Mga Kasulatan Epektibong Gipaila

ANG Kasulatan maoy pasikaranan sa pagpanudlo nga himoon panahon sa atong mga tigom sa kongregasyon. Ang mga teksto sa Bibliya mao usab ang dugokan sa atong isulti diha sa ministeryo sa kanataran. Bisan pa niana, kon unsa ka dako ang ikaabag niini sa atong panaghisgot magdepende sa usa ka bahin sa epektibong pagpaila niini.

Gikinahanglan ang labaw pa kay sa pagsitar lamang sa kasulatan ug pagdapit sa usa ka tawo nga basahon kini uban nimo. Sa dihang magpaila sa usa ka kasulatan, paningkamoti ang pagkab-ot sa duha ka tumong: (1) Pukawa ang kahinam, ug (2) ipunting ang pagtagad nganha sa katarongan sa paggamit sa teksto. Ang maong mga tumong makab-ot sa nagkadaiyang mga paagi.

Isukna ang mga Pangutana. Kini labing epektibo kon ang tubag dili dayag sa imong mamiminaw. Paningkamoti ang paghan-ay sa pangutana sa paagi nga makapahunahuna sa ubang mga tawo. Gibuhat kini ni Jesus. Sa dihang ang mga Pariseo miduol kaniya didto sa templo ug sa publiko nagtigi sa iyang pagsabot sa Kasulatan, si Jesus nangutana kanila: “Unsay inyong hunahuna bahin kang Kristo? Kansang anak siya?” Sila mitubag: “Kang David.” Unya si Jesus nangutana: “Nan, ngano man nga si David pinaagi sa pagdasig nagtawag kaniya nga ‘Ginoo’?” Ug uban niini siya mikutlo sa Salmo 110:1. Nahilom ang mga Pariseo. Ang panon sa mga tawo, hinuon, nahimuot nga nagpatalinghog kang Jesus.​—Mat. 22:41-46.

Diha sa ministeryo sa kanataran, mahimong gamiton nimo ang pasiunang mga pangutana sama sa mosunod: “Ikaw ug ako adunay personal nga mga ngalan. Ang Diyos ba adunay personal nga ngalan? Makaplagan nato ang tubag sa Salmo 83:18.” “May panahon kaha nga adunay usa ka kagamhanan alang sa tibuok katawhan? Matikdi kon giunsa kini pagtubag diha sa Daniel 2:44.” “Ang Bibliya naghisgot ba gayod sa mga kahimtang nga naglungtad sa atong adlaw? Itandi ang giingon sa 2 Timoteo 3:1-5 sa mga kahimtang nga imong nasayran.” “May panahon kaha nga matapos na ang pag-antos ug kamatayon? Ang tubag sa Bibliya makaplagan sa Pinadayag 21:​4, 5.”

Diha sa usa ka pakigpulong, ang mainampingong paggamit ug mga pangutana aron ipaila ang mga kasulatan makapadasig sa imong mamiminaw aron mainteres na usab sa mga teksto, bisan kadtong nasayran pag-ayo nila. Apan mainteres kaha sila pag-usab niana? Kana mahimong magdepende kon kaha hinungdanon gayod kaayo kanila ang mga pangutanang imong isukna o dili. Bisan pag makapaikag sa mamiminaw ang ulohan, mahimong maglatagaw ang ilang mga hunahuna sa dihang magabasa kag mga teksto nga nadunggan na nilag daghang beses. Aron dili kana mahitabo, kinahanglan nga kanang butanga hunahunaon mo gayod aron ang imong presentasyon mahimong madanihon.

Ipresentar ang Usa ka Problema. Makapresentar kag usa ka problema ug dayon ipunting ang pagtagad nganha sa usa ka kasulatan nga adunay kalangkitan sa solusyon. Ayaw agaka ang mamiminaw sa pagdahom ug labaw pa kay sa ilang mabatonan. Kasagarang ang usa ka kasulatan mohatag ug bahin lamang sa solusyon. Bisan pa niana, makahangyo ka sa mamiminaw nga palandongon, samtang ginabasa mo ang teksto, kon unsa ang giya nga gihatag niini aron maatubang ang kahimtang.

Sa susamang paagi, makapahayag kag usa ka prinsipyo bahin sa diyosnong panggawi ug unya gamiton ang usa ka asoy sa Bibliya aron iilustrar ang kaalam sa pagsunod niini. Kon ang usa ka kasulatan adunay duha (o tingali labaw pa) ka espesipikong mga punto nga nalangkit sa ginahisgotan, ang ubang mga mamumulong mohangyo sa mamiminaw nga bantayan kini. Kon ang usa ka problema daw lisod kaayo alang sa usa ka linaing mamiminaw, makapalihok ka sa hunahuna pinaagi sa pagpresentar ug ubay-ubayng posibilidad ug dayon ang teksto ug ang kapadapatan niini maoy patubagon.

Ipunting ang Bibliya Ingong Awtoridad. Kon napukaw na nimo ang interes diha sa imong ulohan ug nakapahayag ug usa o mas daghang hunahuna mahitungod sa usa ka bahin niini, makapaila ka sa usa ka kasulatan pinaagi sa yanong pag-ingon: “Matikdi kon unsay giingon sa Pulong sa Diyos bahin niining puntoha.” Kini magpadayag kon nganong awtoritatibo ang materyal nga imong pagabasahon.

Si Jehova migamit ug mga lalaki nga sama ni Juan, Lucas, Pablo, ug Pedro aron pagsulat sa mga bahin sa Bibliya. Apan sila mga magsusulat lamang; si Jehova mao ang Awtor. Ilabina kon makigsulti sa mga tawong dili mga estudyante sa Balaang Kasulatan, ang pagpaila sa usa ka teksto pinaagi sa pag-ingong “si Pedro misulat” o “si Pablo miingon” dili sama ka puwersado kay sa usa ka introduksiyon nga magpaila sa teksto ingong ang pulong sa Diyos. Mamatikdan nga sa tinong mga higayon, si Jehova nagsugo kang Jeremias sa pagpaila sa mga pahibalo pinaagi sa pag-ingon: “Pamati sa pulong ni Jehova.” (Jer. 7:2; 17:20; 19:3; 22:2) Kon gamiton ba nato ang ngalan ni Jehova aron pagpaila sa mga kasulatan o dili, sa dili pa nato taposon ang atong paghisgot, angayng paningkamotan nato ang pagpunting nga ang anaa sa Bibliya mao ang iyang pulong.

Tagda ang Konteksto. Angay nga mahibalo ka sa konteksto sa dihang modesisyon kon unsaon pagpaila sa usa ka kasulatan. Sa pipila ka kahimtang direktang hisgotan nimo ang konteksto; ugaling, ang konteksto makaapektar sa ubang mga paagi sa imong isulti. Pananglitan, ipaila mo ba ang mga pulong sa mahadlokon-sa-Diyos nga si Job sa paagi nga sama sa imong pagpaila sa mga pulong sa usa sa iyang mini nga mga maglilipay? Ang basahon sa Mga Buhat gisulat ni Lucas, apan siya nagkutlo, apil sa uban pa, kang Santiago, Pedro, Pablo, Felipe, Esteban, ug sa mga manulonda, ingon man kang Gamaliel ug sa ubang mga Hudiyong dili Kristohanon. Kang kinsa nimo ipasidungog ang teksto nga imong gikutlo? Pananglitan, hinumdomi nga dili tanang salmo gitagik ni David ug dili ang tibuok basahon sa mga Proverbio gisulat ni Solomon. Mapuslanon usab nga mahibalo kon kinsay gitumong sa magsusulat sa Bibliya ug kon unsang malangkobong ulohan ang gihisgotan.

Gamita ang Makapatin-aw nga Impormasyon. Kini epektibo ilabina kon makapakita ka nga ang mga sirkumstansiyang naglungtad sa panahon sa asoy sa Bibliya maoy susama nianang imong gihisgotan. Sa ubang mga kaso gikinahanglan ang makapatin-aw nga impormasyon aron masabtan ang usa ka linaing teksto. Pananglitan, kon gamiton mo ang Hebreohanon 9:​12, 24 diha sa usa ka pakigpulong bahin sa lukat, basin kinahanglanon nga ang imong pagbasa sa teksto imong paunhan ug mubong katin-awan bahin sa kinasulorang lawak sa tabernakulo, nga, ingon nga gipaila sa kasulatan, naghulagway sa dapit nga gisudlan ni Jesus sa iyang pagkayab sa langit. Apan ayawg ilakip ang sobrang makapatin-aw nga impormasyon nga ang tekstong imong gipaila malandongan na.

Aron mouswag ang paagi sa imong pagpaila sa mga kasulatan, analisaha ang ginahimo sa eksperyensiyadong mga mamumulong. Matikdi ang nagkalainlaing mga metodo nga ilang gigamit. Analisaha ang pagkaepektibo niining mga metodoha. Sa pagpangandam sa imong mga pakigpulong, ilha ang paninugdang mga kasulatan, ug hunahunaa ilabina kon unsay angay nga mapalampos sa matag teksto. Planoha pag-ayo ang pagpaila sa matag teksto aron magamit kini nga labing epektibo. Sa ulahi, mahimong malukpanon aron ikalakip ang tanang teksto nga imong gamiton. Samtang mouswag kining bahina sa imong presentasyon, igapunting nimo ang labaw nga pagtagad nganha sa Pulong sa Diyos.