Pangayog Tabang sa mga Ansiyano

1. Giunsa pagpakita ni Jehova nga bililhon kaayo para niya ang iyang mga alagad?

BILILHON kaayo para kang Jehova ang iyang mga alagad. Iya silang gipalit pinaagi sa dugo ni Jesus, ug gitudlo niya ang mga ansiyano sa kongregasyon sa pag-atiman nila. (Buh. 20:28) Gusto ni Jehova nga mahigugmaong atimanon sa mga ansiyano ang iyang mga alagad. Ubos sa pagdumala sa Kristo, ang mga ansiyano naningkamot sa pagpalig-on ug pagpanalipod nila gikan sa espirituwal nga kadaot.—Isa. 32:​1, 2.

2. Kinsay ilabinang gustong tabangan ni Jehova? (Ezequiel 34:​15, 16)

² Gimahal pag-ayo ni Jehova ang tanan niyang alagad, pero ilabinang gusto niyang tabangan kadtong mga nag-antos ug naay problema sa espirituwal. Iya ning ginahimo pinaagi sa mga ansiyano. (Basaha ang Ezequiel 34:​15, 16.) Pero gusto niya nga mangayo tag tabang dihang ato ning gikinahanglan. Nianang mga panahona, gawas nga kinasingkasing tang moampo sa Diyos, makahangyo pod ta sa tabang sa “mga magbalantay ug mga magtutudlo” sa kongregasyon.—Efe. 4:​11, 12.

3. Sa unsang paagi makabenepisyo ta sa paghisgot sa responsibilidad sa mga ansiyano?

³ Niini nga artikulo, atong hisgotan kon sa unsang paagi gigamit ni Jehova ang mga ansiyano aron makadawat tag espirituwal nga tabang. Atong tubagon kini nga mga pangutana: Kanus-a ta angayng moduol sa mga ansiyano alang sa tabang? Nganong angay nato nang himoon? Ug unsaon ta nila pagtabang? Bisan kon sa pagkakaron maayo ra ang atong pag-alagad ug wala pa ta magkinahanglag espirituwal nga tabang gikan sa mga ansiyano, ang mga tubag niini nga mga pangutana makapalalom sa atong apresasyon sa paagi ni Jehova sa pagtabang nato. Mahibaloan pod nato kon unsay atong buhaton kon moabot ang panahon nga magkinahanglan ta sa ilang tabang.

KANUS-A TA ANGAYNG MODUOL SA MGA ANSIYANO ALANG SA TABANG?

4. Nganong makaingon ta nga ang Santiago 5:​14-16, 19, 20 nagtumong sa espirituwal nga sakit? (Tan-awa sab ang mga hulagway.)

⁴ Ang tinun-an nga si Santiago naghisgot bahin sa kahikayan nga gihimo sa Diyos aron makadawat tag espirituwal nga tabang. Siya miingon: “Duna bay masakiton kaninyo? Magtawag siyag mga ansiyano sa kongregasyon.” (Basaha ang Santiago 5:​14-16, 19, 20.) Ang konteksto niini nagpakita nga si Santiago naghisgot bahin sa espirituwal nga sakit. Pananglitan, ang nagsakit giingnan nga motawag, dili sa doktor, kondili sa mga ansiyano. Naghisgot pod ni nga ang nagsakit maulian kon mapasaylo ang iyang mga sala, maong klaro nga espirituwal nga sakit ang gitumong dinhi. Siyempre, sama sa pisikal nga sakit, naa pod tay angayng himoon aron maayo ta sa espirituwal nga sakit. Pananglitan kon magsakit ta, moadto tag doktor, atong isulti ang atong gibati, ug sundon nato ang reseta o preskripsiyon nga iyang ihatag. Sa susama, kon magsakit ta sa espirituwal, angay tang moduol ug ansiyano, isulti nato ang atong kahimtang, ug sundon nato ang binase sa Bibliya nga tambag nga iyang ihatag.

5. Unsay mga ilhanan nga nagkaluya na ta sa espirituwal?

⁵ Sa Santiago kapitulo 5, gidasig ta ni Santiago nga moduol sa mga ansiyano kon gibati nato nga nagkahuyang na ang atong espirituwalidad. Ilabinang importante nga ato ning himoon sa dili pa madaot ang atong relasyon sa Diyos. Kinahanglan nga magmatinud-anon ta sa atong kaugalingon. Ang Bibliya nagpasidaan nato nga kon dili ta mag-amping, basin maghunahuna ta nga maayo ra ang atong relasyon kang Jehova, pero ang tinuod dili diay. (Sant. 1:22) Mao nay nahitabo sa ubang Kristohanon sa Sardis, maong gipasidan-an sila ni Jesus bahin sa ilang espirituwal nga kahimtang. (Pin. 3:​1, 2) Ang usa ka paagi nga atong masusi kon okey pa ba ang atong espirituwalidad mao ang pagtandi sa kalidad sa atong pag-alagad karon ug sa atong pag-alagad kaniadto. (Pin. 2:​4, 5) Puwede natong pangutan-on ang atong kaugalingon: ‘Laayan na ba kong mobasa sa Bibliya ug mamalandong? Dili na ba ko regular sa pagtambong sa mga tigom ug kapoyan nang mangandam niini? Dili na ba ko dasig sa pagsangyaw? Nahurot na ba ang akong panahon sa paglingawlingaw o sa paghunahunag materyal nga mga butang?’ Kon oo ang atong tubag sa bisan asa niini nga mga pangutana, posibleng nagpakita ni nga nagkahuyang na ang atong relasyon kang Jehova. Kon ato ning balewalaon, lagmit mosamot ang kahimtang. Busa angay tang mangayog tabang sa mga ansiyano, ilabina kon nakita nato nga dili nato kayang tabangan ang atong kaugalingon o kon nakahimo na tag butang nga wala uyoni ni Jehova.

6. Unsay angayng buhaton niadtong nakahimog seryosong sala?

⁶ Siyempre, kon naay makahimog seryosong sala—sala nga puwedeng mahimong hinungdan nga ang usa matangtang gikan sa kongregasyon—angay siyang moduol ug ansiyano. (1 Cor. 5:​11-13) Nagkinahanglan siyag tabang aron mabalik ang iyang maayong relasyon kang Jehova. Pasayloon lang ta ni Jehova sa atong mga sala kon mohimo tag “mga buhat nga nagpakitag paghinulsol.” (Buh. 26:20) Apil niini nga mga buhat ang pagduol sa mga ansiyano kon nakahimo tag seryosong sala.

7. Kinsa pay nagkinahanglag tabang sa mga ansiyano?

⁷ Dili lang kadtong nakahimog seryosong sala ang ginatabangan sa mga ansiyano, kondili kadto pong naluya sa espirituwal. (Buh. 20:35) Pananglitan, tingali nalisdan ka pag-ayo nga suklan ang sayop nga mga tinguha. Basin mas lisod pa gyod ni ilabina kon sa wala pa ka mahimong alagad ni Jehova naadik ka sa droga, nagtan-awg pornograpiya, o imoral ug pagkinabuhi. Kon mao, ayaw pagduhaduha sa pagpangayog tabang. Puwede kang makig-estorya sa ansiyano nga andam maminaw nimo, mohatag ug praktikal nga tabang, ug magpasalig nimo nga mapalipay gihapon nimo si Jehova basta dili ka magpadala sa sayop nga mga tinguha. (Eccl. 4:12) Kon naguol ka kay nagsigeg balikbalik ang imong sayop nga tinguha, mahimo kang pahinumdoman sa mga ansiyano nga nalipay si Jehova nimo kay nangayo kag tabang ug gusto nimong ampingan ang imong relasyon kaniya.—1 Cor. 10:12.

8. Kinahanglan bang makig-estorya ta sa mga ansiyano bahin sa tanang sayop nga atong mahimo? Ipatin-aw.

⁸ Dili kinahanglan nga moduol dayon ta sa mga ansiyano sa matag higayon nga makahimo tag sayop. Pananglitan, ibutang ta nga nasultihan nimog sakit ang usa ka igsoon, o tingali wala ka makapugong sa imong kaugalingon ug nasuko ka pag-ayo. Imbes moduol dayon ug ansiyano, puwede nimong ipadapat ang tambag ni Jesus nga makigdait sa imong igsoon. (Mat. 5:​23, 24) Puwede kang mag-research bahin sa kalumo, pailob, ug pagpugong sa kaugalingon aron nga mas mapakita pa nimo kining nindot nga mga hiyas. Pero kon dili gihapon nimo masulbad ang imong problema, puwede ra kang mangayog tabang sa mga ansiyano. Sa iyang sulat ngadto sa mga taga-Filipos, gihangyo ni apostol Pablo ang usa ka wala nganli nga brader nga tabangan si Euodia ug Sintique nga masulbad ang ilang dili pagsinabtanay. Sa samang paagi, puwede pod kang matabangan sa usa ka ansiyano sa inyong kongregasyon.—Filip. 4:​2, 3.

NGANONG ANGAY TANG MANGAYOG TABANG SA MGA ANSIYANO?

9. Nganong dili ta angayng maulaw nga mangayog tabang sa mga ansiyano? (Proverbio 28:13)

⁹ Kon nakahimo tag seryosong sala o kon mibati ta nga dili nato kayang suklan ang sayop nga mga tinguha, nagkinahanglan tag pagtuo ug kaisog sa pagpangayog tabang sa mga ansiyano. Tingali maulaw ta sa pagbuhat niana. Pero nganong kinahanglan nato nang himoon? Kay pinaagi sa pagsunod niini nga kahikayan ni Jehova, atong gipakita nga misalig ta niya ug sa iyang mga instruksiyon nga makatabang nato nga magpabiling lig-on sa espirituwal. Atong giila nga gikinahanglan nato ang iyang tabang aron dili ta makahimog sala. (Sal. 94:18) Ug kon nakasala ta, madawat nato ang kaluoy ni Jehova kon atong itug-an ang atong sala ug hunongon ang pagbuhat niana.—Basaha ang Proverbio 28:13.

10. Unsay mahitabo kon itago nato ang atong mga sala?

¹⁰ Dako gyod kaayog kalainan ang pagtug-an ug ang pagtago sa atong mga sala. Kon atong itug-an sa mga ansiyano ang atong mga sala, pasayloon ta ni Jehova ug mabalik ang atong maayong relasyon kaniya. Pero kon ato ning itago, mas mosamot ra ang kahimtang. Dihang gitago ni Haring David ang iyang mga sala, nag-antos siya sa espirituwal, emosyonal, ug bisan sa pisikal. (Sal. 32:​3-5) Sa pag-ilustrar, mas mosamot ang atong sakit o injury kon dili dayon ta magpatambal. Sa susama, mas mosamot ang atong problema sa espirituwal kon dili dayon ta moduol sa mga ansiyano alang sa tabang. Dili gusto ni Jehova nga mahitabo na, maong gidasig ta niya nga ‘husayon ang mga butang’ pinaagi sa pagtug-an sa mga ansiyano aron mabalik ang atong maayong relasyon kaniya.—Isa. 1:​5, 6, 18.

11. Kon atong itago ang atong seryosong mga sala, unsay posibleng epekto niini ngadto sa uban?

¹¹ Posibleng maapektohan ang uban kon atong itago ang atong seryosong sala. Mahimong mapugngan nato ang paglihok sa balaang espiritu diha sa kongregasyon ug posibleng mameligro ang kalinaw sa mga igsoon. (Efe. 4:30) Maong kon nahibalo ta nga naay igsoon nga nakahimog seryosong sala, angay nato siyang dasigon nga itug-an kini sa mga ansiyano. Kon wala gihapon siya motug-an human sa igoigo nga panahon, kita ang motug-an sa mga ansiyano. Kay kon dili nato na himoon, makasala pod ta kang Jehova. (Lev. 5:1) Ang atong gugma ug pagkamaunongon kang Jehova maoy magpalihok nato sa pagsulti sa tinuod. Makatabang na nga magpabiling hinlo ang kongregasyon ug matabangan nato ang nakasalang igsoon nga mabalik ang iyang maayong relasyon kang Jehova.

UNSAON TA PAGTABANG SA MGA ANSIYANO?

12. Unsay ginahimo sa mga ansiyano aron tabangan kadtong luya sa espirituwal?

¹² Ang mga ansiyano gihatagag responsibilidad nga tabangan kadtong mga luya sa espirituwal. (1 Tes. 5:14) Kon nakasala ka, basin mosukna silag mga pangutana aron mahibaloan nila kon unsa gyoy imong gihunahuna ug gibati. (Prov. 20:5) Matabangan nimo sila kon imong isulti ang tanan, bisan pag lisod ni para nimo kay wala ka maanad nga isulti sa uban ang imong gibati o maulaw ka sa nahitabo. Ayawg kabalaka nga basig ‘magpasagad na lang kag sulti.’ (Job 6:3) Ang mga ansiyano dili maghunahunag negatibo bahin nimo. Hinuon maminaw silag maayo ug maningkamot nga masabtan ang tanang detalye una sila mohatag nimo ug tambag. (Prov. 18:13) Nahibalo sila nga nagkinahanglag panahon ang pagtabang sa espirituwal, maong tingali dili kay kas-a ra ka nila estoryahon. Hinuon, mapailobon silang motabang nimo hangtod nga masulbad ang imong problema.

13. Sa unsang paagi ang pag-ampo sa mga ansiyano ug ang ilang binase sa Bibliya nga tambag makatabang nato? (Tan-awa sab ang mga hulagway.)

¹³ Dihang moduol ka sa mga ansiyano, maningkamot sila nga dili dugangan ang kabug-at nga imong gibati. Hinuon moampo sila para nimo, ug madasig gyod ka sa “gamhanang epekto” sa ilang mga pag-ampo. Sila pod “maghaplas [kanimog] lana sa ngalan ni Jehova.” (Sant. 5:​14-16) Kini nga “lana” nagtumong sa makapadasig nga mga pulong diha sa Bibliya. Gamiton sa mga ansiyano ang maong mga pulong aron hupayon ug tabangan ka nga mabalik ang imong maayong relasyon kang Jehova. (Isa. 57:18) Ang binase sa Bibliya nga tambag nga ilang ihatag makapalig-on sa imong determinasyon nga padayong himoon kon unsay husto. Pinaagi niini, samag madungog nimo ang tingog ni Jehova nga nag-ingon: “Kini ang dalan. Lakaw mo niini.”—Isa. 30:21.

14. Base sa Galacia 6:​1, unsaon pagtabang sa mga ansiyano kadtong nakahimog “sayop nga lakang”? (Tan-awa sab ang mga hulagway.)

¹⁴ Basaha ang Galacia 6:1. Ang usa ka Kristohanon nga nakahimog “sayop nga lakang” wala na makasubay sa matarong nga mga sukdanan sa Diyos. Tingali nakahimo siyag sayop nga desisyon o nakalapas sa balaod sa Diyos. Ang gugma magpalihok sa mga ansiyano nga “tul-iron siya sa malumong paagi.” Ang Gregong pulong nga gihubad ug “tul-iron” puwedeng magtumong sa pagtul-id sa nalisa nga bukog aron maulian ni. Ang usa ka maayong doktor maningkamot sa pagtul-id sa nalisa nga bukog nga dili ra kaayo masakitan ang pasyente. Sa samang paagi, ang mga ansiyano maningkamot sa pagtul-id sa igsoon nga nakahimog sayop nga lakang, pero ila nang himoon sa paagi nga dili makahatag niyag dugang kasakit. Ang mga ansiyano gipahinumdoman pod nga ‘bantayan ang ilang kaugalingon.’ Samtang maningkamot sila sa pagtul-id nato, ilang ginahinumdoman nga sila pod dili hingpit ug posibleng makahimog sayop nga lakang. Imbes mahimong mahukmanon o maghunahuna nga mas labaw ug mas matarong sila, maningkamot ang mga ansiyano nga mahimong mapainubsanon ug magpakitag kaluoy.—1 Ped. 3:8.

15. Unsay puwede natong himoon kon naa tay problema?

¹⁵ Makasalig gyod ta sa mga ansiyano sa atong kongregasyon. Gibansay sila nga dili ipanulti ang kompidensiyal nga mga butang ug ibase ang ilang mga tambag gikan sa Bibliya imbes sa ilang kaugalingong opinyon. Nahibalo pod sila kon unsay himoon aron padayon tang matabangan sa atong mga problema. (Prov. 11:13; Gal. 6:2) Bisag ang mga ansiyano lainlaig kinaiya ug mga eksperyensiya, makaduol ta kang bisan kinsa nila aron isulti ang atong mga problema. Siyempre, dili ta moadto sa lainlaing mga ansiyano aron lang mangitag tambag nga gusto natong madungog. Kon ato nang himoon, maparehas ta niadtong mga tawo nga gusto lang ‘magpagitik sa ilang dalunggan’ imbes mokat-on sa “maayong pagtulon-an” sa Pulong sa Diyos. (2 Tim. 4:3) Dihang moduol ta sa usa ka ansiyano bahin sa atong problema, tingali pangutan-on ta niya kon kinsa na nga mga ansiyano ang atong giduolan ug kon unsang tambag ang ilang gihatag. Ug tingali mapainubsanon pod siyang mokonsulta sa ubang mga ansiyano.—Prov. 13:10.

ATONG PERSONAL NGA RESPONSIBILIDAD

16. Unsay atong responsibilidad?

¹⁶ Ingong mga karnero sa Diyos, gibantayan ug giatiman ta sa mga ansiyano, pero dili ta nila but-an kon unsay gusto natong himoon. Personal nato nga responsibilidad ang pagsunod sa matarong nga mga sukdanan sa Diyos. Manubag ta sa Diyos sa kon unsay atong ginasulti ug ginabuhat. Pero uban sa iyang tabang, makapabilin tang matinumanon. (Roma 14:12) Busa imbes nga but-an ta sa kon unsay gusto natong buhaton, gamiton sa mga ansiyano ang Bibliya aron tabangan ta nga masabtan ang panghunahuna sa Diyos. Kon atong sundon ang ilang binase sa Bibliya nga tambag, atong mabansay ang atong “katakos sa panghunahuna” aron makahimo tag maalamong mga desisyon.—Heb. 5:14.

17. Unsay angay natong determinasyon?

¹⁷ Dako gyod kaayong pribilehiyo para nato nga mahimong alagad ni Jehova. Gipadala ni Jehova “ang maayong magbalantay,” si Jesus, aron lukaton ta ug hatagag kahigayonan nga mabuhi hangtod sa hangtod. (Juan 10:11) Ug pinaagi sa mga ansiyano sa kongregasyon, gituman ni Jehova ang iyang saad: “Hatagan mo nakog mga magbalantay nga molihok sumala sa akong kabubut-on, ug sila magtagana kaninyog kahibalo ug lawom nga pagsabot.” (Jer. 3:15) Kon naluya ta o nagsakit sa espirituwal, dili ta angayng maulaw nga mangayog tabang sa mga ansiyano. Hinaot nga magmadeterminado ta nga pahimuslan pag-ayo ang kahikayan ni Jehova sa pagtabang nato pinaagi sa mga ansiyano.