Magkalipay sa Pulong sa Diyos
MALIPAYON ang tawo kansang “kalipay anaa sa balaod ni Jehova.” Ang maong tawo magbasa sa Pulong sa Diyos “sa hinayng tingog sa adlaw ug gabii.” (Sal. 1:1, 2) Nakasinati ka na ba sa maong kalipay? Sa unsang paagi mapauswag nimo ang kalipay nga ihatag kanimo sa Pulong sa Diyos?
Pamati Samtang Mosulti si Jehova
Ayaw lamang basaha ang mga pulong. Handurawa ang mga kahimtang sa imong ginabasa. Hunahunaa ang mga tingog sa mga tawong gikutlo. Samtang ginabasa mo ang pang-abling mga kapitulo sa Bibliya, paminawi mismo si Jehova nga nagbutyag, sa inanay, kon unsay gibuhat aron ang yuta mahimong angayng puy-anan sa tawo. Pamati samtang gisultihan niya ang iyang Anak, ang Batid nga Magbubuhat, nga miabot na ang panahon aron lalangon ang unang mga tawo. Handurawa ang talan-awon: Si Adan ug Eva mirebelde, gihukman sila sa Diyos ug, unya, iyang gipapahawa sila gikan sa Paraiso. (Genesis, mga kap. 1-3) Batia ang kahingangha inigbasa nimo nga ang usa ka tingog gikan sa langit nag-ila kang Jesu-Kristo ingon nga Anak sa Diyos, ang hinigugma, ang usang gipadala sa Diyos aron ihatag ang iyang kinabuhi alang sa katawhan. (Mat. 3:16, 17) Sulayi paghanduraw ang reaksiyon ni apostol Juan sa pagkadungog niya kang Jehova nga nagpahayag: “Tan-awa! Ginabag-o ko ang tanang butang.” (Pin. 21:5) Sa pagkatinuod, ang pagbasa sa Pulong sa Diyos sa maong paagi maoy makapalipay nga kasinatian!
Padayona pagbasa ang inspiradong talaan, ug ikaw makaila kang Jehova ingong halangdon ug makapahingangha nga persona. Ikaw kusganong madani niining Usa nga nahigugma kanato, nga maluluy-ong magdumala kanato, nga motabang kanato kon kita sa kamapaubsanon maningkamot sa pagbuhat sa iyang kabubut-on, ug mopakita kanato kon sa unsang paagi magmalamposon sa tanan natong pagabuhaton.—Jos. 1:8; Sal. 8:1; Isa. 41:10.
Kon mas daghang panahon ang imong gugolon sa pagbasa sa Bibliya, mas dako ang imong katagbawan samtang motubo ang imong kahibalo bahin sa kabubut-on sa Diyos alang kanimo. Apan ang kalipay mosaylo pa niana. Sa dihang ang imong pagbasa mohatag kanimog tabang nga imong gikinahanglan aron madumala sa maalamong paagi ang imong mga suliran, mobati ka sama sa salmista nga miingon: “Katingalahan ang imong mga pahinumdom. Mao kana nga gituman sila sa akong kalag.” (Sal. 119:129) Magmaya ka usab inigkasabot nimo gikan sa Kasulatan sa mga prinsipyo nga motabang nimo sa pag-umol sa imong panghunahuna ug sa imong mga tinguha diha sa diyosnong paagi.—Isa. 55:8, 9.
Gitagana sa Bibliya ang moral nga giya nga manalipod kanato gikan sa kadaot ug magpakita kanato sa hustong dalan. Samtang basahon nato kini, masabtan nato nga si Jehova maoy usa ka Amahan nga nahibalo kon unsang mga sulirana ang mosangpot kon magpadaog kita sa unodnong mga tinguha. Dili niya buot nga mag-antos kita sa grabeng mga sangpotanan nga di-kalikayang modangat gumikan sa pagtamay sa iyang taas nga mga sukdanan sa moral. Iya kitang giatiman ug buot niyang makatagamtam kita sa labing maayo sa kinabuhi. Ang atong pagbasa sa iyang Pulong motabang nato sa pagpabili nga mas bug-os sa dako kaayong panalangin nga siya mao ang atong Diyos ug langitnong Amahan.
Basaha ang Bibliya Kada Adlaw
Ang salmista nagsulti bahin sa tawo nga nagbasa sa Pulong sa Diyos kada adlaw: “Ang tanan nga ginabuhat niya magmalamposon.” (Sal. 1:3) Oo, bisan pa sa atong mga pagkadi-hingpit, bisan pa sa atong pagkinabuhi sa daotang sistema sa mga butang ni Satanas, ug bisan pa sa mga paningkamot sa Yawa sa paglamoy kanato, ang regular nga pagbasa ug pagpadapat sa gisulti sa Pulong sa Diyos makapaarang nato nga molampos diha sa tanang butang nga naglangkit sa atong relasyon kang Jehova.
Sanglit ginapit-osan kita niining daang sistema, ang pagpatuhop sa mga hunahuna sa Maglalalang bisan sa pipila ka bililhong mga gutlo sa matag adlaw makapalagsik kanato. Ang ubang nangabilanggo tungod sa ilang pagtuo nakabaton lamag laktawlaktaw nga mga bersikulo nga nakaplagan nilang gikutlo diha sa mga artikulo sa mantalaan. Ila kining gigunting, gisag-ulo, ug gipamalandong. Gipanalanginan ni Jehova ang ilang mga paningkamot tungod kay gibuhat nila ang sumala sa gitugot sa ilang mga kahimtang sa pagkuha ug kahibalo gikan sa Pulong sa Diyos. (Mat. 5:3) Apan, ang kadaghanan kanato mas dakog kagawasan kay kanila. Dili kita angayng manghinapos nga ang dinalidaling pagbasa ug usa ka bersikulo sa Bibliya kas-a sa usa ka adlaw, sa kaugalingon, makahatag ug milagrosong epekto. Bisan pa niana, mabatonan nato ang mga panalangin, kon ipasibo nato ang atong mga prioridad aron makabasa ug usa ka bahin sa Bibliya kada adlaw, makapamalandong niana, ug makapadapat niana sa atong kinabuhi.
Sa pagkatinuod, ang atong labing maayong mga plano mahimong mabalda. Inigkahitabo niana, unahon nato ang mga butang nga tinuod gayong hinungdanon. Pananglitan, kita dili motuyo sa dili pag-inom ug tubig sa usa o duha ka adlaw. Nan, bisan kon unsa pay modangat sa atong adlaw-adlawng kinabuhi, kinahanglang mogahin kitag pipila ka panahon aron palagsikon ang atong kaugalingon sa mga tubig sa kamatuoran.—Buh. 17:11.
Hutda Pagbasa ang Pulong sa Diyos
Nabasa mo na ba ang tibuok Bibliya? Gibati sa uban nga bug-at ra kaayo sa hunahuna ang pagbasa gikan sa Genesis hangtod sa Pinadayag. Busa, daghan nga buot mobasa sa tibuok Bibliya nagsugod pinaagi sa pagbasa una sa Kristohanon Gregong Kasulatan. Ngano? Tingali tungod kay mas dali nilang masabtan kon sa unsang paagi kanang mga basahona sa Bibliya mapadapat kanila ingong mga indibiduwal nga buot mosubay sa mga lakang ni Kristo. O tingali tungod kay ang Kristohanon Gregong Kasulatan daw dali rang basahon—nga kapin lag diyutay sa ikaupat ka bahin sa Bibliya. Apan human nilag basa nianang 27 ka basahon, gitagad nila ang 39 ka basahon sa Hebreohanong Kasulatan ug sila misugod pagbasa ug pagkalipay niini. Pagkahuman nilag basa sa Hebreohanong Kasulatan, nakaugmad na silag batasan sa regular nga pagbasa sa Bibliya, busa nagpadayon sila, nga nagbasa sa Kristohanon Gregong Kasulatan sa ikaduhang higayon, ug wala na gayod sila mohunong. Hinaot nga himoon mo usab ang adlaw-adlaw nga pagbasa sa Pulong sa Diyos nga imong tibuok-kinabuhing batasan.
Duna bay tawo diha sa imong pamilya o kongregasyon nga dili makabasa? Nganong dili motanyag sa pagbasa nga regular sa Bibliya ngadto sa maong tawo? Makabaton kag kaayohan, mao man usab siya samtang pamalandongan niya ang iyang madunggan ug unya ipadapat kana sa iyang kinabuhi.—Pin. 1:3.
Ngadtongadto, buot nimo tingaling mohimog linaing mga proyekto maylabot sa imong pagbasa sa Bibliya. Ang pipila niini magpalambo sa imong pagpabili sa kalangkitan tali sa nagkalainlaing mga bahin sa Bibliya. Kon ang imong Bibliya dunay panaplin nga mga reperensiya, kini mahimong motultol nimo ngadto sa makasaysayanhong mga detalyadong impormasyon ug sa managsamang mga asoy. Kini makatabang nimo sa pagsabot sa mga kahimtang nga misangpot sa pagsulat sa nagkadaiyang mga salmo ingon man sa mga sulat nga gisulat sa mga apostoles ni Jesu-Kristo. Ang Insight on the Scriptures nagtaganag bahandi sa hinungdanong impormasyon bahin sa mga tawo, mga dapit, ug mga hiyas nga gihisgotan sa Bibliya. Ang mga tsart magdani sa pagtagad sa katumanan sa mga tagna sa Bibliya, magpakita kon kinsang mga haria ug mga manalagnaa ang mga kontemporaryo, ug mohatag sa duol nga mga petsa sa daghang hitabo sa Bibliya.
Samtang mamalandong ka sa imong makat-onan, masabtan nimo ang mga rason kon nganong ang tinong mga kahimtang naugmad taliwala sa katawhan sa Diyos. Makaplagan usab nimo kon nganong si Jehova nakiglabot sa iyang katawhan niadtong paagiha. Masabtan nimo kon sa unsang paagi ginatimbang ni Jehova ang mga buhat sa mga kagamhanan, mga katawhan, ug mga indibiduwal. Makahatag kini kanimog mas dakong pagsabot sa iyang panghunahuna.
Ang kasaysayan sa Bibliya mahimong mas makaiikag kanimo kon imong handurawon ang rehiyon nga maoy nahitaboan. Ang mga mapa sa kayutaan sa Bibliya magbutyag sa porma sa yuta ug sa mga gilay-on tali sa mga lugar. Pananglitan, kon banabanaon, diin motabok ang mga Israelinhon sa Pulang Dagat? Unsa ang gidak-on sa Yutang Saad? Unsa ka layo ang napanaw ni Jesus samtang gituman niya ang iyang yutan-ong ministeryo? Unsang mga talan-awon ang nakita ni Pablo sa iyang misyonaryong mga panaw? Ang mga mapa ug geograpikanhong mga kabatbatan mohatag ug mga detalye nga magpabuhi sa imong pagbasa. Asa nimo makaplagan ang mga mapa sa mga yuta sa Bibliya? Ang uban anaa sa Bag-ong Kalibotang Hubad sa Balaang Kasulatan. Ang mga tomo sa Insight naundan ug mga 70 ka mapa, ug dunay usa ka indise sa mapa sa kataposan sa unang tomo. Gamita ang Watch Tower Publications Index aron makita ang ubang mga mapa. Kon kini nga mga tabang dili mabatonan, gamita ang mga mapa nga gipatik diha sa Ang Bantayanang Torre aron matabangan ka sa imong pagbasa sa Bibliya.
Sa Hebreohanong Kasulatan, si Haring David nagdayeg kang Jehova, nga nag-ingon: “Pagkabililhon uyamot sa imong mga hunahuna! Oh Diyos, pagkadako gayod sa ilang katibuk-ang gidaghanon!” (Sal. 139:17) Sa Kristohanon Gregong Kasulatan, gidayeg ni apostol Pablo si Jehova tungod kay Siya “misidlak sa among mga kasingkasing aron sa pagbanwag kanila sa mahimayaong kahibalo sa Diyos pinaagi sa nawong ni Kristo.” (2 Cor. 4:6) Si David ug Pablo nagkinabuhi mga siglo ang gintang; apan, silang duha nalipay sa Pulong sa Diyos. Ingon man usab ikaw kon gahinan nimog panahon ang pagbasa sa tanang gihatag ni Jehova kanimo diha sa mga panid sa iyang inspiradong Pulong.