mahibalo kon para sa unsa ang gasa. Unsaon kini paggamit ug pag-atiman? Sa susama, kita buot mahibalo kon unsay anaa sa hunahuna sa Diyos sa dihang iyang giandam ang yuta alang kanato. Ang Bibliya nag-ingon nga siya “wala maghimo niini alang sa walay kapuslanan,” apan iyang “giumol kini aron pagapuy-an,” sa ato pa, sa mga tawo.​—Isaias 45:18.

Apan, ang kadaghanang tawo wala magtagad sa gasa sa Maglalalang. Padayon nilang ginadaot ang yuta, sa dakong kasuko ni Jehova. Bisan pa, sumala sa kahulogan sa iyang ngalan, determinado si Jehova sa pagtuman sa iyang orihinal nga katuyoan alang sa tawo ug sa yuta. (Salmo 115:​16; Pinadayag 11:18) Iyang ayohon ang yuta ug ihatag kini ingong panulondon ngadto niadtong andam magkinabuhi ingong iyang masinugtanong mga anak.​—Mateo 5:5.

Gibatbat sa kataposang basahon sa Bibliya kon unsay kahimtang sa mga butang sa dihang kana mahitabo: “Tan-awa! Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. . . . Ug iyang pahiran ang matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang miagi na.” (Pinadayag 21:​3, 4) Wala na unyay magpatulo ug mga luha sa kaguol o pagbangotan tungod sa kamatayon sa usa nga minahal. Wala na unyay motuaw sa pagpangayog tabang tungod sa kawalay-paglaom o pag-antos sa kasakit sa makamatayng mga sakit. Bisan “ang kamatayon pagawagtangon.” (1 Corinto 15:26; Isaias 25:​8; 33:24) Kini naghubit sa matang sa kinabuhi nga buot ni Jehova nga maoy atong tagamtamon sa dihang iyang gilalang ang atong unang katigulangan.

Sa pagkamatuod, ikaw makatan-aw-daan sa maong samag paraiso nga mga kahimtang karon taliwala sa mga magsisimba ni Jehova. Iyang gisultihan sila: “Ako, si Jehova, ako mao ang imong Diyos, ang Usa nga nagatudlo kanimo sa pagpahimulos, ang Usa nga nagamando kanimo sa dalan nga imong pagalaktan.” (Isaias 48:17) Si Jehova maoy usa ka malulotong Amahan nga nagatudlo kanato, nga iyang mga anak, sa labing maayong paagi sa pagkinabuhi. Ang iyang mga giya alang sa tawo nagtagana ug, dili walay kapuslanang mga pagdili, kondili mahigugmaong panalipod. Ang pagsunod niini mosangpot ug matuod nga kagawasan ug kalipay, sama sa nahisulat: “Karon si Jehova mao ang Espiritu; ug kon asa gani ang espiritu ni Jehova, adunay kagawasan.” (2 Corinto 3:17) Pinaagi sa pagsunod sa mga giya nga gihatag diha sa Bibliya, ginatagamtam na karon niadtong nagadawat sa iyang pagmando ang kalinaw sa hunahuna nga sa usa niining mga adlawa molukop sa tibuok kalibotan sa katawhan.​—Filipos 4:7.

Pagkamaayo nga Amahan si Jehova! Andam ka bang mokat-on ug dugang pa bahin sa Usa nga maoy nagpaluyo sa tanang katingalahan sa kalalangan? Alang niadtong andam, ang mga kaayohan bililhon kaayo bisan karon. Ug sa umaabot ang mga panalangin mahimong walay kataposan.

[Hulagway sa panid 5]

Ang balaang ngalan nga gisulat sa upat ka Hebreohanong mga letra makita sa mga paril diha sa daghang karaang mga simbahan