BEER

[Atabay].

Ang Hebreohanong pulong nga beʼerʹ kasagarang nagtumong sa usa ka atabay nga lahi sa usa ka kinaiyanhong tubod (Heb., ʽaʹyin). Sagad kining makita diha sa gikombinar nga ngalan sa mga dapit.​—Itandi ang BEER-ELIM; BEER-SEBA.

1. Human moagi sa Arnon sa ilang pagsingabot sa Yutang Saad, ang mga Israelinhon nakaabot sa Beer. (Num 21:13-16) Dinhi gikalot ang usa ka atabay, lagmit sa mga pangulong prinsipe sa mga tribo, nga naggamit sa ilang mga sungkod, ug migula ang tubig. Kini nga panghitabo mao ang hinungdan sa balaknong awit nga gitagik diha sa mga bersikulo 17, 18.

Tungod sa kahinungdanon sa gihimo sa mga prinsipe sa pagkalot sa atabay, gituohan sa pipila nga kining dapita mao ra usab ang Beer-elim (nagkahulogang “Atabay sa Dagkong mga Kahoy”). (Isa 15:8) Ang lokasyon dili matino, apan gihunahuna nga lagmit nahimutang kini diha sa bul-oganang walog nga gitawag ug Wadi Thamad, sa A sa Arnon ug mga 56 km (35 mi) sa S sa Patayng Dagat. Ang tubig sagad dali rang makaplagan dinhi pinaagi sa pagkalot sa yuta.

2. Usa ka dapit diin si Jotam nga anak nga lalaki ni Gideon (Jerubaal) mikalagiw human niya iyagyag ang pagkamaluibon ni Abimelek. (Huk 9:3-5, 21) Ang Al-Bira, mga 12 km (7.5 mi) sa A sa Bet-san ug sa HS sa Bukid sa Tabor, gituohan sa pipila nga mao ang posibleng lokasyon; ang uban naghunahuna nga mao kini ang Beerot. (Tan-awa ang BEEROT.) Apan, tungod kay walay timailhan sa direksiyon sa pagkalagiw ni Jotam gikan sa Bukid sa Gerizim, dili matino ang nahimutangan niini.