KEDORLAOMER

Usa ka hari sa karaang Elam kinsa, sa wala pa mosulod si Abraham sa Yutang Saad niadtong 1943 W.K.P., nagpakaylap sa iyang gahom pakasadpan hangtod sa mga utlanan sa Ehipto. Human sa 12 ka tuig nga pagkaulipon, ang lima ka hari duol sa habagatang tumoy sa Patayng Dagat mirebelde batok sa ilang magmamando nga taga-sidlakan. Sa ika-14 nga tuig, si Kedorlaomer ug ang iyang tulo ka alyado, si Amrapel sa Sinar, si Ariok sa Elasar, ug si Tidal sa Goiim, miadto sa K aron pahunongon ang rebelyon. Sugod sa A ug lukop sa H, gipamildi nila ang mga siyudad ubay sa mga ruta sa negosyo sa S sa Jordan, ug sa H sa Patayng Dagat sa teritoryo nga gipuy-an sa ulahi sa mga Amalekanhon. Niadtong tungora sayon ra ang pagpakalagiw sa lima ka hari nga maoy utok sa pag-alsa.

Usa sa mga nabihag ni Kedorlaomer mao ang pag-umangkon ni Abraham nga si Lot, nga nagpuyo sa duol. Sa pagkahibalo niini, si Abraham uban sa iyang 318 ka armadong mga sulugoon nangandam aron lutoson ang mga kaaway. Sa Dan gipakuratan nila ang mas gamhanang puwersa sa ilang mga kaaway ug, malamposong naggukod kanila hangtod sa Hoba, sa A sa Damasco, nga nagbawi kang Lot ug sa iyang mga kabtangan.​—Gen 14:1-17.

Ang ngalang Kedorlaomer wala makaplagi sa mga talaan sa karaang mga magmamando sa Elam, apan kini nailhan nga Elamihanon. Ang Kudur, nga lagmit laing porma sa Chedor, makita diha sa daghang gikombinar nga mga ngalan. Si Lagamar, nga susama sa laomer, maoy usa ka bathala sa mga Elamihanon.