Jesu-Kristo—Kinsa Siya?
“BISAN ang daghang tawo nga dili Kristohanon nagtuo nga Siya maoy usa ka bantogan ug maalamong magtutudlo. Siya gayod maoy usa sa labing impluwensiyal nga mga tawo nga nabuhi sukad.” (The World Book Encyclopedia) Kinsa “Siya”? Si Jesu-Kristo, ang magtutukod sa Kristiyanidad. Nahibalo ka ba kon kinsa siya? Sa bisan unsang paagi siya ba nakaapekto sa imong kinabuhi?
Ang mga panghitabo sa ministeryo ni Jesus gitala sa Bibliya diha sa upat ka makasaysayanhong mga sinulat nga gitawag ug mga Ebanghelyo. Unsa ka tinuod kining mga asoya? Human kini masusi, ang iladong historyanong si Will Durant misulat: “Nga ang pipila ka simpleng mga tawo sa usa ka kaliwatan nag-imbento ug gamhanan kaayo ug madanihong personalidad, nga hataas kaayog sukdanan sa pamatasan ug makapadasig kaayong panan-awon sa panag-igsoonay sa tawo, maoy usa ka milagro nga labi pang dili-katuohan kay sa bisan unsa pa nga natala diha sa mga Ebanghelyo.”
Apan, alang sa milyonmilyong katawhan sa Oriente ug bisan diin, si Jesu-Kristo wala hiilhi. Tingali nagtuo silang siya naglungtad, apan wala sila maghunahuna nga may kalabotan siya sa ilang mga kinabuhi. Ang uban nagsalikway kang Jesus nga dili angayng tagdon tungod sa nahimo sa iyang nag-angkong mga sumusunod. ‘Ilang gihulogag bomba atomika ang Nagasaki,’ matod sa pipila didto sa Hapon, ‘usa ka siyudad nga may daghang Kristohanon kay sa kadaghanang mga siyudad sa Hapon.’
Apan, basolon ba nimo ang mananambal sa sakit sa pasyente kon ang pasyente napakyas sa pagsunod sa reseta sa doktor? Dili gayod. Ang katawhan sa Kakristiyanohan dugay nang nagsalikway sa reseta ni Jesus aron madaog ang ilang adlaw-adlawng mga suliran. Busa inay isalikway si Jesus tungod sa gitawag nga mga Kristohanon, nga wala magsunod sa iyang mga instruksiyon, nganong dili mokat-on bahin kaniya alang sa imong kaugalingon? Susiha ang Bibliya, ug tinoa kon kinsa gayod si Jesus ug kon sa unsang paagi siya makapausab pa gani sa imong kinabuhi.
Gugma—Ang Iyang Instruksiyon
Si Jesu-Kristo maoy usa ka dakong magtutudlo nga nagkinabuhi sa Palestina sa halos 2,000 na ka tuig kanhi. Diyutay lamang kaayo ang nasayran bahin sa iyang pagkabata. (Mateo, mga kapitulo 1 ug 2; Lucas, mga kapitulo 1 ug 2) Sa nag-edad na siyag 30 anyos, gisugdan ni Jesus ang iyang ministeryo aron “manaksi sa kamatuoran.” (Juan 18:37; Lucas 3:21-23) Ang upat ka makasaysayanhong mga tigtaho sa kinabuhi ni Jesus nagtumong sa pagtagad sa iyang publikong ministeryo, ang kataposang tulo ka tuig ug tunga sa iyang temporaryong pagpuyo sa yuta.
Panahon sa iyang ministeryo, gihatagan ni Jesus ang iyang mga tinun-an sa yawi sa pagdumala sa nagkadaiyang mga suliran sa ilang kinabuhi. Unsa ang maong yawi? Kadto mao ang gugma. Diha sa usa sa labing-iladong mga wali sa kasaysayan, nga gitawag ug Wali sa Bukid, gitudloan ni Jesus ang iyang mga tinun-an kon unsaon sa pagpakitag gugma ngadto sa isigkatawo. Siya miingon: “Busa, ang tanang butang nga buot ninyo nga buhaton sa mga tawo nganha kaninyo, kamo usab kinahanglang magbuhat sa ingon ngadto kanila.” (Mateo 7:12) Kining prinsipyoha gitawag ug Bulawanong Lagda. Ang “mga tawo” nga gihisgotan ni Jesus dinhi naglakip gani bisan sa mga kaaway sa usa ka tawo. Sa mao gihapong wali, siya miingon: “Padayon sa paghigugma sa inyong mga kaaway ug sa pag-ampo alang sa mga nagalutos kaninyo.” (Mateo 5:44) Dili ba ang maong gugma magsulbad sa daghang suliran nga atong giatubang karong adlawa? Ang pangulong Hindu nga si Mohandas Gandhi naghunahuna sa ingon. Siya gikutlo nga miingon: “Kon [kita] magkahiusa sa mga pagtulon-ang gihatag ni Kristo sa maong Wali sa Bukid, masulbad unta nato ang mga suliran . . . sa tibuok kalibotan.” Ang pagtulon-an ni Jesus bahin sa gugma, kon ipadapat, makaayo sa mga sakit sa katawhan.
Iyang Gugma nga Nagalihok
Gibuhat ni Jesus ang iyang gitudlo. Iyang giuna ang intereses sa uban kay sa iyang kaugalingon ug gipakita ang gugma nga nagalihok. Usa ka adlaw niana, si Jesus ug ang iyang mga tinun-an nagsilbi sa daghang tawo, nga wala na makahigayon sa pagpangaon. Nakita ni Jesus ang panginahanglan sa iyang mga tinun-an nga ‘mopahulay ug diyutay,’ busa miadto sila sa usa ka mingawng dapit. Apan ang panon nag-una kanila ug naghulat sa ilang pag-abot. Unsa kahay imong buhaton kon ikaw pa ang diha sa kahimtang ni Jesus? Buweno, si Jesus ‘gitukmod sa kaluoy alang kanila’ ug ‘misugod pagtudlo kanila sa daghang butang.’ (Marcos 6:30-34) Kining kusganong pagbati sa kaluoy nagtukmod kaniya sa pagtabang sa uban.
Ang gihimo ni Jesus alang sa kaayohan sa uban wala malimitahe sa espirituwal nga mga pagtulon-an. Mitabang usab siya sa praktikal nga paagi. Pananglitan, usa ka adlaw niana iyang gipakaon ang 5,000 ka lalaki (dugang pa sa kababayen-an ug kabataan) nga naminaw kaniya hangtod sa kahaponon. Sa laing higayon gipakaon usab niya ang lain pang 4,000. Sa unang okasyon, gigamit niya ang lima ka pirasong tinapay ug duha ka isda ug, sa ulahi, pito ka pirasong tinapay ug pipila ka gagmayng isda. (Mateo 14:14-21; 15:32-38; Marcos 6:35-44; 8:1-9) Mga milagro? Oo, siya maoy usa ka tigmilagro.
Giayo usab ni Jesus ang daghang masakiton. Giayo niya ang buta, ang piang, ang mga sanlahon, ug ang bungol. Aw, gibanhaw pa gani niya ang mga patay! (Lucas 7:22; Juan 11:30-45) Makausa, usa ka sanlahon nangamuyo kaniya: “Kon buot mo lamang, mapahinlo mo ako.” Unsay sanong ni Jesus? “Iyang gituy-od ang iyang kamot ug mihikap kaniya, ug miingon kaniya: ‘Buot ko. Mamahinlo ka.’” (Marcos 1:40, 41) Si Jesus natukmod sa kusganong tinguha sa pagtabang kanila. Pinaagi sa maong mga milagro, iyang gipakita ang iyang gugma alang sa mga sinakit.
Lisod tuohan? Apan gihimo ni Jesus ang kadaghanan sa iyang mga milagro diha sa publiko. Bisan ang iyang mga magsusupak, nga naningkamot sa pagpangitag sayop diha kaniya sa matag higayon, wala makapangulipas sa kamatuoran nga naghimo siyag mga milagro. (Juan 9:1-34) Gawas pa, ang iyang mga milagro dunay katuyoan. Nagtabang kadto sa mga tawo sa pag-ila kang Jesus nga mao ang usa nga gipadala sa Diyos.—Juan 6:14.
Ang mubo lamang nga paghisgot sa mga pagtulon-an ni Jesus ug sa iyang kinabuhi magdasig kanato sa paghigugma kaniya ug magtukmod kanato sa pagsundog sa iyang gugma. Apan, dili lamang kana mao ang bugtong paagi nga si Jesus makaapekto sa imong kinabuhi. Dili lamang siya maoy usa ka dakong magtutudlo nga nagtudlog gugma. Iyang gipakita nga siya dunay una-tawhanong paglungtad isip bugtong Anak sa Diyos. (Juan 1:14; 3:16; 8:58; 17:5; 1 Juan 4:9) Siya usab dunay tapos-tawhanong paglungtad, nga nagpahimo kaniyang mas hinungdanon kanimo. Gipakita sa Bibliya nga si Jesus gibanhaw ug karon naentrono ingong Hari sa Gingharian sa Diyos. (Pinadayag 11:15) Si Jesus miingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3; 20:31) Sa pagkatinuod, ang pagkuha ug kahibalo bahin kang Jesu-Kristo mahimong magkahulogan ug walay kataposang kinabuhi sa Paraiso! Sa unsang paagi mahimo kana? Nganong dili mokat-og dugang bahin kang Jesus ug tan-awa kon sa unsang paagi ‘ang gugma nga iya sa Kristo nagatukmod kanato’ sa pagsundog kaniya? (2 Corinto 5:14) Ang mga Saksi ni Jehova malipay sa pagtabang kanimo.—Juan 13:34, 35.
Gawas kon gipaila, ang tanang kinutlo sa Bibliya naggikan sa New World Translation of the Holy Scriptures.