PANG-ASDANG NGA BUNGDO

Ang pang-asdang nga bungdo (Heb., so·lelahʹ) maoy usa ka bungdo nga yuta (ug usahay mga bato) nga gihimo sa kasundalohan aron himoong pahandag nga agianan sa pagdala ug mga troso nga iglulumpag ug sa uban pang pang-asdang nga mga kagamitan batok sa usa ka kinutaang siyudad. (2Sa 20:15) Ang Asiryanhong hari nga si Senakerib naghimo ug pang-asdang nga bungdo batok sa Lakis. Ang mga pagpangubkob didto sa Lakis nagpakita nga kini nga bungdo sa panguna maoy mga bato nga gitapot pinaagig daghang argamasa. Apan si Senakerib wala makahimo ug pang-asdang nga bungdo batok sa Jerusalem.​—2Ha 19:32.

Ang pang-asdang nga mga bungdo gihimo ni Nabucodonosor nga hari sa Babilonya batok sa Jerusalem ug batok sa Tiro. (Jer 6:6; Eze 21:22; 26:​7, 8) Ang paglikos batok sa Jerusalem matagnaong gihulagway sa dihang si Ezequiel gisugo sa pagkulit ug usa ka modelo sa Jerusalem diha sa usa ka tisa ug sa pagtukod ug pang-asdang nga bungdo batok niini.​—Eze 4:​1, 2.