TROSO NGA IGLULUMPAG

Usa ka instrumento sa pagpakiggubat nga gigamit sa naglikos nga kasundalohan aron sa pagbuslot o sa pagbungkag sa mga ganghaan ug sa mga paril sa usa ka siyudad o kuta. Ang labing simple niini maoy gama sa bug-at nga troso nga ang tumoy puthaw nga kaamgid sa ulo sa laking karnero. Lagmit nga tungod niini o tungod kay kini idumbol sa dihang gamiton, ginganlan kini sa samang Hebreohanong pulong (kar) nga gigamit alang sa laking karnero.​—Eze 4:​1, 2; 21:22.

Ang naglikos nga kasundalohan maghimog bungdo, o pang-asdang nga bungdo, simpig sa mga paril sa siyudad aron diha niini ipaagi ang mga troso nga iglulumpag ug ang ubang mga kasangkapan sa gubat. Ang mga torreng pang-atake nga ingon kahabog sa mga paril sa siyudad mahimong itulod pasaka sa bungdo, sa ingon ang mga tig-atake motupong na sa lebel sa mga tigdepensa. Ang nagdepensa nga mga sundalo maningkamot sa pagdaot sa mga troso nga iglulumpag pinaagi sa paghulog ug mga piraso sa kahoy nga nagkalayo diha niini o sa pagsakmit niini gamit ang mga kadena o mga angkla.