Pagtahod nga Gipakita sa Uban

ANG Kasulatan nagmando kanato nga “pasidunggi ang tanang matang sa mga tawo” ug “dili magsultig daotan mahitungod kang bisan kinsa.” (1 Ped. 2:17; Tito 3:2) Sa tinuoray, ang matag tawo nga atong mahibalag “gibuhat sa ‘dagway sa Diyos.’” (Sant. 3:9) Ang matag tawo maoy gipakamatyan ni Kristo. (Juan 3:16) Ug ang tanan takos makadungog sa maayong balita aron molihok pinasukad niana ug maluwas. (2 Ped. 3:9) Ang pipila ka tawo adunay mga hiyas o awtoridad nga takos sa linaing pagtahod.

Nganong ang pipila ka tawo tingali mosulay nga ipagawas ang ilang kaugalingon gikan sa pagpakita sa matang sa pagtahod nga gidasig sa Bibliya? Ang lokal nga kultura basin maglatid kon kinsay angay sa pasidungog nga gipasukad sa kasta, kolor, henero, panglawas, edad, bahandi, o sosyal nga kahimtang. Ang pagtahod sa awtoridad natibhangan tungod sa kaylap nga kahiwian taliwala sa mga opisyales sa gobyerno. Sa pipila ka nasod ang mga tawo diskontento kaayo sa ilang kahimtang sa kinabuhi, kay tingali nagtrabahog daghang oras aron makabaton lamang sa mga panginahanglan, ug gilibotan sila sa mga tawong dili mopakitag pagtahod. Ang mga batan-on nakasinati sa pagpit-os sa isigkaingon nga moapil sa pagrebelde batok sa dili-popular nga mga magtutudlo ug sa ubang mga tawong may awtoridad. Naimpluwensiyahan ang daghan sa pagpasundayag sa telebisyon bahin sa mga bata nga manghawod ug maoy ginasunod sa ilang mga ginikanan. Gikinahanglan ang paningkamot aron ang maong tawhanong mga ideya dili makapausab sa atong pagtahod sa uban. Hinunoa, sa dihang atong ihatag ang nahiangayng dignidad ngadto sa mga tawo, magpatungha kinig atmospera diin ang pagbayloayg mga ideya mas posible.

Matinahorong Pagduol. Ang usa ka tawo nga nagabuhat sa relihiyosong buluhaton gidahom nga magpakitag pagtahod pinaagi sa angay nga pagpamesti ug panglihok. Ang giisip nga angayang pamatasan magkalain diha sa nagkalainlaing mga dapit. Ang pipila nag-isip nga ang pagduol sa laing tawo nga nagkalo o gikuot sa bulsa ang usa ka kamot maoy dili matinahoron. Sa ubang mga dapit, ang maong pamatasan tingalig dinawat sa mga tawo. Tagda ang mga pagbati sa maong dapit aron dili makapasilo. Ang paghimo niana makatabang kanimo sa paglikay sa mga babag sa imong pagpahibalo nga epektibo sa maayong balita.

Ang samang butang mapadapat sa atong paagi sa pagtimbaya sa uban, ilabina kadtong tigulang na. Kasagarang giisip nga dili angay nga imong tawgon ang mga tawong hamtong pinaagi sa ilang ngalan gawas kon ang mga batan-on may permiso sa paghimo niana. Sa pipila ka dapit ang mga tawong hamtong gidahom usab sa paglikay sa pagtimbaya sa mga estranyo pinaagi sa ilang ngalan. Gawas pa, daghang pinulongan mogamit sa plural nga pulong “kamo” o sa ubang paagi nga magpakitag pagtahod alang sa usa nga tigulang o may awtoridad.

Matinahorong Pagtimbaya. Sa mas gagmayng mga komunidad gidahom nga imong timbayaon ang usa ka tawong imong mahibalag, samtang naglakaw sa dalan o inigsulod sa usa ka lawak. Kini mahimo pinaagig yanong timbaya, pahiyom, o yango sa ulo, o miiknat nga kilay. Ang dili pagtagad sa laing tawo giisip nga pagkadili-matinahoron.

Hinuon, ang pipila tingali mobating wala tagda bisan pag imo silang gitimbaya. Sa unsang paagi mahitabo kana? Tungod kay sila nakasabot nga ikaw wala makaila kanila isip mga indibiduwal. Kasagarang giklasipikar ang mga tawo sumala sa talagsaong pisikal nga kinaiya. Ang mga tawo nga adunay mga depekto ug mga suliran sa panglawas kasagarang likayan. Bisan pa niana, ang Pulong sa Diyos nagpakita kanato kon unsaon pagtagad ang maong mga tawo uban ang gugma ug pagtahod. (Mat. 8:​2, 3) Kitang tanan apektado sa usa ka paagi sa atong napanunod nga sala gikan ni Adan. Mobati ka bang tinahod kon kanunay kang mailhan sa uban tungod sa imong mga depekto? Dili ba mas gusto nimong mailhan tungod sa imong daghang positibong mga hiyas?

Ang pagtahod naglangkit usab sa pag-ila sa pagkaulo. Sa pipila ka dapit gikinahanglan nga makigsulti sa ulo sa panimalay sa dili pa mosangyaw ngadto sa ubang sakop sa panimalay. Bisan pag ang atong tinudlong-buluhaton sa pagwali ug pagtudlo nagagikan kang Jehova, giila nato nga ang atong mga ginikanan maoy gihatagag awtoridad sa Diyos aron sa pagbansay, pagdisiplina, ug pagdumala sa ilang mga anak. (Efe. 6:1-4) Busa, sa pagduaw sa usa ka balay, kasagarang angay nga makigsulti una ngadto sa mga ginikanan sa dili pa makigsulti ug dugay sa mga anak.

Duyog sa edad mao ang kasinatian sa kinabuhi nga kinahanglang tahoron. (Job 32:​6, 7) Ang pag-ila niini nakatabang sa usa ka batan-ong payunir nga sister sa Sri Lanka nga miduaw sa usa ka tigulang nga lalaki. Sa sinugdan siya mitutol sa iyang pagduaw, nga miingon: “Sa unsang paagi ang usa ka batan-ong sama kanimo makatudlo kanako sa Bibliya?” Apan ang payunir mitubag: “Sa pagkatinuod, wala ako moanhi aron sa pagtudlo kondili sa pagpaambit kanimo sa butang nga akong nahibaloan nga nakapalipay kaayo kanako nga kinahanglang isulti ko kini sa uban.” Ang matinahorong tubag sa payunir nakapukaw sa interes sa tawo. “Nan, sultihi ako, unsa ang imong nahibaloan?” siya misukna. “Nakahibalo ako kon unsaon pagkinabuhi sa walay kataposan,” miingon siya. Ang lalaking tigulang misugod sa pagtuon sa Bibliya uban sa mga Saksi ni Jehova. Dili tanang tigulang ang mopahayag sa tinguhang pagatagdon uban sa ingong pagtahod, apan ang kadaghanan magpabili niana.

Ugaling, posible nga magpasobra sa pagpasundayag ug pagtahod. Sa kaislahan sa Pasipiko ug sa uban pang dapit, ang matinahorong paggamit sa naandang paagi sa pagtimbaya sa dihang moduol sa mga pangulo sa balangay o sa tribo nakatabang sa mga Saksi aron sila pamation ug makahigayon sa pagpakigsulti ngadto sa mga pangulo ug sa ilang mga ginsakpan. Bisan pa niana, ang pag-ulog-ulog dili kinahanglan o angay. (Prov. 29:5) Sa susamang paagi, ang usa ka pinulongan basin adunay matinahorong mga pangdugang sa pulong isip bahin sa gramatika niini, apan ang Kristohanong pagtahod wala mag-obligar nga kini gamitong hinobra.

Matinahorong Pagpahayag. Ang Bibliya nag-awhag kanato sa pagpatin-aw sa katarongan sa atong paglaom “uban ang kalumo sa buot ug halawom nga pagtahod.” (1 Ped. 3:15) Busa, bisan pag kita makaarang tingali sa pagbutyag sa mga depekto sa punto de bista sa laing tawo, maalamon bang himoon kana sa paaging siya tingali maulawan? Dili ba kaha mas maayong mamati nga mapailobon, nga tingali mangutana kon nganong kana ang iyang pagbati, ug unya tagdon ang iyang mga pagbati samtang kita mangatarongan kaniya pinasukad sa Kasulatan?

Ang pagtahod nga sama nianang ipakita diha sa tinagsa nga mga pakigsulti angayng madayag usab sa dihang magpakigpulong ngadto sa mamiminaw diha sa plataporma. Ang mamumulong nga nagtahod sa iyang mamiminaw dili grabeng magsaway kanila o magpasundayag sa tinamdan nga nagpasabot: “Makahimo kamo niini kon gusto gayod ninyo.” Ang pagsulti sa maong paagi makapaluya lamang sa uban. Pagkamaayo nga ang mamiminaw isipong usa ka katigoman sa mga tawong nahigugma kang Jehova ug buot moalagad kaniya! Sa pagsundog kang Jesus, angayng ipakita nato ang pagkamasinabtanon sa dihang makiglabot niadtong tingali huyang sa espirituwal, dili kaayo eksperyensiyado, o mas hinayng magpadapat sa tambag sa Bibliya.

Masabtan sa mamiminaw ang pagtahod sa mamumulong alang kanila kon iyang ilakip ang iyang kaugalingon ingong usa nga nagkinahanglan nga magpadapat sa mas bug-os sa Pulong sa Diyos. Busa, maalamon ang paglikay sa kanunayng paggamit sa personal nga pronombreng “kamo” sa dihang magpadapat sa mga kasulatan. Pananglitan, matikdi ang kalainan tali sa pangutanang “Nagabuhat ba kamo sa tanan ninyong maarangan?” ug sa pamulong nga “Matag usa kanato maayong mangutana sa iyang kaugalingon: ‘Nagabuhat ba ako sa tanan nakong maarangan?’” Ang punto sa matag pangutana maoy sama ra, apan ang nahauna nagpasabot nga ang mamumulong wala mag-isip nga siya sama sa iyang mamiminaw. Ang ikaduha nagdasig sa matag tawo, lakip ang mamumulong, sa pag-analisar sa iyang kaugalingong kahimtang ug iyang kaugalingong mga motibo.

Sukli ang tentasyon sa pagsultig mga pasiaw aron lang pakataw-on ang mamiminaw. Makatibhang kini sa dignidad sa mensahe sa Bibliya. Tinuod, kita angayng magkalipay sa atong pag-alagad sa Diyos. Basin aduna pay mga bahin sa materyal nga naasayn kanato nga daw kataw-anan. Bisan pa niana, ang paghimo sa seryosong mga butang nga mous-os ngadto sa kataw-anang mga butang magpadayag sa kawalay-pagtahod alang sa mamiminaw ug sa atong Diyos.

Hinaot unta nga ang atong pagduol, atong panggawi, ug atong sinultihan magpasundayag kanunay nga atong giisip ang uban sumala sa gitudlo ni Jehova nga atong pagaisipon sila.