Sa Unsang Paagi si Jesus Makabag-o sa Imong Kinabuhi?
SI Jesu-Kristo maoy usa ka Dakong Magtutudlo nga nagkinabuhi sa Palestina halos 2,000 ka tuig kanhi. Diyutay lamang kaayo ang nahibaloan bahin sa iyang panahon sa pagkabata. Apan, may pamatuod nga sa dihang siya mga 30 anyos na ang edad, siya nagsugod sa iyang ministeryo aron “manaksi sa kamatuoran.” (Juan 18:37; Lucas 3:21-23) Ang upat ka tinun-an nga nagsulat sa mga asoy sa iyang kinabuhi nagsentro sa pagtagad diha sa tulo ug tunga ka tuig nga misunod.
Sa panahon sa iyang ministeryo, si Jesu-Kristo naghatag sa iyang mga tinun-an ug sugo nga mahimong tambal sa daghang sakit sa kalibotan. Unsa man kana? Si Jesus miingon: “Ako magahatag kaninyo ug usa ka bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa.” (Juan 13:34) Oo, ang solusyon sa daghang sakit sa katawhan mao ang gugma. Sa laing okasyon, sa dihang gipangutana si Jesus kon hain nga sugo ang kinadak-an, siya mitubag: “‘Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.’ Kini ang kinadak-an ug unang sugo. Ang ikaduha, nga susama niini, mao kini, ‘Higugmaon mo gayod ang imong silingan ingon sa imong kaugalingon.’”—Mateo 22:37-40.
Si Jesus nagpakita kanato pinaagi sa mga pulong ug buhat kon unsaon sa paghigugma sa Diyos ug sa isigkatawo. Atong tagdon ang pipila ka pananglitan ug tan-awon kon unsay atong makat-onan gikan kaniya.
Iyang mga Pagtulon-an
Diha sa usa sa labing-iladong mga wali sa kasaysayan, gisultihan ni Jesu-Kristo ang iyang mga sumusunod: “Walay usa nga makapaulipon sa duha ka agalon; kay mahimong iyang dumtan ang usa ug higugmaon ang usa, o motapot siya sa usa ug tamayon ang usa. Dili kamo makapaulipon ngadto sa Diyos ug sa Bahandi.” (Mateo 6:24) Ang pagtulon-an ba ni Jesus bahin sa pagbutang ug una sa Diyos sa atong mga kinabuhi praktikal gihapon karon, samtang daghan kaayong tawo ang nagtuo nga ang kuwarta makasulbad sa tanang problema? Tinuod, nagkinahanglan kita ug kuwarta aron mabuhi. (Ecclesiastes 7:12) Bisan pa, kon atong tugotan ang mga “Bahandi” nga mahimong atong agalon, “ang gugma sa salapi” maoy mokontrolar kanato, nga magbuot sa atong tibuok kinabuhi. (1 Timoteo 6:9, 10) Daghan niadtong nangahulog niining lit-aga misangpot nga napildihan sa ilang pamilya, ilang panglawas, ug bisan sa ilang mga kinabuhi.
Sa laing bahin, ang pagdangop sa Diyos ingong atong Agalon naghatag ug kahulogan sa kinabuhi. Ingong Maglalalang, siya mao ang Tuboran sa Kinabuhi, ug busa, siya lamang ang takos sa atong pagsimba. (Salmo 36:9; Pinadayag 4:11) Kadtong nakakat-on bahin sa iyang mga hiyas ug nakadangat sa paghigugma kaniya napalihok sa pagbantay sa iyang mga sugo. (Ecclesiastes 12:13; 1 Juan 5:3) Pinaagi sa pagbuhat niini, kita makabatog kaayohan mismo.—Isaias 48:17.
Diha sa Wali sa Bukid, gitudloan usab ni Jesus ang iyang mga tinun-an kon unsaon sa pagpasundayag sa gugma alang sa mga isigkatawo. Siya miingon: “Busa, ang tanang butang nga buot ninyo nga buhaton sa mga tawo nganha kaninyo, kamo usab kinahanglang magbuhat sa ingon ngadto kanila.” (Mateo 7:12) Ang pulong “mga tawo” nga gigamit ni Jesus dinhi naglakip bisan sa mga kaaway. Diha sa mao gihapong wali, siya miingon: “Padayon sa paghigugma sa inyong mga kaaway ug sa pag-ampo alang sa mga nagalutos kaninyo.” (Mateo 5:43, 44) Dili ba ang maong gugma makasulbad ug daghang problema nga atong ginaatubang karon? Ang Hindu nga lider nga si Mohandas Gandhi nagtuo usab niana. Siya gikutlo nga nag-ingon: “Kon [kita] nagsunod pa sa mga pagtulon-an nga gihatag ni Kristo niining Wali sa Bukid, nasulbad na unta nato ang mga problema . . . sa tibuok kalibotan.” Ang mga pagtulon-an ni Jesus mahitungod sa gugma, kon ipadapat, makasulbad ug daghang kalisdanan sa katawhan.
Iyang mga Buhat
Dili lamang nagtudlo si Jesus ug maalamong mga kamatuoran kon unsaon sa pagpasundayag sa gugma kondili iyang gihimo usab ang iyang gitudlo. Pananglitan, iyang giuna ang intereses sa uban kay sa iyaha. Usa ka adlaw si Jesus ug ang iyang mga tinun-an okupado kaayo sa pagtabang sa mga tawo nga sila walay panahon gani sa pagkaon. Nakita ni Jesus ang panginahanglan sa iyang mga tinun-an sa pagpahulay makadiyot, ug iyang gidala sila sa usa ka mingawng dapit. Apan sa nakaabot sila didto, sila nakakita ug panon sa mga tawo nga naghulat kanila. Unsa kahay imong reaksiyon sa pagkakitag panon sa mga tawo nga nagpaabot nga moalagad ka samtang mibati ka nga nagkinahanglan kag pahulay? Aw, si Jesus ‘naluoy kanila’ ug ‘misugod sa pagtudlo kanila sa daghang butang.’ (Marcos 6:34) Kining kabalaka alang sa uban kanunayng nagpalihok kang Jesus sa pagtabang kanila.
Si Jesus naghimo ug labaw pa alang sa mga tawo kay sa pagtudlo kanila. Siya mihatag usab ug praktikal nga tabang. Pananglitan, sa usa ka okasyon iyang gipakaon ang kapin sa 5,000 ka tawo nga namati kaniya hangtod sa hapon. Wala magdugay human niadto, iyang gipakaon ang laing dakong panon sa mga tawo—niining higayona kapin sa 4,000—kinsa namati kaniya sulod sa tulo ka adlaw ug wala nay nabilin pa nga pagakan-on. Sa unang higayon, siya migamit ug lima ka tinapay ug duha ka isda, ug sa ulahi, pito ka tinapay ug pipila ka gagmayng isda. (Mateo 14:14-22; 15:32-38) Mga milagro ba? Oo, siya maoy usa ka tighimog milagro.
Si Jesus nag-ayo usab ug daghang masakiton. Iyang giayo ang buta, ang mga bakol, ang mga sanlahon, ug ang mga bungol. Ngani, iya pang gibanhaw ang patay! (Lucas 7:22; Juan 11:30-45) Kas-a nangaliyupo kaniya ang usa ka sanlahon: “Kon buot mo lamang, mapahinlo mo ako.” Unsay reaksiyon ni Jesus? “Niana gitukmod siya sa kaluoy, ug iyang gituy-od ang iyang kamot ug mihikap kaniya, ug miingon kaniya: ‘Buot ko. Mamahinlo ka.’” (Marcos 1:40, 41) Pinaagi sa maong mga milagro, si Jesus nagpasundayag sa iyang gugma sa mga sinakit.
Nalisdan ka ba sa pagtuo sa mga milagro ni Jesus? Ang uban nalisdan. Apan, hinumdomi nga gihimo ni Jesus ang iyang mga milagro atubangan sa daghang tawo. Bisan ang iyang mga magsusupak, kinsa naningkamot sa pagpangitag sayop kaniya sa matag higayon, dili makalimod nga siya maoy usa ka tighimog milagro. (Juan 9:1-34) Dugang pa, ang iyang mga milagro adunay katuyoan. Kini nakatabang sa mga tawo sa pagkaila kaniya ingong Usa nga gipadala sa Diyos.—Juan 6:14.
Sa paghimo sa mga milagro si Jesus wala magpakuhag pagtagad sa iyang kaugalingon. Hinunoa, iyang gihimaya ang Diyos, ang Tuboran sa iyang gahom. Sa Capernaum siya didto kas-a sa usa ka balay nga puno sa mga tawo. Usa ka tawong paralitiko gustong mamaayo apan dili makasulod. Busa gitunton siya sa iyang mga higala sa teheras agi sa atop. Sa pagkakita sa ilang pagtuo, giayo ni Jesus ang tawong paralitiko. Tungod niini, ang mga tawo “naghimaya sa Diyos” ug miingon: “Wala kita sukad makakitag sama niini.” (Marcos 2:1-4, 11, 12) Ang mga milagro ni Jesus nakahatag ug kadayeganan kang Jehova, nga iyang Diyos, ug nakatabang niadtong nanginahanglan.
Apan, ang milagrosong pagpang-ayo sa masakiton dili mao ang pangunang tumong sa ministeryo ni Jesus. Ang usa nga nagsulat sa asoy sa kinabuhi ni Jesus nagpatin-aw: “Kini sila nahisulat aron kamo motuo nga si Jesus mao ang Kristo nga Anak sa Diyos, ug aron nga, tungod sa pagtuo, kamo makabaton ug kinabuhi pinaagi sa iyang ngalan.” (Juan 20:31) Oo, si Jesus mianhi sa yuta aron ang mga tawong may pagtuo makabaton ug kinabuhi.
Iyang Halad
‘Si Jesus mianhi sa yuta?’ tingali mangutana ka. ‘Diin siya gikan?’ Si Jesus mismo miingon: “Ako nanaog gikan sa langit aron buhaton, dili ang akong kabubut-on, kundili ang kabubut-on niya nga nagpadala kanako.” (Juan 6:38) Siya dunay una-tawhanong paglungtad ingong bugtong Anak sa Diyos. Nan unsa ang kabubut-on sa Usa nga nagpadala kaniya sa yuta? “Gihigugma pag-ayo sa Diyos ang kalibotan mao nga iyang gihatag ang iyang bugtong-gianak nga Anak,” nag-ingon si Juan, usa sa mga magsusulat sa Ebanghelyo, “aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay-kataposan.” (Juan 3:16) Sa unsang paagi kini posible?
Ang Bibliya nagpadayag kon sa unsang paagi ang kamatayon nahimong dili-malikayang kasinatian sa katawhan. Ang unang tawhanong magtiayon nakadawat gikan sa Diyos ug kinabuhi nga may palaabotong mabuhi sa walay kataposan. Ugaling, sila mipili sa pagsupak sa ilang Magbubuhat. (Genesis 3:1-19) Tungod niining lihoka, ang unang tawhanong sala, ang mga anak ni Adan ug Eva nakapanunod sa mangil-ad nga panulondon nga kamatayon. (Roma 5:12) Aron mahatagan ang katawhan ug tinuod nga kinabuhi, ang sala ug kamatayon kinahanglang wad-on.
Walay siyentipiko ang makawagtang sa kamatayon pinaagi sa usa ka matang sa pagmaniobra sa gene. Apan, ang Maglalalang sa katawhan may katakos sa pagdala sa mga tawong masinugtanon ngadto sa kahingpitan aron sila mabuhi sa walay kataposan. Diha sa Bibliya kini nga tagana gitawag nga lukat. Gibaligya sa unang tawhanong magtiayon ang ilang kaugalingon ug ang ilang mga anak ngadto sa pagkaulipon sa sala ug kamatayon. Ilang gibayloan ang kinabuhi ingong mga tawong hingpit nga masinugtanon sa Diyos alang sa kinabuhi nga nahimulag sa Diyos, nga naghimog ilang kaugalingong mga desisyon labot sa kon unsay matarong ug kon unsay daotan. Aron mapalit ug balik ang hingpit tawhanong kinabuhi, usa ka bili ang kinahanglang ibayad nga katumbas sa hingpit tawhanong kinabuhi nga giwala sa atong unang mga ginikanan. Kay napanunod ang pagkadili-hingpit, ang mga tawo dili takos aron matagana kana nga bili.—Salmo 49:7.
Busa si Jehova nga Diyos misalga aron sa pagtabang. Iyang gibalhin ang hingpit nga kinabuhi sa iyang bugtong Anak ngadto sa tagoangkan sa usa ka ulay, kinsa nanganak kang Jesus. Sa mga dekadang nangagi, tingali wala ka motuo sa ideya bahin sa pagpanganak sa usa ka ulay. Apan, karon ang mga siyentipiko nakapatubog mga hayop nga sus-an sa artipisyal nga paagi ug nakapasulod ug mga gene gikan sa usa ka hayop ngadto sa lain. Nan, kinsa ang may katungod sa pagduhaduha sa katakos sa Maglalalang sa pagsaylo sa naandang paagi sa pagpanganak?
Sa paglungtad sa hingpit nga tawhanong kinabuhi, ang bili sa paglukat sa katawhan gikan sa sala ug kamatayon nabatonan. Bisan pa niana, ang bata nga natawo sa yuta ingong Jesus kinahanglang modako aron mahimong “mananambal” nga makahatag ug “tambal” sa pag-ayo sa mga sakit sa katawhan. Iyang gihimo kini pinaagi sa pagkinabuhig hingpit, walay sala nga kinabuhi. Nakita ni Jesus dili lamang ang kasakit sa katawhan ilalom sa sala kondili nakasinati sa pisikal nga mga limitasyon sa pagkahimong usa ka tawo. Kini naghimo kaniya nga labi pang mahangawaong mananambal. (Hebreohanon 4:15) Ang milagrosong mga pagpang-ayo nga iyang gihimo panahon sa iyang kinabuhi dinhi sa yuta nagpamatuod nga siya may tinguha ug gahom sa pag-ayo sa masakiton.—Mateo 4:23.
Human sa pagministeryo sulod sa tulo ug tunga ka tuig dinhi sa yuta, si Jesus gipatay sa iyang mga magsusupak. Iyang gipakita nga ang usa ka tawong hingpit mahimong masinugtanon sa Maglalalang bisan pa sa kinagrabehang mga pagsulay. (1 Pedro 2:22) Ang iyang gihalad nga hingpit tawhanong kinabuhi nahimong bili sa lukat, nga makalukat sa katawhan gikan sa sala ug kamatayon. Si Jesu-Kristo nag-ingon: “Walay usa nga may gugmang labaw pa niini, nga ang usa magatugyan sa iyang kalag alang sa iyang mga higala.” (Juan 15:13) Sa ikatulong adlaw human nga siya mamatay, si Jesus gibanhaw sa espiritu nga kinabuhi, ug sa milabay ang pipila ka semana siya misaka ngadto sa langit sa pagtanyag sa bili sa lukat ngadto kang Jehova nga Diyos. (1 Corinto 15:3, 4; Hebreohanon 9:11-14) Sa paghimo niini, si Jesus nakapadapat sa merito sa iyang halad lukat niadtong mosunod kaniya.
Gusto ka ba nga makapahimulos niining paagi sa pagpang-ayo sa espirituwal, emosyonal, ug pisikal nga mga sakit? Aron makapahimulos niini nagkinahanglan kinig pagtuo kang Jesu-Kristo. Nganong dili ka moduol mismo sa Mananambal? Mahimo nimo kana pinaagi sa pagtuon bahin kang Jesu-Kristo ug sa iyang papel sa pagluwas sa matinumanong katawhan. Ang mga Saksi ni Jehova malipay sa pagtabang kanimo.
[Hulagway sa panid 5]
Si Jesus may tinguha ug gahom sa pag-ayo sa masakiton
[Hulagway sa panid 7]
Sa unsang paagi ang kamatayon ni Jesus nakaapektar kanimo?