Paggamit ug Mikropono

ANG atong Kristohanong mga igsoong lalaki ug mga babaye mogastog daghang panahon ug kabudlay aron motambong sa Kristohanong mga tigom. Aron makapahimulos sila gikan sa gipamulong, kinahanglang sila makadungog nga tin-aw.

Sa mga adlaw sa karaang Israel, walay dekoryenteng kasangkapan sa pagpadako sa tingog. Sa namulong si Moises ngadto sa nasod sa Israel sa Kapatagan sa Moab una sila mosulod sa Yutang Saad, giunsa pagkadungog niadtong tanang mamiminaw, nga mikabat ug milyonmilyon? Lagmit gigamit ni Moises ang usa ka sistema sa hugnahugna nga pagpasa pinaagig mga tawo diin ang iyang mga pulong gisubli pagsulti sa serye sa mga lalaki nga gibutang sa nahiangayng mga bahin sa tibuok kampo. (Deut. 1:1; 31:1) Wala madugay human sa pagsugod sa mga Israelinhon sa ilang pagpukan sa yuta sa kasadpan sa Jordan, si Josue nagtigom sa nasod atubangan sa Bukid sa Gerizim ug Bukid sa Ebal, dayag uban sa mga Levihanon nga didto sa walog nga nag-ulang kanila. Didto ang tibuok katawhan nakadungog ug misanong ngadto sa balaang mga panalangin ug mga tunglo nga gipahayag kanila. (Jos. 8:33-35) Niadtong higayona usab, posibleng gigamit ang hugnahugna nga pagpasa pinaagig mga tawo, apan walay duhaduhang nakatabang usab ang ekselenteng kabandahan sa pagpalanog sa tingog niadtong dapita.

Mga 1,500 ka tuig sa ulahi sa dihang ang “dako kaayong mga panon sa katawhan nagtapok” sa Dagat sa Galilea aron mamati kang Jesus, siya misakayg sakayan, mipalayo sa baybay, ug milingkod aron mosulti ngadto sa panon sa mga tawo. (Mar. 4:​1, 2) Nganong nagsulti si Jesus gikan sa sakayan? Dayag tungod kay ang tawhanong tingog madungog uban ang talagsaong katin-aw ibabaw sa linaw nga tubig.

Hangtod sa sinugdan sa ika-20ng siglo, ang gidak-on ug katin-aw sa tingog sa usa ka mamumulong kasagarang gitino sa kon unsa ka daghang tigpatalinghog ang makadungog sa isulti. Hinuon, sugod sa katuigang 1920, ang mga alagad ni Jehova nagpahimulos sa dekoryenteng kasangkapan sa pagpadako sa tawhanong tingog panahon sa ilang mga kombensiyon.

Kasangkapan sa Pagpadako sa Tingog. Ang maong kasangkapan makapadako ug daghang beses sa tingog sa mamumulong ug bisan pa niana ang kalidad ug tono sa iyang tingog mao gihapon. Ang mamumulong dili makapahago sa iyang kuwerdas bokales. Ang mga tigpatalinghog dili malisdan sa pagkadungog sa gisulti. Hinunoa, sila makahatag ug bug-os nga pagtagad sa mensahe.

Dako ang nahimong paningkamot sa pagpaneguro nga adunay maayong kasangkapan sa pagpadako sa tingog panahon sa mga kombensiyon ug mga asembliya sa mga Saksi ni Jehova. Dugang pa, daghang Kingdom Hall mogamit ug kasangkapan aron padakoon ang mga tingog niadtong mohatag ug mga diskurso, magdumalag mga tigom, o magbasa gikan sa plataporma. Ug ang pipila ka kongregasyon adunay mga mikropono usab nga magamit sa mamiminaw sa dihang mokomento panahon sa mga tigom. Kon ang inyong kongregasyon adunay ingon nga kasangkapan, kat-oni ang paggamit ug maayo niini.

Pipila ka Pangunang mga Lagda. Aron magamit sa hustong paagi ang kasangkapan, ibutang sa hunahuna ang mosunod nga mga punto: (1) Kasagaran ang mikropono kinahanglang mga upat ngadto sa unom ka pulgada gikan sa imong baba. Kon ang mikropono duol kaayo, basin matuis ang imong mga pulong. Kon kini layo kaayo, dili maklaro ang imong tingog. (2) Kinahanglang ang mikropono anaa sa imong tungod, dili sa kiliran. Kon imong lihokon ang imong ulo patuo o pawala, sulti lamang sa dihang ang imong nawong natungod sa mikropono. (3) Gamita ang gidak-on ug gikusgon sa tingog nga labaw ug diyutay kay sa imong pakigkabildohay. Apan dili kinahanglang mosinggit. Ang kasangkapan sa pagpadako sa tingog daling makapaabot sa imong tingog ngadto sa kinalay-ang mga tawo sa imong mamiminaw. (4) Kon kinahanglan nga ikaw moigham o kaubohon o kaatsihon, seguroha ang pagpalayo sa imong ulo gikan sa mikropono.

Sa Dihang Magahatag ug Pakigpulong. Sa pagsaka nimo sa plataporma, ang usa ka igsoong lalaki kasagarang magpasibo sa posisyon sa mikropono. Tindog nga natural uban sa imong nawong nga nag-atubang sa mamiminaw samtang iyang ginahimo kana. Ibutang ang imong mga nota diha sa sanggaan sa basahon sa mamumulong, ug seguroha nga ang mikropono dili makababag niana.

Sa pagsugod nimo sa pagsulti, paminawa ang imong tingog iniggawas niini sa trompa. Kusog ba kaayo kini, o daw butobuto ang pipila ka pulong? Basin kinahanglan nga ikaw moatras ug usa o duha ka pulgada. Sa dihang sa daklit motan-aw ka sa imong nota, hinumdomi nga kinahanglang mosulti ka ug mobasa lamang sa dihang ang imong nawong natungod sa mikropono o anaa sa taas ug diyutay niini, dili sa ubos niini.

Sa Dihang Magabasa Diha sa Plataporma. Labing maayo ang pagkupot nga taas sa imong Bibliya o laing publikasyon aron ang imong nawong nag-atubang sa mamiminaw. Sanglit ang mikropono lagmit direktang anaa sa imong atubangan, basin kinahanglang ang pagkupot nimo sa imong balasahon ipakilid ug diyutay. Nagpasabot kini nga kinahanglang ang imong ulo ipakilid nimog diyutay sa pikas nga bahin sa mikropono. Unya sa imong pagbasa, ang imong tingog direktang matunong sa mikropono.

Ang kadaghanang igsoong lalaki nga magbasa panahon sa Pagtuon sa Bantayanang Torre motindog ug mosulti patunong sa gipatindog nga mikropono. Ang maong posisyon makapaposible sa mas luag nila nga pagginhawa ug sa pagbasa nga mas mapadayganon. Hinumdoming ang pagbasa sa mga parapo maoy usa ka dakong bahin sa tigom. Ang kaayohang makuha sa mamiminaw nagdependeg dako sa pagkadungog sa materyal nga ginabasa.

Sa Dihang Magakomento Panahon sa Tigom. Kon ang inyong kongregasyon mogamit ug mga mikropono alang sa pagkomento sa mamiminaw, hinumdomi nga gikinahanglan gihapon ang pagsultig tin-aw ug uban sa igong gidak-on sa tingog. Sa dihang magakomento, paningkamoti pagkupot ang imong tun-anang basahon o ang imong Bibliya. Kini makapaarang nimo sa pagkakitang tin-aw sa materyal samtang nagasulti ka tunong sa mikropono.

Sa pipila ka kongregasyon ang mga igsoong lalaki itudlo nga maoy motunol sa mga mikropono ngadto niadtong tawgon sa pagkomento. Kon kini mao ang kahimtang sa inyong kongregasyon, kon tawgon ka aron mokomento, ipadayon pagpataas ang imong kamot aron ang igsoong nagdala sa mikropono makakita kon diin ka naglingkod ug makatunol dayon niana kanimo. Kon ang matang sa mikropono mao kanang kuptan sa kamot, mahimong andam sa pagdawat niana. Ayaw pagsugod sa imong komento hangtod mapahimutang na ang mikropono. Pagkahuman sa imong komento, ibalik dayon ang mikropono.

Sa Dihang Adunay Bahin sa Usa ka Demonstrasyon. Ang paggamit ug mikropono panahon sa usa ka demonstrasyon nagkinahanglan ug linain nga abanteng paghunahuna. Kon nataod ang mikropono sa tungtonganan, ang duha nimo ka kamot libre pang mokupot sa imong Bibliya ug sa imong mga nota. Ang paggamit ug kuptan-sa-kamot nga mikropono makahatag ug mas dakong kagawasan sa paglihok, apan ikaw makahikay nga ang imong kauban maoy magkupot niana. Nianang paagiha ang imong mga kamot libreng makakupot sa Bibliya. Ikaw ug ang imong tagbalay kinahanglang magbansay niini aron ang imong kauban mahibalo kon unsaon pagkupot niana sa hustong paagi. Hinumdomi, usab, nga sa dihang anaa sa plataporma, kinahanglan nga dili nimo talikdan ang mamiminaw, ilabina kon ikaw nagasulti.

Sa mga demonstrasyon sa Tigom sa Pag-alagad, basin adunay ubay-ubayng may-bahin, ug basin sila molakawlakaw diha sa plataporma. Busa, basin gikinahanglan ang daghang mikropono. Kini kinahanglang ibutang nga abante sa hustong dapit o maandam nga gamiton sa mga may-bahin sa dihang sila moadto sa plataporma. Ang pagseguro nga ang mga mikropono anaa sa hustong dapit sa hustong panahon nagkinahanglag abante nga plano. Ang pagbansay sa mga demonstrasyon sa dili pa kana ipasundayag mohatag ug higayon nga pahimangnoan ang mga may-bahin sa epektibong paggamit ug mga mikropono. Kon ang pagbansay dili mahimo diha sa plataporma, basin maalamon nga ang mga may-bahin magkupot ug gamayng butang nga susama ang gidak-on sa mikropono aron mabansay ang hustong pagposisyon. Human sa demonstrasyon, ang mga may-bahin kinahanglang hinay nga mag-uli sa kuptan-sa-kamot nga mga mikropono, nga mag-amping nga sila dili masangit sa mga kordon sa ubang mga mikropono sa pagbiya nila sa plataporma.

Ang paghatag natog pagtagad sa paggamit ug mga mikropono direktang nalangkit sa usa sa pangunang mga tumong sa atong mga tigom, nga mao, ang paghatag ug kaayohan sa usag usa pinaagi sa atong paghisgot sa Pulong sa Diyos. (Heb. 10:​24, 25) Pinaagi sa pagkakat-on paggamit sa epektibong paagi sa mga mikropono, kita sa personal makatabang nianang maong hinungdanong tumong.