AMASA

[pinamubo sa Amasias].

1. Anak nga lalaki sa igsoong babaye o igsoong babaye ni David sa inahan nga si Abigail ug Jeter (Itra), ug ig-agaw ni Absalom ug Joab. (2Sa 17:25; 1Cr 2:​16, 17) Si Jeter gitawag nga usa ka Israelinhon diha sa basahon ni Samuel ug usa ka Ismaelinhon diha sa Mga Cronicas, tingali tungod kay siya nagpuyo sa teritoryo sa Ismael. May pipila nga miergo nga si Amasa mao si Amasai, usa niadtong mikuyog sa kasundalohan ni David sa Ziklag, apan kini nga pag-ila sa iyang pagkatawo dili matino.​—1Cr 12:18.

Katuigan sa ulahi, sa dihang si Amasa mipaluyo sa pagrebelde ni Absalom batok kang David, gihimo siyang pangulo sa kasundalohan ni Absalom puli kang Joab. (2Sa 17:25) Ang pagrebelde nasanta, si Absalom nga anak ni David gipatay ni Joab, ug si Amasa gitanyagan nga mopuli kang Joab ingong pangulo sa kasundalohan ni David, sanglit sumala sa giingon ni David, siya “akong bukog ug akong unod.”​—2Sa 18:9-15; 19:13.

Ang pagrebelde miulbo na usab, niining higayona si Sheba buot nga mawalay bahin kang David. (2Sa 20:​1, 2) Si Amasa gihatagan ug tulo ka adlaw aron magtigom ug kasundalohan. Sa dihang wala siya moabot sa gitakdang panahon, si Abisai giingnan nga dad-on ang mga sulugoon ni David ug gukdon ang mga rebelde. Ang igsoon ni Abisai nga si Joab ug ang iyang mga tawo mikuyog kanila sa paggukod kang Sheba. Sa kataposan, sa dihang si Amasa nga naulahi pag-abot misugat kanila, si Joab, nga nagpakaaron-ingnong mabination nga mohalok, mihawid sa bungot ni Amasa pinaagi sa usa ka kamot ug migamit sa espada sa laing kamot sa pagyasyas sa tiyan ni Amasa. (2Sa 20:4-12) Tingali angay kini nga bayad tungod sa pagdapig ni Amasa kang Absalom apan tino nga dili pinaagi sa kamot nga naghimo niini. Busa gisugo ni David si Solomon nga ipanimalos si Amasa pinaagi sa kamatayon ni Joab.​—1Ha 2:​5, 32.

2. Anak nga lalaki ni Hadlai. Human sa kadaogan batok sa Juda, sa dihang ang mga manggugubat nga Israelinhon nagdalag balik sa ilang mga igsoon ingong mga sulugoon, si Amasa maoy usa sa upat ka pangulo sa Epraim nga mituman sa hangyo ni Oded nga manalagna nga ibalik ang mga binihag. Mitabang usab siya sa mga taga-Juda sa pagtagana sa ilang panginahanglan ug sa ilang kasakyan sa pagpauli.​—2Cr 28:8-15.