LEKSIYON 20
Kon Giunsa Pag-organisar ang Kongregasyon
Si Jehova maoy Diyos sa kahapsay. (1 Corinto 14:33) Busa makadahom ta nga ang iyang katawhan organisado. Giunsa pag-organisar ang Kristohanong kongregasyon? Unsay atong mahimo aron makatabang ta sa pagkaorganisado niini?
1. Kinsa ang ulo sa kongregasyon?
“Ang Kristo maoy ulo sa kongregasyon.” (Efeso 5:23) Gikan sa langit, siya nanguna sa kalihokan sa katawhan ni Jehova sa tibuok kalibotan. Gitudlo ni Jesus ang “matinumanon ug maalamong ulipon”—usa ka gamayng grupo sa hamtong nga mga ansiyano nga gitawag sab ug Nagamandong Lawas. (Basaha ang Mateo 24:45-47.) Sama sa mga apostoles ug mga ansiyano sa Jerusalem sa unang siglo, ang Nagamandong Lawas naghatag ug direksiyon sa mga kongregasyon sa tibuok kalibotan. (Buhat 15:2) Pero dili sila mga lider sa among organisasyon. Sila nagpagiya kang Jehova ug sa iyang Pulong ug nagpasakop sa pagkaulo ni Jesus.
2. Unsa ang papel sa mga ansiyano?
Ang mga ansiyano maoy hamtong nga Kristohanong mga lalaki nga nagtudlo base sa Kasulatan ug nag-atiman sa katawhan ni Jehova pinaagi sa pagtabang ug pagdasig kanila. Wala sila suweldohi sa ilang ginahimo. Hinuon, nag-alagad sila nga “kinabubut-on atubangan sa Diyos; dili tungod sa tinguha nga mamentaha, kondili kinasingkasing.” (1 Pedro 5:1, 2) Ang mga ansiyano ginatabangan sa ministeryal nga mga alagad, kinsa, sa ngadtongadto mokuwalipikar pod nga mag-alagad ingong ansiyano.
Naay mga ansiyano nga itudlo sa Nagamandong Lawas ingong tigdumala sa sirkito. Moduaw sila sa lainlaing kongregasyon aron maghatag ug giya ug pagdasig. Magtudlo silag mga ansiyano ug ministeryal nga alagad, nga nakakab-ot sa mga kuwalipikasyon nga naa sa Bibliya.—1 Timoteo 3:1-10, 12; Tito 1:5-9.
3. Unsay papel sa matag Saksi?
Ang tanan sa kongregasyon ‘magdayeg sa ngalan ni Jehova’ pinaagi sa pagpakigbahin sa mga tigom sa kongregasyon ug sa ministeryo sumala sa ilang kahimtang.—Basaha ang Salmo 148:12, 13.
TUN-IG DUGANG
Sayra kon unsang klase nga lider si Jesus, kon giunsa pagsundog sa mga ansiyano ang iyang ehemplo, ug kon unsaon nato pagpakigkooperar kang Jesus ug sa mga ansiyano.
4. Si Jesus buotan nga lider
Si Jesus naghatag natog makapatandog nga imbitasyon. Basaha ang Mateo 11:28-30, ug dayon hisgoti kini nga pangutana:
Unsay gusto ni Jesus nga atong bation sa iyang pagpanguna?
Giunsa pagsundog sa mga ansiyano ang ehemplo ni Jesus? I-play ang VIDEO.
Klarong gitudlo sa Bibliya kon sa unsang paagi himoon sa mga ansiyano ang ilang buluhaton.
Basaha ang Isaias 32:2 ug 1 Pedro 5:1-3, ug dayon hisgoti kini nga mga pangutana:
Unsay imong gibati sa pagkahibalo nga, sama kang Jesus, ang mga ansiyano naningkamot nga mapalig-on ang uban?
Unsa pa ang ubang paagi nga gisundog sa mga ansiyano si Jesus?
5. Ang mga ansiyano nagtudlo pinaagig ehemplo
Unsay gusto ni Jesus nga panghunahuna sa mga ansiyano sa ilang papel? I-play ang VIDEO.
Si Jesus naghatag ug sukdanan para niadtong nanguna sa kongregasyon. Basaha ang Mateo 23:8-12, ug dayon hisgoti kini nga pangutana:
Unsay imong ikasulti sa kalainan sa sukdanan sa Bibliya para sa mga ansiyano ug sa imong naobserbahan sa mga lider sa relihiyon?
Ang mga ansiyano naningkamot nga sila ug ang ilang pamilya magpabiling lig-on sa espirituwal
Ang mga ansiyano nag-atiman sa tanang igsoon sa kongregasyon
Ang mga ansiyano regular nga nagsangyaw
Ang mga ansiyano maoy mga magtutudlo. Motabang sab sila sa pagpanghinlo ug sa ubang buluhaton
6. Mokooperar ta sa mga ansiyano
Ang Bibliya naghatag natog importanteng rason nga mokooperar sa mga ansiyano. Basaha ang Hebreohanon 13:17, ug dayon hisgoti kini nga mga pangutana:
Makataronganon ba nga gidasig ta sa Bibliya nga magmasinugtanon ug magpasakop sa mga nanguna? Nganong kanay imong tubag?
Basaha ang Lucas 16:10, ug dayon hisgoti kini nga pangutana:
Nganong importante nga mokooperar sa mga ansiyano bisan sa daw gagmayng butang?
ANG UBAN MOINGON: “Dili kinahanglang moanib ug relihiyon.”
Unsay imong mahunahunaan nga mga kaayohan kon ang usa mosimba sa Diyos ingong bahin sa kongregasyon?
SUMARYO
Si Jesus ang ulo sa kongregasyon. Malipay ta nga mokooperar sa mga ansiyano ubos sa iyang pagpanguna kay sila nagpalig-on nato ug nagtudlo nato pinaagig ehemplo.
Review
Kinsa ang ulo sa kongregasyon?
Sa unsang paagi ang mga ansiyano nagtabang sa kongregasyon?
Unsay papel sa matag magsisimba ni Jehova?
SUSIHA
Tan-awa ang ebidensiya sa dakong pagmahal sa Nagamandong Lawas ug sa ubang ansiyano para sa mga Kristohanon karon.
Gipalig-on ang mga Igsoon sa Lugar nga Gidili ang Buluhaton (4:22)
Sayra kon unsay ginahimo sa mga tigdumala sa sirkito.
Ang Kinabuhi sa Tigdumala sa Sirkito sa Lagyong Lugar (4:51)
Basaha ang bahin sa importanteng papel sa mga babaye diha sa kongregasyon.
“Ang mga Saksi ni Jehova ba May mga Ministrong Babaye?” (Ang Bantayanang Torre, Septiyembre 1, 2012)
Sayra ang mga paningkamot sa mga ansiyano nga dasigon ang ilang mga igsoon sa pagtuo.
“Mga Ansiyano—‘Isigkamagbubuhat Alang sa Atong Kalipay’” (Ang Bantayanang Torre, Enero 15, 2013)